ފަސް ދުވަސްތެރޭ އުމަރު 2000 ސޮއި ހޯއްދަވައިފި

ކުރިއަށް އޮތް ރިޔާސީ އިންތިހާބުގައި އަމިއްލަ ގޮތުން ވާދަކުރަން ނިންމާފައިވާ ކުރީގެ ހޯމް މިނިސްޓަރު އުމަރު ނަސީރު އިންތިހާބުގައި ވާދަކުރަން ހުށައަޅަން ޖެހޭ އަދަދަށް ސޮއި ހޯއްދަވައިފި އެވެ.

އިންތިހާބުގައި އަމިއްލަ ގޮތުން ވާދަކުރައްވާނަމަ 1،500 ސޮއި ހުށައަޅަން ޖެހެއެވެ. އެގޮތަށް ހުށައަޅާ ސޮއި ސައްހަތޯ ކޮމިޝަނުން ޔަގީން ކުރާނެ އެވެ. ކޮމިޝަނުން ބަލައިގަންނާނީ ސައްހަ 1،500 ސޮއި ކަމުން އެ އަދަދު ހަަމަނުވާނަމަ ކެންޑިޑެސީ ބަލައިނުގަންނަނާނެ އެވެ.

އުމަރު މިއަދު ވިދާޅުވީ އިންތިހާބަށް ހުޅުވާލުމާއެކު ސޮއި ހޯދުމުގެ މަސައްކަތް އުމަރުގެ ކެމްޕެއިން ވޮލަންޓިއަރުން ފަށާފައިވާ ކަމަށެވެ. އަދި ފަސް ދުވަސްތެރޭ 2،000 ސޮއި ހޯދާފައިވާ ކަމަށެވެ.

"އިރާދަކުރެއްވިއްޔާ މި ކެންޕެއިން އަޅުގަނޑުމެން ކާމިޔާބު ކުރާނަން. ވަރަށް ގިނަ ބަޔަކު އަޅުގަނޑުމެންގެ މި ހުދުވަލުގައި ހިފައި. މިއީ މި ގައުމުގެ ރައީސުލްޖުމްހޫރިއްޔާ ބަދަލު ކުުރުމުގެ ކެންޕެއިނެއް ނޫން. މިއީ މި ގައުމުގެ މިސްރާބު ބަދަލު ކުރުމަށް ކުރާ މަަސައްކަތެއް، ކެމްޕެއިނެއް،" އުމަރު ވިދާޅުވި އެވެ.

އިލެކްޝަންސް ކޮމިޝަންގެ ރައީސް ފުއާދު ތައުފީގު ވަނީ އަމިއްލަ ގޮތުން ވާދަކުރާ ކެންޑިޑޭޓުން 1،500 ވުރެ އިތުރަށް ސޮއި ހުށައެޅުން މުހިންމު ކަމަށް ވިދާޅުވެފައެވެ. އެއީ ސައްހަ ނޫން ސޮއެއް ހިމެނިފައި އޮވެދާނެތީ އެވެ.