ގައުމު އޮތީ ނުރައްކާތެރި ފައްތަރެއްގައި: އަލީ ހުސައިން

ރާއްޖޭގައި ތިބި އިންޑިއާ ސިފައިންގެ އަދަދު ހާމަކޮށްފިނަމަ ފައިސާ ދީފައި ގަންނަ ކާޑުގެ ބާވަތްތައް ރާއްޖެއަށް ލިބުމުގައި  ދަތިތަކެއް ކުރިމަތިވާ ނަމަ ގައުމު މި އޮތީ ވަރަށް ނުރައްކާތެރި ފައްތަރެއްގެ މަތީގައިކަން ހާމަވާ ކަމަށް ކެންދޫ ދާއިރާގެ ޖުމްހޫރީ ޕާޓީގެ މެންބަރު އަލީ ހުސައިން ވިދާޅުވެއްޖެ އެވެ.

އަލީ މިހެން ވިދާޅުވީ ރާއްޖޭގައި ތިބި އިންޑިއާ ސިފައިންގެ އަދަދު ހާމަކޮށްފިނަމަ ކާޑުގެ ބާވަތްތައް ލިބުމުގައި ދަތިވެދާނެ ކަމަށް އިންފޮމޭޝަން ކޮމިޝަނަރުގެ އޮފީހުން ހައިކޯޓްގައި މިއަދު ބުނުމާއި ގުޅިގެންނެވެ.

އަލީ ވިދާޅުވި ގޮތުގައި ދިވެހީން ކާޑު ގަންނަނީ ފައިސާ ދީގެންނެވެ. އެހެން ކަމަށްވީއިރު ރާއްޖޭގައި ތިބި އިންޑިއާ ސިފައިންގެ އަދަދު ހާމަކޮށްގެން ކާޑުގެ ބާވަތްތައް ރާއްޖެއަށް ލިބުމުގައި ދަތިތަކެއް ކުރިމަތިވާ ނަމަ ގައުމު މި އޮތީ ވަރަށް ނުރައްކާތެރި ފައްތަރެއްގެ މަތީގައެވެ.

ރާއްޖޭގައި ތިބި އިންޑިއާ ސިފައިންގެ އަދަދު ހާމަކުރަން ޑިފެންސް މިނިސްޓްރީން ދެކޮޅު ހަދާ މައްސަލައާ ގުޅިގެން މިއަދު ހައިކޯޓްގައި އޮތް އަޑުއެހުމުގައި އައިކޮމް އިން ހުށައެޅި ޖަވާބުގައި ބުނެފައި ވަނީ ރާއްޖޭގައި ތިބި އިންޑިއާ ސިފައިންގެ އަދަދު ހާމަކުރުމަކީ ގައުމީ ސަލާމަތަށް އޮތް ނުރައްކަލެއް ކަމަށެވެ. އެހެން ކަމުން އެ މައުލޫމާތު ހާމަ ކުރަން ނުޖެހޭ ކަަމަށެވެ. އަދި އިންޑިއާ ސިފައިންގެ އަދަދު ހާމަވެއްޖެނަމަ އިތުރަށް ލިބިދާނެ ގެއްލުންތައް ވެސް ތަފްސީލު ކޮށްފައިވެއެވެ.

އެންމެ މުހިންމު އެއް ކަމަކަށް ފާހަގަކުރީ ރާއްޖެއަކީ ކާޑާއި ބޭސް ފަދަ އަސާސީ ތަކެތިވެސް ބޭރުން އެތެރެކުރާ ގައުމަށްވާ ކަމެެވެ. އެފަދަ ގިނަ ތަކެތި އެތެރެކުރަނީ އިންޑިއާއިން ކަަމަށް ވީއިރު ރާއްޖޭގައި ތިބި އިންޑިއާ ސިފައިންގެ އަދަދު ހާމަކޮށްފިނަމަ ކާޑުގެ ބާވަތްތައް ލިބުމުގަިއ ދަތިވެދާނެ ކަމަށެވެ. އަދި އިންޑިއާ ސިފައިންގެ ނަންބަރު ހާމަވުމަކީ އެހެން ގައުމުތަކުން ވެސް އެ އަދަދަށް ރާއްޖޭގައި ސިފައިން ބައިތިއްބަން މަސައްކަތް ކޮށްފާނެ ކަމެއް ކަމަށެވެ.

އަދި ބޭރުގެ ހަމަލާއެއް ދޭނަމަ އެންމެ ފުރަތަމަ ބަލާނީ އެ ގައުމެއްގައި ތިބި ސިފައިންގެ ނިސްބަތަށް ކަމުން އެފަދަ މައުލޫމާތެއް ހާމަކުރުމަކީ ގައުމު ހަލާކުގެ ތެރެއަށް ވައްޓާލުން ކަމަށެވެ.

މި މައްސަލަގެ ތެރެއަށް ޑިފެންސް މިނިސްޓްރީ ވަނީ ތަދައްހުލުވެފައެވެ. އަދިބަންޑާރަނައިބުގެ އޮފީހުގެ ވަކީލުންވެސް ބައިވެރިވެވަޑައިގަންނަވައެވެ.

މި ސަރުކާރުން ފުރަތަމަ ބުނަމުން އައީ ރާއްޖޭގައި އިންޑިއާ ސިފައިން ނެތް ކަމަށެވެ. ތިބީ އިންސާނީ ހިދުމަތަށް އައިސް ތިބި ބައެއް ކަމަށެވެ. ނަމަވެސް މަދު އަދަދަކަށް އިންޑިއާ ސިފައިން ތިބި ކަަމަށް ފަހުން އެއްބަސްވި އެވެ.

ރާއްޖޭގައި އިންޑިއާގެ ނުފޫޒު ގަދަވެ އެ ގައުމުން ކޮންޓްރޯލް ކުރާ ގައުމަކަށް ރާއްޖެ ބަދަލުވެފައިވާ ކަމަށް އިދިކޮޅުން ތުހުމަތު ކުރެއެވެ.

ރާއްޖޭގައި ތިބ އިންޑިއާ ސިފައިން ބޭލުމަށް ގޮވާލާ އިދިކޮޅު ލީޑަރު އަބްދުﷲ ޔާމީން އިސްވެ "އިންޑިއާ އައުޓް" ނަމުގައި ބޮޑު ކެމްޕެއިނެއް ވަރަށް ފުޅާކޮށް ހިންގެވި އެވެ. ފަހުން އެ ކެމްޕެއިން މަޑުޖެހުނީ އެވެ. ރައީސް ސޯލިހް ވަނީ "އިންޑިއާ އައުޓް" ހަރަކާތަކީ ގައުމީ ސަލާމަަތަށް ނުރައްކާ ހަރަކާތެއް ކަމަށް ކަނޑައަޅާ ގަރާރެއް ވެސް ނެރުއްވާފައެވެ.