އެމްޑީޕީގެ 18 އަހަރުގެ ދިގު ތާރީހުގައި ބޭއްވި އެންމެ ވާދަވެރި ރިޔާސީ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރީގެ ރަައީސް މުހައްމަދު ނަޝީދު ވާދަކުރައްވާ ކާމިޔާބު ހޯއްދެވީ ބޮޑު ތަފާތަކުންނެވެ. މިހާތަނަށް ގާތްގަނޑަކަށް ހުރިހާ ފޮއްޓެއް ގުނާ ނިމުނު އިރު ރައީސް ސޯލިހު ވަނީ 61 ޕަސެންޓް ވޯޓް ހޯއްދަވާފަ އެވެ. ރައީސް ނަޝީދަށް ލިބި ވަޑައިގަތީ 39 ޕަސެންޓެވެ. 

ގދ. ތިނަދޫ ދެކުނު ދާއިރާގެ ވޯޓު ފޮށީގެ މައްސަލަ ހައްލުކޮށް 7:00 ގައި އަލުން ވޯޓް ލާން ވަނީ ފަށައިފަ އެވެ. މިރޭ 10:00 އާއި ހަމައަށް ވޯޓުލުން ކުރިއަށް ދާނެ އެވެ.

ތިނަދޫ ދެކުނު ދާއިރާގައި މައްސަލަ ޖެހުނީ ވޯޓް ކަރުދާސްކޮޅުގެ ފޮޓޯއެއް ނެގުމާއި ގުޅިގެންނެވެ. ވޯޓްގެ ސިއްރުކަން ގެއްލުމާއި ގުޅިގެން އުފެދުނު ހަމަނުޖެހުން ބޮޑުވީ އެ ސަރަހައްދަށް އެހެން ޕާޓީއެއްގެ މީހަކު ވަނުމާއި ގުޅިގެންނެވެ. އެ ހަމަނުޖެހުމުގެ ތެރޭގައި ވޯޓްފޮށި ވަނީ ފަޅާލާފަ އެވެ. އަދި އެހާތަނަށް ވޯޓްލާފައިވާ މީހުންގެ ވޯޓްކަރުދާސްތައްވެ ބިންމައްޗަށް އެޅި ވޯޓް ވަނީ ގަޑުބަޑުވެފަ އެވެ.

އަލުން ވޯޓް ލާން ފެށިޔަސް، ވޯޓުލާ މަރުކަޒުގައި ތިބީ ހަމައެކަނި ރައީސް ސޯލިހުގެ މަންދޫބުންނެވެ. ރައީސް ނަޝީދުގެ މަންދޫބުން ވަނީ ވޯޓުލާ މަރުކަޒުން ނިކުމެގެން ގޮސްފަ އެވެ.

އެމްޑީޕީގެ ރިޔާސީ ޕްރައިމަރީގެ ވޯޓް ގުނުން މިހާރު ކުރިއަށް އެބަ ދެއެވެ. ގިނަ ވޯޓްފޮށިތަކުގެ ނަތީޖާ މިހާރު ވަނީ ސާފު ވެފައެވެ. ބޮޑު ތަފާތަކުން ކުރީގައި އުޅުއްވަނީ އެމްޑީޕީގެ އިސް ލީޑަރު އިބްރާހިމް މުހައްމަދު ސޯލިހެވެ. އެމަނިކުފާނަށް 64 ޕަސެންޓްގެ ވޯޓް ލިބޭނެ ކަމަށް ބެލެވެއެވެ.

އިސްކަންދަރު ސުކޫލުގައި ބަހައްޓާފައިވާ މާލޭގައި ދިރިއުޅޭ ހިންނަވަރުގެ ރައްޔިތުން ވޯޓްލީ ވޯޓްފޮށި ކަނޑާ ވޯޓް ގުނަން ތައްޔާރުވެފައި ވަނިކޮށް އެތަނަށް ވަދެގަތް ދެ މީހަކު ވޯޓް ކަރުދާސްތައް އުކާލައިފި އެވެ. އެ ސަރަހައްދުގައި ވޯޓް ގުނުމުގެ ތައްޔާރީތައްވެ ވޯޓްފޮށި ކަނޑާ ވޯޓް ކަރުދާސްތައް މޭޒު މައްޗަށް އަޅާލި ތަނާ ދެ މީހަކު ވަނީ އެ ތަނަށް ވަދެގަނެ ވޯޓް ކަރުދާސްތައް އުކާލާފައެވެ. އެ ދެ މީހުން މިހާރު ވަނީ ހައްޔަރު ކޮށްގެން ގެންގޮސްފައެވެ. މިކަން ހިނގުމުގެ ކުރީން އެ މަރުކަޒުގައި ކަންކަން ދިޔައީ ވަރަށް އަމާންކަމާ އޮމާންކަމާ އެކުއެވެ.

އެމްޑީޕީގެ ރިޔާސީ ޕްރައިމަރީގެ ވޯޓް ގުނަން މިހާރު ވަނީ ފަށާފައެވެ. ނަމަވެސް ބައެއް ވޯޓް ފޮށިތައް އަދި ބަންދެއް ނުކުރެވެއެވެ. އެއީ ވަގުތަށް ވޯޓްލާންް ނުފެށުނު ތަންތަނާއި އެކި ސަބަބުތަކާއި ގުޅިގެން ވޯޓްލުން މެދުކެނޑުނު ފޮށިތަކެވެ. އެ ފޮށިތައް ބަންދު ކުރެވޭނެ ކަމަށް ބެލެވެނީ ހަތެއް ޖަހާއިރު އެވެ. ނަމަވެސް ގިނަ ވޯޓްފޮށިތައް މިހާރު ގުނަމުންދާއިރު ބައެއް ވޯޓްފޮށިތަކުގެ ނަތީޖާތައް މިހާރު ދަނީ ލިބެމުންނެވެ. ލިބިފައިވާ ނަތީޖާތަކުން ބޮޑު ތަނުން ކުރީގައި އުޅުއްވަނީ ރައީސް އިބްރާހިމް މުހައްމަދު ސޯލިހެވެ. މިހާތަނަށް ސާފު ކުރެވުނު ނަތީޖާއިން ރައީސް ނަޝީދަށް ވުރެ ރައީސް ސޯލިހަށް ލިބިވަޑައިގެން ވޯޓްގެ އަދަދު 40 ޕަސެންޓް އިތުރުވެ.

އެކި މައްސަލަތައް ޖެހިގެން ވޯޓުލުން ހުއްޓުނު ފޮށިތަކުގެ ތެރެއިން އިތުރު ވަގުތު އިއުލާނު ކޮށްފައިވާ ފޮށިތަކަށް ވޯޓުލާން އިތުރު ވަގުތު ލިބޭނެ ކަމަށް އިންތިހާބީ ކޮމެޓީ އިން ބުނެ އެވެ. ޕްރައިމަރީގެ ވޯޓުލުން މިއަދު ފެށީ ހެނދުނު ނުވައެއް ޖަހާއިރު އެވެ. ވޯޓުލާން ފެށުމަށްފަހު އެކި މައްސަލަތައް ޖެހިގެން ބައެއް ފޮށިތަކުގެ ވޯޓުލުން ހުއްޓާލައި އަދި ހަމަނުޖެހުންތައް ވެސް ހިނގި އެވެ.

އިންތިހާބީ ކޮމެޓީގެ މުގައްރިރު އިބްރާހިމް ވަހީދު "މި" ނޫހަށް މައުލޫމާތު ދެއްވަމުން ވިދާޅުވި ގޮތުގައި އިތުރު ވަގުތު ލިބޭނީ ވަގުތު ބޭނުންވާ ކަމަށް އިއުލާނުކުރި ދާއިރާތަކަށެވެ. ވޯޓުލުން ހުއްޓި ހަމަނުޖެހުން ހިނގި ނަމަވެސް، އިތުރު ވަގުތު އިއުލާނު ނުކުރާ ދާއިރާތަކުގެ ވޯޓުގެ ވަގުތު ފަހެއް ޖަހާއިރު ނިމޭނެ ކަމަށެވެ.

އިންތިހާބުގެ ތެރެއިން އެކި މައްސަލަތައް ޖެހިގެން ބައެއް ރަށްރަށުގެ ވޯޓު ފޮށިތައް ފަޅާލައިފައިވެ އެވެ. އިބުރޭ ވިދާޅުވީ އިންތިހާބުގެ ކުރިން ބައިވަރު އެތައް ޝަކުވާއެއް ހުށަހެޅި ކަމަށެވެ. އެކަމަކު މިއަދު ރަސްމީކޮށް ހުށަހަޅާފައި ވަނީ 10 ޝަކުވާ ކަމަށާއި ފެންނަމުން ދިޔައީ އަމިއްލައަށް މަސްލަހަތު ނަގާލަން އުޅުނު މަންޒަރު ކަމަށެވެ.  

އެމްޑީޕީގެ ރިޔާސީ ޕްރައިމަރީގެ އިންތިހާބުގެ ވޯޓުގެ ސައްހަކަމާމެދު ޝަކުވާއެއް ނެތް ކަމަށް މި އިންތިހާބާ ބެހޭ ކޮމެޓީން ބުނެފި އެވެ. "މި" ނޫހަށް މައުލޫމާތު ދެއްވަމުން ކޮމެޓީގެ މުގައްރިރު އިބްރާހިމް ވަހީދު ވިދާޅުވީ ޝަކުވާ ހުށަހަޅަން ހުޅުވާލި ނަމަވެސް ބޮޑު ޝަކުވާއެއް ނުލިބޭ ކަމަށެވެ. އޭގެ ބަދަލުގައި މައްސަލަތައް ޖެހުމުން އަމިއްލައަށް ވޯޓު ފޮށީގައި އަތް އަޅައިގެން ބަޔަކު މަސްލަހަތު ނަގާލަން މަސައްކަތް ކޮށްފައިވާ ކަމަށެވެ.

"ފެނިގެން މިދިޔައީ ވޯޓުގެ ސައްހަކަން ނަގާލާ ގެއްލުން ދެވޭނެ ގޮތެއް ހޯދަން ބަޔަކު މަސައްކަތް ކުރަމުން ދިޔަކަން،" އިބުރޭ ވިދާޅުވި އެވެ. 

ރިޔާސީ ޕްރައިމަރީ، ކުރީގެ ރަައީސް އަދި އެމްޑީޕީގެ ރައީސް މުހައްމަދު ނަޝީދު ކާމިޔާބު ކުރައްވާފައިވާ ކަމަށް އެ މަނިކުފާނުގެ ކެމްޕެއިން ޓީމުން ދެންމެ އިއުލާނު ކޮށްފި އެވެ.  އެމްޑީޕީގެ އިސް ލީޑަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ކުރީގެ ރަައީސް / އެމްޑީޕީގެ ރައީސް މުހައްމަދު ނަޝީދު ވާދަ ކުރައްވާ ރިޔާސީ ޕްރައިމަރީގެ ވޯޓް ނެގުން އަދިވެސް ދަނީ ކުރިއަށެވެ. އިންތިހާބުގެ ވޯޓް ނެގުން ހަމަޖެހިފައި އޮތީ ހެނދުނު ނުވަަޔަކުން ހަވީރު ފަހަކަށެވެ. ނަމަވެސް އެކި މައްސަލަތަކާއި ގުޅިގެން މަދު ވޯޓް ފޮއްޓެއް ނޫނީ ފަހެއް ޖެހިއިރު ބަންދު ކުރެވިފައެއް ނުވެއެވެ.

ރައީސް ނަޝީދުގެ ކެމްޕޭން އެޖެންޓް / ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ އެގްޒިޓް ޕޯލްތަކުން ދައްކާ ގޮތުން 64.7 ޕަސެންޓް ވޯޓާއެކު ކުރީގައި އުޅުއްވަނީ ރައީސް ނަޝީދެވެ.

"އަލްހަމްދުﷲ، ރައީސް މުހައްމަދު ނަޝީދު މި އިންތިހާބު ކާމިޔާބު ކުރައްވައިފި،" ހަސަން ލަތީފް ދެންމެ ކުރެއްވި ޓްވީޓެއްގައި ވިދާޅުވެފައިވެއެވެ. އޭނާ މިހެން ވިދާޅުވި ނަމަވެސް އިންތިހާބުގެ ނަތީޖާ ސާފުވާނީ ހުރިހާ ވޯޓްތަކެެއް ގުނާ ނިމުމުންނެވެ. މިރޭ ނޫނީ ނަތީޖާ މުޅީން ޔަގީނެއް ނުކުރެވޭނެ އެވެ.