ފޯކަައިދޫއަށް އުފާވެރި ދުވަހެއް: ހަތަރު މަޝްރޫއުއެއް އިފްތިތާހު ކޮށްފި

ށ. ފޯކައިދޫގައި ސަރުކާރުން ހިންގި ހަތަރު މަޝްރޫއުއެއް ނިންމާ މިއަދު ރަސްމީކޮށް އިފްތިތާހު ކޮށްފި އެވެ.

އެ މަޝްރޫއުތައް މިއަދު އިފްތިތާހު ކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ. ށ އަތޮޅުގެ ބައެއް ރަށްތަކަށް ފެއްޓެވި ދަތުރުފުޅުގައި ރައީސް ސޯލިހް ވަނީ ފޯކައިދޫއަށް ވަޑައިގެން އެ ރަށުގެ ފެނާއި ނަރުދަމާގެ ނިޒާމު އިފްތިތާހު ކޮށްދެއްވާފައެވެ.

މީގެ އިތުރުން އެ ރަށުގެ ބަނދަރު ވެެސް ހުޅުވައިދެއްވި އެވެ. އަދި ސިއްހީ މަރުކަޒުގެ އައު އިމާރާތާއި އެ ރަށުގައި ޓާފް އަޅާ ރަނގަޅު ފެންވަރަކަށް ތަރައްގީ ކޮށްފައި އޮތް ފުޓްބޯޅަ ދަނޑުވެސް ރައީސް ވަނީ ހުޅުވައި ދެއްވާފައެވެ.

ފުޓްބޯޅަ ދަނޑު ހުޅުވައިދެއްވުމުގައި ރައީސްގެ އިތުރުން އެ ރަށަށް ވަޑައިގެންނެވި ސިޔާސީ ޕާޓީތަކުގެ ލީޑަރުންނާއި ސަރުކާރުގެ އިސްވެރީން އަދި މަޖިލީސް މެންބަރުން ބައިވެރިވެވަޑައިގެންނެވި އެވެ.

ރިޔާސީ އިންތިހާބުގެ ކެމްޕޭނު ރަސްމީކޮށް ފެއްޓެވުމަށް ރައީސް އިބްރާހިމް މުހައްމަދު ސޯލިހް ށ އަތޮޅަށް ކުރައްވާ ދަތުރުފުޅުގައި ހަތަރު ރަށަކަށް ވަނީ ވަޑައިގެންފައެވެ.

އެއީ އެ އަތޮޅު ކޮމަންޑޫ އާއި މަރޮއްޓާއި ނޫމަރާ އަދި ފޯކައިދޫ އަށެވެ. މިރޭ ފޯކައިދޫގައި ރައީސްގެ ކެމްޕެއިން ޖަލްސާ އޮންނާނެ އެވެ.

މި ދަތުރުފުޅުގައި ރައީސްއާއެކު ކޯލިޝަން ލީޑަރުން ވެސް ވަނީ ބައިވެރިވެވަޑައިގެންފަ އެވެ. އެގޮތުން އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ އާއި އެމްޑީއޭގެ ލީޑަރު އަހުމަދު ސިޔާމް ވަނީ ބައިވެރިވަޑައިގެންފަ އެވެ.

އަދި ޑިފެންސް މިނިސްޓަރު މާރިޔާ އަހުމަދު ދީދީ އާއި ފޮރިން މިނިސްޓަރު އަބްދުﷲ ޝާހިދާއި އެމްޑީޕީގެ އިސްވެރިން ވެސް ވަނީ ބައިވެރިވެވަޑައިގެންފަ އެވެ.

ރައީސް ވަޑައިގެންނެވި ހުރިހާ ރަށަކުން ވެސް އެމަނިކުފާނަށް ވަނީ ހޫނު މަރުހަބާއެއް ކިޔާފައެވެ.

ރައީސް ސޯލިހްގެ ކެމްޕެއިން ފެއްޓެވިއިރު އެމްޑީޕީގެ އެކި ޓީމުތަކުން މިހާރު ވެސް ވަނީ އެމަނިކުފާނަށް ކެމްޕޭނު ކުރަން ފަށާފަ އެވެ. އެގޮތުން ދޮރުން ދޮރަށް ހިނގުމާއި، ކެމްޕޭނު ޓީމުތަކާ އެމްޑީޕީގެ އިސްވެރިން ދަނީ ބައްދަލުކުރަމުންނެވެ.

ރައީސް އިއްޔެ ވަނީ ކެމްޕޭނަށް ހާއްސަ މޯޓިވޭޝަނަލް ސެޝަނާއި އެމްޑީޕީގެ ގައުމީ މަޖިލީީހުގެ މެނިފެސްޓޯ ޑިސްކަޝަންގައި ބައިވެރިވެވަޑައިގެންފައިވެ އެވެ.