ސުޕްރީމް ކޯޓުން ނާކާމިޔާބު، ޔާމީނަށް ވާދައެއް ނުކުރެއްވޭނެ

އަންނަ ސެޕްޓެމްބަރު މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބަށް ރައީސް އަބްދުﷲ ޔާމީން ކުރިމަތި ލައްވަން ހުށަހެޅުއްވި ކެންޑިޑެސީ ފޯމް އިލެކްޝަންސް ކޮމިޝަނުން ބަލައިނުގަތީ ރަގަޅަށް ކަމަށް ސުޕްރީމް ކޯޓުން މިއަދު ކަނޑައަޅައިފި އެވެ.

ޔާމީންގެ ކެނޑިޑެސީ ފޯމު އީސީއަށް ހުށަހެޅީ މިމަހުގެ އެއްވަނަ ދުވަހު އެވެ. ހަމަ އެ ދުވަހު އީސީން ވަނީ އެމަނިކުފާނުގެ ކެނޑިޑެސީ ފޯމު ބަލައި ނުގަންނަން ނިންމާފަ އެވެ. އެކަމާ ހިތްހަމަ ނުޖެހި، އެމަނިކުފާނުގެ ވަކީލުން ވަނީ ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފަ އެވެ.

އީސީ އިން ކެނޑިޑެސީ ބަލައިނުގަތީ ގާނޫނު އަސާސީގެ 109 ވަނަ މާއްދާގެ (ޅ) އަށް ހަވާލާދީ އެވެ. އެ މާއްދާގައި ބަޔާން ކުރަނީ ޖިނާއީ ކުށެއް ސާބިތުވެގެން 12 މަސްދުވަހަށްވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކުނަމަ، އެ ހުކުމް ތަންފީޒުކޮށް ނިމުނުތާ ނުވަތަ އެ ހުކުމް ކަނޑައެޅުނު އަދަބު މައާފުކުރެވުނުތާ ތިން އަހަރު ވެފައިވާ މީހަކަށްވުމެވެ.

އެ މާއްދާގައި "ހުކުމް"ގެ ގޮތުގައި މާނަކުރަނީ ނިހާއީ ހުކުމެއް ކަމަށާއި، ޔާމީންގެ މައްޗަށް ނިހާއީ ހުކުމެއް ނާންނަހާ ހިނދަކު އިންތިހާބުގައި ވާދަކުރެވޭނެ ކަމަށް ވަކާލާތުކުރެއްވި އެވެ. 

ކެންޑިޑެސީ ފޯމް ބަލައި ނުގަންނަން ނިންމި އަނެއް ސަބަބަކީ ޔާމީންގެ މައްޗަށް ސާބިތުވެފައިވާ ޖަލު ހުކުމާއެކު ދައުލަތަށް ދައްކަން ޖެހޭ ފަސް މިލިއަން ޑޮލަރު އެބަ އޮތުމުން ދަރަންޏެއް ސާބިތުވެފައިވާތީ އެވެ. ޔާމީންގެ ފަރާތްޕުޅުން ވިދާޅުވެފައި ވަނީ އެ ފައިސާ ދައްކާ ހަލާސްކުރަން ޖެހޭ މުއްދަތު އަދި ހަމަނުވާ ކަމަށެވެ. އަދި އެ މައްސަލަ އޮތީ އިސްތިއުނާފީ މަރުހަލާގައި ކަމަށާއި އެއީ ސާބިތުވެފައިވާ ދަރަންޏެއް ކަމަށް ނުބެލެވޭ ކަމަށެވެ.

ސުޕްރީމް ކޯޓުގެ ހަތް ފަނޑިޔާރުގެ ފުލް ބެންޗުގެ އިއްތިފާގުން މިއަދު ކުރި ހުކުމުގައި ބަޔާންކޮށްފައި ވަނީ ޔާމީންގެ މައްޗަށް ކޮށްފައިވާ ހުކުމުގައި، ފަސް މިލިއަން ޑޮލަރު ހަ މަސް ދުވަސް ތެރޭ ދައްކަން އަންގާފައިވާ ކަމަށެވެ. ހަމަސް ދުވަސް ހަމަވުމުން މީރާއިން ނޯޓިސް ފޮނިކަން އެނގޭ ކަމަށާއި، އެ ނޯޓިސް ޔާމީންގެ ގާނޫނީ ވަކީލުންނަށް ހަވާލުކޮށްދިނުމަށް އެދި އެމަނިކުފާނުގެ އިނގިލީގެ ނިޝާން ޖައްސަވައި ސޮއިކުރައްވާފައިވާ ކަމަށް ކަރެކްޝަންސްގެ ރެކޯޑުތަކުން ދައްކާ ކަމަށެވެ. 

އެ މުއްދަތުގައި ޖޫރިމަނާގެ ފައިސާ ނުދައްކާ އޮތުމުން އެ ޖޫރިމަނާ ސާބިތު ދަރަންޏަކަށް ބަދަލުވެފައިވާ ކަމަށް ހުކުމުގައި ބަޔާންކޮށްފައިވެ އެވެ.

"ޖިނާއީ އުގޫބާތެއްގެ ގޮތުގަ ދައްކަން ޖެހޭ ފައިސާއާ މެދު މަތީ މަރުހަލާގެ ކޯޓަކުން ވަކި ގޮތަކަށް އަންގާފައި ނުވާ ހާލަތެއްގައި، ކޯޓުން ކަނޑައަޅާފައިވާ ގޮތަށް އެ ޖޫރިމަނާގެ ފައިސާ ދައްކާ ހަލާސް ނުކުރުމުގެ ނަތީޖާ އަކީ އެ ޖޫރިމަނާއަކީ ސާބިތު ދަރަންޏަކަށް ބަދަލުވެގެން ދިއުން،" ފަނޑިޔާރު ހުސްނުއްސުއޫދު ވިދާޅުވި އެވެ.

ގާނޫނު އަސާސީގެ 109 ވަނަ މާއްދާގެ (ޅ) އާއި ގުޅިގެން ޔާމީންގެ ފަރާތްޕުޅުން ހުށަހެޅުއްވި ނުކުތާގައި، "ނިހާއީ ހުކުމް" ގެ ގޮތުގައި މާނަ ނުކުރެވޭނެ ކަމަށް ވެސް ހުކުމުގައި ކަނޑައަޅާފައިވެ އެވެ. 

އެގޮތުން ރައްޔިތުންގެ މަޖިލީހުގެ ހާއްސަ ކޮމެޓީން އެ މާއްދާ ފާސްކުރުމުގެ ނިޔަތަކީ ޖަލު ހުކުމެއް ތަންފީޒު ކުރާ މީހުން ޑިސްކޮލިފައިކޮށްލުން ކަމަށެވެ. އަދި އެ މަޖިލީހުގެ ވިސްނުމަކީ ދައުލަތުގެ މަގާމުތައް އަދާ ކުރާ މީހުންނަކީ ނަޒާހާތްތެރި އަދި އަބުރު ގެއްލިފައި ނުވާ މީހުންކަމުގައި ވުމަށް ކަމަށެވެ.

"އެފަދަ އިސްތިސްނާއެއް ގާނޫނު އަސާސީގެ 109 ވަނަ މާއްދާގެ (ޅ)ގައި ހިމަނާފައި ނުވަނީ މަގާމުތަކަށް ކުރިމަތިލާ ޝަރުތު ހަމަނުވުމުން ނިހާއީ ހުކުމެއް ބޭނުން ނުވާތީ ނޫން ކަމަށާއި، އެމީހަކީ ޖަލު ހުކުމެއްގެ މަތީގައި ހުރި މީހެއް ކަމަށްވާނަމަ އެމީހަކު ޑިސްކޮލިފައި ކުރުން އެއީ އެމަޖިލީހުގެ މެމްބަރުންގެ ނިޔަތް ކަމުގައި ވާތީ ކަމުގަ އަހުރެން ދެކެން،" ފަނޑިޔާރު ހުސްނުއްސުއޫދު ވިދާޅުވި އެވެ.

އެހެންކަމުން، ޔާމީންގެ ކެންޑިޑެސީ ބަލައިނުގަންނަން އިލެކްޝަންސް ކޮމިޝަނުން ނިންމާފައި ވަނީ ރަގަޅަށް ކަމަށް ހުކުމްކޮށްފައިވެ އެވެ. ފަނޑިޔާރު ހުސްނުއްސުއޫދުގެ ރައުޔަށް ހުރިހާ ފަނޑިޔާރުން ވަނީ ތާއީދުކޮށްފަ އެވެ.

މި މައްސަލަ ކޯޓްގައި ބެއްލެވީ ހަތް ފަނޑިޔާރުންގެ ފުލް ބެންޗުންނެވެ. އެއީ އުއްތަމަފަނޑިޔާރު އަހްމަދު މުއުތަސިމް އަދުނާން އާއި ފަނޑިޔާރު ހުސްނުއްސުއޫދު އާއި ފަނޑިޔާރު ޑރ. އަޒްމިރަލްދާ ޒާހިރު އާއި ފަނޑިޔާރު އައިޝަތު ޝުޖޫން އާއި ފަނޑިޔާރު އަލީ ރަޝީދު ހުސައިން އަދި ފަނޑިޔާރު މުހައްމަދު އިބްރާހިމެވެ. ރިޔާސަތުގައި އިންނަވަނީ އުއްތަމަފަނޑިޔާރު އަހްމަދު މުއުތަސިމް އަދުނާނެވެ.

މި ހުކުމާއެކު ކުރިއަށް އޮތް ރިޔާސީ އިންތިހާބުގައި ޔާމީނަށް ވާދަކުރެވޭނެ ހުރިހާ ދޮރެއް ވަނީ ބަންދުވީ އެވެ. ޔާމީނަށް ވާދަނުކުރެވޭ ހާލަތެއްގައި ޕީޕީއެމް އިން އިތުރު ކެންޑިޑޭޓަކު ނެރޭނެ ކަމުގެ އިޝާރާތެއް އެޕާޓީން ވަނީ ދީފަ އެވެ. އެޕާޓީގެ ސިސްޓާ ޕާޓީ ކަމަށްވާ ޕީއެންސީ އިން ޑރ. މުހައްމަދު މުއިއްޒަށް ރިޔާސީ ޓިކެޓް ދީފައިވީ ނަމަވެސް، އޭނާ އަކީ "ޕްލޭން ސީ" ކަމަށް ޕީޕީއެމް އިން ބުނެ އެވެ. "ޕްލޭން ބީ" އަކީ ކޮބައިކަން އަދި ހާމައެއް ނުކުރެ އެވެ.