ކޮމެޓީތަކަށް ގެންނާނެ ބަދަލާ ގުޅޭ މަޝްވަރާއަށް މަޖިލީސް މެދުކަނޑާލައިފި

ރައްޔިތުންގެ މަޖިލީހުގެ ދާއިމީ ކޮމެޓީތަކަށް ބަދަލު ގެންނާނެ ގޮތްތަކާ ގުޅޭ ގޮތުން މެމްބަރުންގެ މެދުގައި މަޝްވަރާ ކުރަން މަޖިލީހުގެ މިއަދުގެ ޖަލްސާ މެދުކަނޑާލައިފި އެވެ.

މިއަދުގެ ޖަލްސާގެ އެޖެންޑާގައި މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ އެޖެންޑާކޮށްފައެއް ނުވެ އެވެ. އޭގެ ބަދަލުގައި އެޖެންޑާކޮށްފައި ވަނީ ދާއިމީ ކޮމެޓީތަކުގައި ހިމެނޭ ސިޔާސީ ޕާޓީތަކަށް ނިސްބަތްވާ މެމްބަރުންނާއި ވަކި ޕާޓީއަކަށް ނިސްބަތް ނުވާ މެމްބަރުން ތަމްސީލު ކުރާނެ ގޮތަށް ގެންނަ ބަދަލާ ގުޅޭ މައްސަލަ އެވެ.

ޖަލްސާ ފަށަމުން އަމީން އާންމު ފާތިމަތު ނިއުޝާ ވަނީ ރިޔާސަތު ބަލަހައްޓަން ވިލުފުށީ ދާއިރާގެ މެމްބަރު ހަސަން އަފީފާ ހަވާލު ކުރައްވާފަ އެވެ. ޖަލްސާ ފެށީއްސުރެ މެދުކަނޑާލަންދެން މެމްބަރުން ދިޔައީ ޒުވާބުކޮށް، އަޑުގަދަ ކުރަމުންނެވެ.

މިއަދުގެ ޖަލްސާއަށް މަޑުއްވަރީ ދާއިރާގެ މެމްބަރު އާދަމް ޝަރީފް ކުއްލި މައްސަލައެއް ވެސް ވެއްދި އެވެ. އެކަމަކު އެ މައްސަލަ ހުށަނޭޅުނީ މެމްބަރުން އަޑު ގަދަކޮށް، ނިޒާމީ ނުކުތާތައް ނަގަމުން ދާތީ އެވެ.

އެންމެ ފުރަތަމަ އަޑުގަދަ ކުރަން ފެށީ ނައިފަރު ދާއިރާގެ މެމްބަރު އަހުމަދު ޝިޔާމެވެ. ޝިޔާމް ހަޅޭއްލަވަމުން ދިޔައީ ރާއްޖޭގެ ކޯޓުތައް އިސްލާހު ކުރަން ގޮވައިލަމުންނެވެ. އެހާ ހިސާބުން އެއް މެމްބަރަކު އަނެއް މެމްބަރަކަށް ރައްދު ދެއްވަމުން ބޮޑު ޒުވާބަކަށް ވަނީ ބަދަލުވެފަ އެވެ.

ދާއިމީ ކޮމެޓީތަކާ ބެހޭ މައްސަލައިގައި މަޝްވަރާ ކުރަން ނިޒާމީ ނުކުތާއެއް ނަންގަވާ ހުށަހެޅީ ކުޑަހުވަދޫ ދާއިރާގެ މެމްބަރު އަހުމަދު އާމިރެވެ. އޭނާ ހުށަހަޅާފައި ވަނީ އަޑުގަދަ ކުރަމުންދާތީ، އެ މައްސަލައާ ގުޅިގެން މަޝްވަރާ ކުރުމަށް ފަހު މަޖިލީސް ކުރިއަށް ގެންދިއުމަށެވެ.

އާމިރުގެ ނިޒާމީ ނުކުތާ ބަލައިގަނެ އަފީފް ވަނީ ޖަލްސާ މެދުކަނޑާލައްވާފަ އެވެ. މަޖިލީސް ދެން ފަށާނީ މަޝްވަރާއަށް ފަހުގައި ކަމަށް ވަނީ އިއުލާނު ކުރައްވާފަ އެވެ.

މަޖިލީހަށް މިހާރު ވައްދާފައިވާ އިވާ އާއި ރައީސް މުހައްމަދު ނަޝީދު ރިޔާސަތުން ވަކިކުރުމުގެ މައްސަލަ ކުރިއަށް ގެންދެވޭނީ ކޮމެޓީތައް އެކުލަވާލެވި، އާންމު ކޮމެޓީއިން އެ މައްސަލަތައް ގެންދާނެ ގޮތެއް ކަނޑައަޅައިގެންނެވެ. އެ މައްސަލައިގައި ގޮތެއް ނުނިމެނީސް ރިޔާސަތާ ހަވާލުވާން ނަޝީދު ވަނީ ދެކޮޅު ހައްދަވާފަ އެވެ.