އިހަވަންދިއްޕޮޅަށް ބަންކަރިން | ގަތަރުގެ ބޮޑު ކުންފުންޏާއެކު ސޮއި އަޅައިފި

ކުރިން ފަށަން އުޅުނު އައިހެވަން މަޝްރޫއާ އެއްގޮތް 

މިފަހަރު އިހަވަންދިއްޕޮޅުގައި މި މަސައްކަތް ފެށިދާނެ ހެއްޔެވެ؟ އެކަން ކުރަން ފުރުސަތު ލިބޭނެ ހެއްޔެވެ؟ މި ހުރިހާ ސުވާލެއް ކުރިމަތީގައި އޮއްވައި ދުނިޔޭގެ އެންމެ ގިނަ އާގު ބޯޓުތައް ހުރަސްކުރާ މަގު ކަމަށްވާ އިހަވަންދިއްޕޮޅުގައި ބަންކަރިން ފަށަން ގަތަރުގެ އެންމެ ބޮޑު އެއް ކުންފުންޏާއެކު އެސްޓީއޯ އިން މިވަނީ ސޮއި އަޅާފަ އެވެ. 

ކުރުނބާ މޯލްޑިވްސްގައި ރޭ ބޭއްވި ރަސްމިއްޔާތެއްގައި ރާއްޖެއަށް ތެޔޮ އެކްސްޕޯޓު ކުރާ އެސްޓީއޯގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަބްދުﷲ ސައީދު އެވެ. އިކޮނޮމިކް މިނިސްޓަރު ފައްޔާޒު އިސްމާއިލް ވެސް ބައިވެރިވެޑައިގަތް ރަސްމިއްޔާތުގައި ސޮއިކުރީ އެއްބަސްވުމެއްގައެއް ނޫނެވެ. ސޮއިކުރީ އެއްބަސްވުމަކަށް އައުމުގެ ކުރީގައި ފުރިހަމަ ކުރަން ޖެހޭ ކަންކަން ކުރަން މެމޮރަންޑަމް އޮފް އަންޑަސްޓޭންޑިން (އެމްއޯޔޫ) އެއްގަ އެވެ. 

މި އެއްބަސްވުމުގައި ގަތަރުގެ އާބަކޮން ޓްރޭޑިން އެންޑް ކޮންޓްރެކްޓިން (ޔޫސީސީ) ގެ ގްރޫޕްގެ ފަރާތުން ސޮއިކުރެއްވީ ގްރޫޕް ސީއީއޯ މުހައްމަދު ސަބްރީ އެވެ. މި ރަސްމިއްޔާތުގައި އެ ގްރޫޕުގެ ސީއީއޯ ރަމީޒް އަލް ހަޔާތުވެސް ބައިވެރިވަޑައިގަތެވެ.
 
ޔޫސީސީ ގްރޫޕްއަކީ ރާއްޖޭގެ ވޮލްޑޯފް އެސްޓޯރިއާ އިތާފުށި މޯލްޑިވްސް އާއި ގަތަރުގެ ބަނާނާ އައިލެންޑް އަދި މިނޫން ވެސް އެ ގައުމުގެ ބޮޑެތި ބިޔަ ގިނަ މަޝްރޫއު ތަކެއް ހިންގި ކުންފުނިތަކުގެ މައި ކުންފުންޏެވެ. 

މި އެއްބަސްވުމާ ބެހޭ ގޮތުން ވާހަކަ ދައްކަވަމުން އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވި ގޮތުގައި އިހަވަންދިއްޕޮޅުގައި ޓްރާންސްޝިޕްމަންޓް ބަނދަރެއް ހަދަން ލަސްވިނަމަވެސް މިހާރު ފެށިގެންދާ މަސައްކަތްތަކާއެކު ސްޓްރެޓިޖިކަލީ ލަނޑުދަނޑިތަކެއް ހާސިލް ކުރަން ފެށި މަސައްކަތުގެ ނަތީޖާ އެވެ.

"އަބަދު ވެސް ރާއްޖެ އޮތް ސަރަހައްދުގެ ފައިދާ ނެގުމުގެ ވާހަކަ ދެކެވޭ. ކުޑައިރުވެސް ޓްރާންސްޝިޕްމަންޓް ޕޯޓެއްގެ ވާހަކަ އިވޭ. އެހެންނަމަވެސް ސަކްސަސިވް [ކާމިޔާބު] ސަރުކާރު ތަކުން އެއްވެސް އަމަލީ ސިފައެއް މިހާތަނަށް ނުފެނޭ. އަޅުގަނޑުމެން ޓޫރިޒަމަށް ބަރޯސާވާ މިންވަރު ކުޑަ ކުރަން ބެލިބެލުމުގައި އެކިއެކި ސްޓަޑީތަކުން ދައްކާފަ އޮތީ މާ ފީޒިބަލްކަމެއް ނޫން ކަމަށް މި އިންވެސްޓްމަންޓް ކުރުމަކީ. ފީޒިބަލް ނޫން ކަމަށް،" އިކޮނޮމިކް ކައުންސިލްގެ ކޯޗެއާގެ މަގާމުގައި ވެސް ހުންނެވި ފައްޔާޒު ވިދާޅުވި އެވެ. 

މިނިސްޓަރު ވިދާޅުވީ މިކަން މިގޮތަށް ދެއްކިނަމަވެސް މި މަސައްކަތް ކުރުމަށްޓަކައި ސަރުކާރުގެ ގިނަ ކުންފުނިތައް ގުޅިގެން ޖޮއިންޓް ވެންޗާ ކުންފުންޏެއް އުފައްދައި މަސައްކަތް ކުރަމުން ގެންދާ ކަމަށެވެ. 

"އަމާޒަކީ ފުރަތަމަ އެސްޓީއޯއާއެކު ހެދި އެމްއޯޔޫގެ ދަށުން ބަންކަރިންގެ ތެރޭން މަސައްކަތްތައް ފެށުން. މި އޮންނަ ސްޓެޓީޖިކް ލޮކޭޝަންއިން 250 ބޯޓު މި ސަރަހައްދު [އަށް ޑިގްރީ ޗެނަލް] އިން ދަތުރު ކުރޭ. އެތައް ޓްރިލިއަން ޑޮލަރެއްގެ މުދާ ކޮންމެ އަހަރަކު ދޭ. އަޅުގަނޑުމެންނަށް ލަސްވެއްޖެ މީގެ ފައިދާ ނަގަން. މިހާރު ބޮޑެތި ކޮމްޕެޓިޝަން ތަކެއް މިވަނީ އައިސްފަ. ކޮލަމްބޯގައި ދެ ޕޯޓެއް ހެދިގެން ގޮސްފި އިންޑިއާގަ ޕޯޓެއް އެބަ ހެދޭ. އެހެންނަމަވެސް ދިވެހިއްޖޭން ފަށައިފިނަމަ ބައިވަރު މަންފާ ތަކެއް އެބަހުރި އެހެންވެ ލަސްނުކޮށް މިކަން ފަށައިފި ގަންނަން،" ފައްޔާޒު ވިދާޅުވި އެވެ. 

މި ރަސްމިއްޔާތުގައި މެދުއިރުމައްޗާއި ދުނިޔޭގައި ވެސް އެންމެ މަތީ ގްރޭޑް އެކެއްގެ ލައިސަންސް ލިބިފައިވާ އެއް ކުންފުނި ކަމަށްވާ ޔޫސީސީގެ ގްރޫޕް ސީއީއޯ ރަމީޒް އަލް ހަޔާތު ވިދާޅުވި ގޮތުގައި މިއީ ގަތަރާއި ދިވެހި ސަރުކާރާ ދެމެދު އުފެދިފައިވާ ގުޅުން އިތުރަށް ވަރުގަދަ ވެގެންދާނެ ކަމެކެވެ. މިއީ ރައީސް އިބްރާހިމް މުހައްމަދު ސޯލިހުގެ ސަރުކާރުން ރާއްޖެއަށް ފޮރިން ޑައިރެކްޓް އިންވެސްޓްމަންޓް (އެފްޑީއައި) ގެންނަން ކުރައްވާ މަސައްކަތްތަކުގެ ހެއްކެއް ކަމަށެވެ. 

"ބަންކަރިން އަދި ތެޔޮ ސަޕްލައި ކުރުމުގެ މި މަޝްރޫއާއެކު ދިވެހިންނަށް ވަޒީފާގެ ފުރުސަތު ތަކެއް އުފެދިގެންދާނެ. މި ގުޅުމާއެކު ރާއްޖޭގެ އިތުރު އިންވެސްޓްމަންޓް ތަކަށް ވެސް މަގު ފަހި ވެގެންދާނެ. ޔޫސީސީ އިން ރާއްޖޭގެ ކުރިއަރަމުންދާ އިގްތިސޯދަށް ޝައުގުވެރިކަން އެބަހުރި،" ގްރޫޕް ސީއީއޯ ރަމީޒް އަލް ހަޔާތު ވިދާޅުވި އެވެ. 

ޔޫސީސީ ގްރޫޕަކީ ކޮން ބައެއް ؟  ގަތަރުގެ ޔޫސީސީ ގްރޫޕުން އެ ގައުމުގެ ފަސް ސިނާއަތެއްގައި ވިޔަފާރި ކުރެ އެވެ. ގަތަރުގެ ޝާހީ އާއިލާގެ މި ކުންފުނީގެ ވިޔަފާރި ފެށިގެން ގޮސްފައިވަނީ 1983 ވަނަ އަހަރު އެވެ. މިހާރު މި ކުންފުންޏާ ހަވާލު ވެގެން ތިބި އިސް ބޭފުޅުންނަކީ ގަތަރު ޝާހީ އާއިލާގެ ދެވަނަ ޖެނެރޭޝަންގެ ވެރިންނެވެ. މި ކުންފުނީގެ ތެރޭގައި ހިމެނޭ އެސްތިމާރު ހޯލްޑިން ދާދިފަހުން ވަނީ ރާއްޖޭގައި ފޮރިން ބޮޑު އިންވެސްޓްމަންޓެއް ކުރާނެކަން އިއުލާނުކޮށްފަ އެވެ. އަދި ރާއްޖޭގެ ވޮލްޑޯފް އެސްޓޯރިއާ ރިސޯޓް ހިންގަނީވެސް މި ގްރޫޕުގެ ކުންފުންޏަކުންނެވެ. މިއީ އެނާޖީ އާއި ހެލްތް ކެއާގެ ވިޔަފާރި އަދި ތެލާއި ގޭހުގައިވެސް ފުޅާކޮށް މެދުއިރުމައްޗާއި ދުނިޔޭގައި ވިޔަފާރި ކުރާ ކުންފުންޏެކެވެ. މި ކުންފުނީގެ ދަށުގައި 75 ކުންފުންޏެއް އޮވެ އެވެ. މި ކުންފުނީގެ 65،000 ގިނަ މުވައްޒަފުން ހިމެނެ އެވެ. މި ކުންފުނިން 1،100 ގިނަ މަޝްރޫއު ހިންގާފައިވެ އެވެ. ގަތަރުގެ މާކެޓުގެ 17 ޕަސެންޓަށްވުރެ ބޮޑު ބައެއް ހިއްސާ ކުރެ އެވެ. މި ގްރޫޕުން އެކި އުފެއްދުންތައް ދުނިޔޭގެ 12 ގައުމަކަށް އެކްސްޕޯޓް ކުރެ އެވެ. ޓޫރިޒަމް ދާއިރާގެ ހަތް ހޮޓަލާއި 19 ރެސްޓޯރެންޓެއް ހިންގަ އެވެ. އެމެރިކާ އާއި ކޮރެއާގައިވެސް ހޮސްޕިޓަލް ހިންގަ އެވެ.

އެސްޓީއޯގެ މެނޭޖިން ޑިރެކްޓަރު އަބްދުﷲ ސައީދު ވިދާޅުވި ގޮތުގައި މި މަޝްރޫއަކީ ހަމައެކަނި ތެލާއި ބަންކަރިންގެ މަޝްރޫއެއް ނޫނެވެ. މި މަސައްކަތާއެކު މި މަޝްރޫއާ ގުޅިގެން މި ސަރަހައްދުގައި އިގްތިސޯދީ ބޮޑު ސިޓީއެއް އުފެދިގެންދާނެ އެވެ. 

"މިތަނުގައި އިންޑަސްޓްރިއަލް، ކޮމާޝަލް އަދި ޓޫރިޒަމް ޒޯންތައް އުފެދޭނެ. މިއީ ބޮޑު ފުރުސަތެއް،" ސައީދު ވިދާޅުވި އެވެ. 

އޭނާ ވިދާޅުވީ މި މަޝްރޫއުގައި އެ ކުންފުނީގެ ދައުރަކީ ޕޯޓްސިޓީގައި ބަންކަރިން އަދި ތެޔޮ ސަޕްލައި ކުރުން ކަމަށާ މި އެއްބަސްވުމުގެ މަގުސަދަކީ މިއީ ކަމަށެވެ. 

"މި ސަރަހައްދުގައި ބަންކަރިން ވިޔަފާރި ފަށައި. ގައުމީ ތެލުގެ ރިޒާވެއް ގާއިމް ކުރެވިގެންދާނެ. މިއީ ރާއްޖެއަށް ބޭނުންވާ ހަކަތަ މުސްތަގުބަލަށް ރައްކާ ކުރަން އެޅިގެންދާނެ މުހިންމު ފިޔަވަޅެއް،" ސައީދު ވިދާޅުވި އެވެ.