މި ވަރަށް އާދޭސް ދަންނަވާއިރު ޓެސްޓް ކޮށްލުން ކީއްތޯ: ގާސިމް

ރައީސުލްޖުމްހޫރިއްޔާގެ މަގާމަށް ވަޑައިގަންނަވަން ކުރައްވާ މަސައްކަތްފުޅަކީ ރައްޔިތުން ތަނަވަސް ކޮށްދެއްވުމުގެ އުންމީދުގައި ކުރައްވާ މަސައްކަތްޕުޅެއް ކަމަށާ އެހެން ކަމުން އެ ފުރުސަތު ދެއްވުމަށް ޖުމްހޫރީ ޕާޓީގެ ލީޑަރު / ރިޔާސީ ކެންޑިޑޭޓް ގާސިމް އިބްރާހިމް އާދޭހާއެކު މިރޭ އެދިވަޑައިގެންފި އެވެ.

"ދަރުމަވެރީންނާއި ކުޅުންތެރީންނާއި އޮފިޝަލުންނާއި ކުލަބު ޖަމިއްޔާތަކާއި އެސޯސިއޭޝަންތަކާއި ސަޕޯޓަރުންގެ ހައްލަކީ ގައުމީ ކެންޑިޑޭޓް ގާސިމް އިބްރާހިމް" މި ނަމުގައި މިރޭ ހެޓޮލް ޖެން ގައި ބޭއްވި އިވެންޓެއްގައި ގާސިމް ވިދާޅުވީ އެމަނިކުފާނުގެ އެދިވަޑައިގަތުމަކީ ކުރިއަށް އޮތް ރިޔާސީ އިންތިހާބުގައި ބޮޑު ޕާޓީ ކުޑަ ޕާޓީ ނުބަލާ ރަނގަޅު ކެންޑިޑޭޓަކު އިހްތިޔާރު ކުރެއްވުން ކަމަށެވެ. އެ ގޮތުން މާޒީގައި ކަން ހިނގާފައިވާ ގޮތް ބެލުމުން އެންމެ ރަނގަޅު ކެންޑިޑޭޓަކީ ކޮބައިކަން ދެނެގަނެވޭނެ ކަމަށް ވިދާޅުވި އެވެ.

ގާސިމް ވިދާޅުވީ ވެރިކަމަށް ވަޑައިގަތުމަށް ކުރައްވާ މަސައްކަތްޕުޅުގެ ފަހަތުގައި އޮތީ އެންމެ އެދުންފުޅެކެވެ. އެއީ އެމަނިކުފާނެކޭ އެއްފަދައިން ރައްޔިތުން ތަނަވަސް ކޮށްދެއްވުން ކަމަށް ވިދާޅުވި އެވެ. އެކަން ކުރައްވާނެ ގޮތާއި ތަޖުރިބާ އެމަނިކުފާނު ކިބައިގައި އެބަހުރި ކަމަށް ވިދާޅުވި އެވެ.

އެހެން ކަމުން ގާސިމް އެދިވަޑައިގަތީ އެންމެ ފަހަރަކު ނަމަވެސް އެމަނިކުފާނު ޓެސްޓް ކޮށްލެއްވުމަށެވެ.

"ތިބޭފުޅުން ޓެސްޓް ކޮށްލައްވަން ވެސް އެންމެ ރަނގަޅު ނޫންތޯއޭ އަޅުގަނޑު މި އަނގަތަޅަމުންދާއިރު، ކޮންމެ ފަަހަރަކު ވެސް ކުރިމަތިލެވޭނެ ޗާންސް އޮތިއްޔާ އެ ފުރުސަތު ދެއްވާތޯ ރައްޔިތުންނަށް އާދޭސް ދަންނަވަމުންދާއިރު ކީއްވެގެންތޯއޭ އެއް ފަހަރުވެސް އަޅުގަނޑަށް ފުރުސަތު ނުދެއްވަންވީ،"

ގާސިމް ވިދާޅުވީ އެމަނިކުފާނަކީ ދައުލަތުގެ ބޮޑު ލާރިއެއްގައި ވެސް ޖެހިވަޑައިގަންނަވާނެ ބޭފުޅެއް ނޫން ކަމަށެވެ. ރައްޔިތުންނަށް އިހުލާސްތެރި އަމާނާތްތެރި ވެރިކަމެއް ކޮށްދެއްވާނެ ކަމަށް ވައުދުވެވަޑައިގެންނެވި އެވެ. އެކަން މާޒީވެސް ފެނިފައިވާނެ ކަމަށް ވިދާޅުވެ މިސާލު ވެސް ދެއްކެވި އެވެ. ވިދާޅުވީ އަތުގައި ކިތަންމެ ލާރިއެއް ޖެހިވަޑައިގަންނަވާނެ ކިތަންމެ މަގާމެއް ފުރުއްވާފައިވެސް ވާނެ ކަމަށެވެ. އެ ގޮތުން މަރުކަޒީ ބޭންކްގެ ގަވަރުނަރުކަމާއި ފިނޭންސް މިނިސްޓަރުކަމާއި އައިއެމްއެފާއި ވޯލްޑްބޭންކަށް ރާއްޖޭން ކަނޑައަޅާފައި ހުންނަވާ ގަވަރުނަރުކަން ކުރެއްވިކަން ފާހަގަ ކުރެއްވި އެވެ.

"އަޅުގަނޑު ހަމަ ގައިމުވެސް ދައުލަތުގެ ފައިސާ އިން ބޮޑު ލާރިއެއްގައި ވެސް ނުޖެހޭނަން. ބައި ސެންޓް ވެސް ނޯންނާނެ ވިލާ ތިޖޫރިއަށް ވަދެފައިވެސް ދައުލަތުގެ ފައިސާ އިން،"

ގާސިމް ވިދާޅުވީ އެމަނިކުފާނުގެ ބޮޑު ބައިވެރިވުމެއް އޮވެގެން އެމްޑީޕީއަށް ދެ ފަހަރު ވެރިކަން ހޯއްދަވައި ދެއްވި ކަމަށެވެ. އަދި ޕީޕީއެމަށް ވެސް އެއް ފަހަރު ވެރިކަން ހޯއްދަވައި ދެއްވި ކަމަށެވެ. މިއީ އެމަނިިކުފާނަށް ފުރުސަތު ދެއްވަން ރަނގަޅު ފަހަރެއް ނޫންތޯ ސުވާލު ކުރެއްވި އެވެ.