ނަފްސާނީ ބައްޔަށް ފަރުވާދޭ ކްލިނިކާއެކު އުނގޫފާރު ހޮސްޕިޓަލަށް ގިނަ ހިދުމަތްތަކެއް

ނަފްސާނީ ބައްޔަށް ފަރުވާދޭ ކްލިނިކަކާއެކު ރ. އުނގޫފާރު ރީޖަނަލް ހޮސްޕިޓަލުގައި އެޅި އާ ބްލޮކް ރައީސް އިބްރާހިމް މުހައްމަދު ސޯލިހު މިއަދު ހުޅުއްވައިދެއްވައިފި އެވެ.

އުނގޫފާރު ރީޖަނަލް ހޮސްޕިޓަލުގައި ޓާޝަރީ ހިދުމަތްތަކާއެކު ޒަމާނީ ފެންވަރަށް ތަރައްގީ ކުރުމަށް މި ސަރުކާރުން އެޅި އާ ބްލޮކްގެ މަސައްކަތް ނިންމައި މިހާރު ވަނީ ހިދުމަތް ދޭން ފަށައިފަ އެވެ. ރައީސް މިއަދު ވަނީ ރަސްމީކޮށް އެތަން ހުޅުއްވައިދެއްވާފަ އެވެ.

މި ބްލޮކްގައި ނަފްސާނީ ބަލިތަކަށް ފަރުވާ ދިނުމަށް "ސިއްތަ ކްލިނިކް" ވަނީ ގާއިމްކޮށްފަ އެވެ. އޭގެ އިތުރުން "އުފަންވެނި ކްލިނިކް" އަދި ޒަމާނީ ގިނަ އިތުރު ހިދުމަތްތައް ލިބޭ އިމާރާތަށް "މީރަން ބިލްޑިން" ގެ ނަމުން ވަނީ ނަން ދީފަ އެވެ.

ހޮސްޕިޓަލަށް އިތުރުކުރި އާ އިމާރާތުން ލިބޭ ހިދުމަތްތަކުގެ ތެރޭގައި؛

ސަރުކާރުން މި މަޝްރޫއު ކުރިއަށް ގެންގޮސްފައި ވަނީ އެލިއާ އިންވެސްޓްމެންޓް ޕްރައިވެޓް ލިމިޓެޑާ ހަވާލުކޮށްގެންނެވެ. 

ރައީސް މިއަދު އުނގޫފާރުގައި ވާހަކަދައްކަވަމުން ވިދާޅުވެފައި ވަނީ ހޮސްޕިޓަލުގައި މަސައްކަތް ކުރާ މުވައްޒަފުންގެ އެކޮމޮޑޭޝަން މައްސަލަ ވެސް ވަރަށް ބޮޑުވެފައިވާ ކަމަށެވެ. ކުރިއަށް އޮތް ދައުރުގައި އެމަނިކުފާނަށް ވެރިކަން ލިބެއްޖެނަމަ ހޮސްޕިޓަލުގައި އެކޮމޮޑޭޝަން ބްލޮކެއް އަޅުއްވައިދެއްވާނެ ކަމަށް ވަނީ ވައުދުވެވަޑައިގެންފަ އެވެ.

އުނގޫފާރު ރީޖަނަލް ހޮސްޕިޓަލަކީ އެ ސަރަހައްދުގައި ހިމެނޭ އޮތޮޅުތަކުގެ ގިނަ ބަޔަކު ފަރުވާ ހޯދާ ހޮސްޕިޓަލެކެވެ. ހޮސްޕިޓަލުގެ ވަސީލަތްތައް ޓާޝަރީ ފެންވަރަށް ގާއިމްކޮށްދިނުމަކީ މި ސަރުކާރުގެ ވައުދެކެވެ.