"ކޮވިޑް މެނޭޖްކުރީ ޑޮކްޓަރުން، ރައީސަށް ވާނުވާވެސް ނޭންގޭ"
"ކޮވިޑްގެ ދުވަސްވަރު ދިވެހިރާއްޖޭގެ ރައީސުލްޖުމްހޫރިއްޔާކަން ކުރީ އިބްރާހިމް މުހައްމަދު ސޯލިހެއް ނޫނޭ. ދިވެހިރާއްޖޭގެ ރައީސުލްޖުމްހޫރިއްޔާކަން ކުރެއްވީ މަދު ޑޮކްޓަރުން ކޮޅެއް. ރައީސުލްޖުމްހޫރިއްޔާ އަކާ ބެހޭ ކަމެއް ނޫން"
މިވަރުގެ ބަލިކަށި ސަރުކާރެއް ދިވެހި ތާރީހު ދެކެފައިނުވާ ކަމަށާ މި ނޫނީ ގައުމުގެ ކަންކަމުގައި "ވާނުވާ" ނޭންގޭ ރައީސެއް ހުރި ދުވަސްވަރެއް ނެތް ކަމަށް ކެންދޫ ދާއިރާގެ ޖުމްހޫރީ ޕާޓީގެ މެންބަރު އަލީ ހުސައިން ވިދާޅުވެއްޖެ އެވެ.
އަލީ ހުސައިން މިހެން ވިދާޅުވީ ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމްގެ ކެމްޕެއިން އިވެންޓެއްގައި ރޭ ވާހަކަ ދައްކަވަމުންނެވެ.
އަލީ ހުސައިން ވިދާޅުވި ގޮތުގައި ރާއްޖޭގެ މިނިވަން ކަން މިހާރު އޮތީ ގެއްލުމުގެ މަގުމަތީ ގައެވެ. ދިވެހީންގެ މިނިވަންކަމާއި ސިދާޔަތު ބައެއްގެ އަތްމައްޗަށް ވަނީ ދޫކޮށްލާފައެވެ. މިއީ މިހާތަނަށް ރާއްޖެ ދުށް އެންމެ ބަލިކަށި ސަރުކާރު ކަމަށްވެސް ވިދާޅުވި އެވެ.
"މިވަރުގެ ބަލިކަށި ސަރުކާރެއް މިވަރުގެ ވާނުވާ ނޭންގޭ ސަރުކާރެއް ދިވެހި ތާރީހު ހަގީގަތުގައި ވެސް ދެކެފައެއް ނުވޭ،"
އަލީ ވިދާޅުވީ ދިވެހީން މިނިވަންކަން ދިފާއު ކުރީ ބައެއްގެ ކުރިމަތީ ކުޑަކަކޫ ޖަހައިގެން ނޫނެވެ. ދިވެހީން މިނިވަން ކަން ދެމެހެއްޓީ ގައުމަށް ލިބުނު އެއްޗެއް ވިއްކައިގެން ކަމަށާ މިއަދު މިނިވަންކަން ދޫކޮށްލާ ހިސާބަށް ކަންކަން ގެންގޮސްފައި ވަނީ ސަރުކާރުގެ ދޯހަޅިކަމާއި ބަލިކަށި ކަމުން ކަމަށެވެ.
ރައީސް ސޯލިހަކީ ވަރަށް ހިންގުންތެރި ވެރިއެއް ކަމަށް ބުނާތީ އެކަމަށް އަލީ ހުސައިން ވަރުގަދަ ރައްދެއް ދެއްވި އެވެ. ކޮވިޑްގެ ބަލިމަޑުގައި ރާއްޖެ މެނޭޖްކުރީ ރައީސް ސޯލިހް ކަމަށް ބުނާތީ އެކަމަށް ރައްދު ދެއްވާ އަލީ ވިދާޅުވީ ރައީސް ސޯލިހަށް ވާނުވާވެސް އެނގިވަޑައިނުގަންނަވާ ކަމަށެވެ.
"ދަންނަވަންތޯ! ކޮވިޑްގެ ދުވަސްވަރު ދިވެހިރާއްޖޭގެ ރައީސުލްޖުމްހޫރިއްޔާކަން ކުރީ އިބްރާހިމް މުހައްމަދު ސޯލިހެއް ނޫނޭ. ދިވެހިރާއްޖޭގެ ރައީސުލްޖުމްހޫރިއްޔާކަން ކުރެއްވީ މަދު ޑޮކްޓަރުން ކޮޅެއް. ރައީސުލްޖުމްހޫރިއްޔާއަކާ ބެހޭ ކަމެއް ނޫން. ރައީސުލްޖުމްހޫރިއްޔާއަށް ހަގީގަތުގައި ވާކަމެއް ވެސް ނޫން،"
ދެން ފާހަގަ ކުރެއްވީ ރާއްޖޭގެ ހާރިޖީ ސިޔާސަތުގައި ކަނޑައެޅުމުގައި ރައީސް ސޯލިހްގެ ދައުރެއް ނެތުމެވެ. އަލީ ވިދާޅުވި ގޮތުގައި ސަރުކާރުގެ އިސްވެރިއަކީ އެކި ހާލަތްތަކުގައި އެކި ބޭފުޅުންނެވެ. ހާރިޖީ ސިޔާސަތު ކަނޑައަޅަން ޖެހުމުން ރައީސުލްޖުމްހޫރިއްޔާއަކީ އަބްދުﷲ ޝާހިދު ކަމަށާ ފެނަކައިގެ ކަންކަމާ ޖެހުމުން ވެރިމީހާއަކީ އެހެން ބޭފުޅެއް ކަމަށެވެ. އަދި އިގްތިސާދީ ކަމަަކާ ޖެހުމުން ރައީސް ސޯލިހަށް "ވާނުވާ" ވެސް އެނގިވަޑައިނުގަންނަވާ ކަމަށް ވިދާޅުވެ ފާޑު ވިދާޅުވި އެވެ.
"ހާރިޖީ ސިޔާސަތުގައި ކަނޑައެޅުއްވުމުގައި ރައީސުލްޖުމްހޫރިއްޔާގެ އެއްވެސް ދައުރެއް ނެތް. ހާރިޖީ ވަޒީރު [އަބްދުﷲ ޝާހިދު] ބޯޓް ދަތުރުކުރަން ފޮނުވައިގެން އެއް އަހަރު ހުންނެވި. ހާރިޖީ ވަޒީރު ނިންމަވަނީ މި ގައުމުގެ ގުޅުން ގާއިމުކުރާނީ ކޮން ގައުމަކާތޯ. އިރާނާ އަލުން ގުޅުން ގާއިމު ކުރެއްވި ކަމުގެ ޓްވީޓް ކުރައްވަނީ ކޮން ބޭފުޅެއްތޯ. ހާރިޖީ ވަޒީރު. ރައީސުލްޖުމްހޫރިއްޔާއަކާ ބެހޭ ކަމެއްވެސް ނޫން. ރައީސުލްޖުމްހޫރިއްޔާ ނުވެސް ދެނަހުރި،" އަލީ ހުސައިން ވިދާޅުވި އެވެ.
ކޮމެންޓް
Republic of Maldives