ކޮލަމް އައްޑޫ ވާހަކަ: ބަރުލަމާނީ ނިޒާމަކށް ރައީސް ނަޝީދު މަރުފަލި ޖަހާއިރު

ދިވެހި ރާއްޖެ އަށް ބަރުލަމާނީ ނިޒާމް ގެނެސްފި ނަމަ ރައްޔިތުން ބައިބައިވެ، ރައްޔިތުން ހާލުގައި ޖެހޭނެ ކަމަށް ހޯމް މިނިސްޓަރ ޝެއިޙް އިމްރާން އަބްދުﷲ ވިދާޅުވުމުން އަޅުގަނޑު ގާތަށް އައީ ހިންޏެވެ. ބަރުލަމާނީ ނިޒާމަކަށް ޤައުމުގެ ވެރިކަން ހިންގުން ބަދަލު ވެއްޖެ ނަމަ ރައްޔިތުންނަށް ވުރެ ކުރީން ބައިބައިވާނީ އެކިޔާ "ކޯލިޝަން" އެވެ. އަދި ރައްޔިތުންނަށް ވުރެ ކުރީން ހާލުގައި ޖެހޭނީ ވެސް އެކިޔާ ކޯލިޝަންގެ ކުދި ޕާޓީ ތަކެވެ! ބަރުލަމާނީ ނިޒާމެއްގައި ހުރިހާ ބާރެއް ލިބެނީ މަޖުލިސް މެމްބަރުންނާއި މެމްބަރުން ތިބޭ ޕާޓީ ތަކަށެވެ. އަދާލަތު ފަދަ، މަޖުލިހުގެ އެއްވެސް ގޮނޑިއެއް ނެތް ޕާޓީތަކަށް ސަރުކާރުތެރެއިން ބާރު ލިބެނީ މަސްހުނި، ރިއާސީ އިންތިހާބެއްގެ ތެރެއިން ކޯލިޝަން ހަދައިގެންނެވެ. އެހެން ކަމުން ބަރުލަމާނީ ނިޒާމަކަށް ބަދަލު ވެއްޖެ ނަމަ އެންމެ ކުރިން ސިޔާސީ ގޮތުން ހާލުގައި ޖެހޭނީ އިމްރާންގެ އަދާލަތާއި، މައުމޫނުގެ އެމްއާރްއެމް އެވެ.

ރައީސް ނަޝީދު ބަރުލަމާނީ ނިޒާމް ތަބަކަކަށް ލައްވައިގެން ވިއްކަވަން، މަރުފަލި ޖައްސަވަމުން ވަޑައިގަންނަވާތީ އެމްއެންޕީ ގެ އިސް ބޭފުޅެއް ކަމުގައިވާ، އަދި ކުރީގެ ފޮރިން މިނިސްޓަރު، ދުންޏާ މައުމޫން ނަޝީދަށް އަމާޒު ކުރައްވައި ސުވާލެއް ކުރެއްވިއެވެ: "ޤައުމުގެ ހާލަތާއި މެދު އަޅާލުމެއް ނެތީތޯ އެވެ؟"

އަނެއްކާ ވެސް އަޅުގަނޑު ގާތަށް އައީ ހަމަ ހިންޏެވެ. ދުންޏާގެ ބައްޕާފުޅު މައުމޫން އަބްދުލް ޤައްޔޫމާ އެސުވާލު ކުރެއްވި ނަމަ މާރަނގަޅެއް ނޫންތޯއެވެ؟ މައުމޫން ނިސްބަތްވާ ކޯލިޝަން ސަރުކާރެއް އޮވެމެ، ޤައުމު އިންޑިއާއަށް އަޅުވެތި ކޮށް، ޤައުމުގެ ރިޒާވް ހުސްވެ، ތަކެތީގެ އަގު އިންތިހާ އަށް ބޮޑުވެ. ބޭރުގެ ދަރަނި ހެސްކިޔާފަ އިތުރުވެ، ފާޙިޝް އަމަލު ހައްދުން ނައްޓައި، ދީނަށް ފުރައްސާރަ ކުރުން އާދައިގެ ކަމަކަށް ހެދިއިރު ދުންޏާގެ ބައްޕާފުޅު ޤައުމުގެ ހާލަތާއި މެދު އަޅާލެއްވުމެއް ނެތީތޯއެވެ؟

ދައުލަތް ހިންގުމުގެ ނިޒާމުގެ ބަހުސްގައި މާފަންނު އުތުރު ދާއިރާގެ މަޖުލިސް މެމްބަރ އިމްތިއާޒް ފަހުމީ ވިދާޅުވި ވާހަކަ ވެސް ގޮސް ހުއްޓެނީ އިމްތިއާޒުގެ ފައި ބުޑަށެވެ. ރިއާސީ ނިޒާމް ކޮޅަށް ވާހަކަ ދައްކާ މީހުންގެ ތެރޭގައި އެބުނާހާ މޮޅަށް ރައީސް ކަން ކުރެވޭ ވަރުގެ މޮޅު މީހަކު ފެންނަން ނެތް ކަމަށް އިމްތިއާޒް (އިންތި) ވިދާޅުވިއެވެ. މިއީ ރައީސް ސޯލިހާއި ދިމާލަށް އެއްލި ނުސީދާ ގާބުރިއެއް ކަމަށް ބެލެވެއެވެ. އެހެން ކަމަށް ވާނަމަ އިންތިގެ ރޫހާނީ ލީޑަރު، ރައީސް ނަޝީދުއަކީ ބަރުލަމާނީ ނިޒާމަކުން ޤައުމު ހިންގަން ވަކި މާމޮޅު ބޭފުޅެއް ތޯއެވެ؟ ނަޝީދަށް ވެރިކަން ލިބިވަޑައިގަތުމުން ކުރެއްވީ ކޮން ކަމެއް ތޯއެވެ؟

ރިއާސީ ނިޒާމަކުން ޤައުމާއި ހަވާލު ކުރުމުން ތިމަން މަނިކުފާނުގެ ޕާޓީ ނޫން އެހެން ޕާރޓީއެއްގެ މީހަކު ތިމަން މަނިކުފާނު އަރިހަށް އަޔަސް "ހޭއަރުވާލާނެ" ކަމަށް ވިދާޅުވެ، ޤައުމު ބައިބައި ކުރެއްވިއެވެ. ރާއްޖޭގެ ކޯޓުތަކަށް ބިދޭސީ ފަނޑިޔާރުން ލައްވަން އުޅުއްވިއެވެ. ހުޅުލޭ އެއާޕޯރޓް ނުއަގުގައި އިންޑިއާ އަށް ވިއްކާލެއްވި އެވެ. ޤައުމުގެ އެހެނިހެން ހަރު މުދާ ވިއްކެވުމަށް ރޭއްވެވިއެވެ. ދިނަށް ފުރައްސާރަ ކުރުން އާއްމު ކުރެއްވިއެވެ. ބޯން ޖެހޭނެ ކަމަށާއި ބޮވެން ޖެހޭނެ ކަމަށް ވިދާޅުވެ މަސްތުވާ ތަކެތި ބުއިމަށް ހިތްވަރު ދެއްވިއެވެ. އެވަރުގެ މީހެއްގެ ފަހަތަށް އަރައި އެހެން މީހުން މޮޅު ނޫންކަމަށް ބުނަން އިންތި ލަދެއް ނުގަނޭތޯ އެވެ؟

ބަރުލަމާނީ ނިޒާމަށް ތާއީދު ހޯއްދެވުމަށް އެމްޑީޕީ ހަރުގެތަކުގައި ބާއްވަން ފަށާފައިވާ ސިލްސިލާ ބައްދަލުވުން ތަކުގެ ތެރެއިން އަންގާރަ ދުވަހުގެރޭ ވާހަކަ ދައްކަވަމުން ރައީސް ނަޝީދު ވިދާޅުވީ 2018 ގެ ރިއާސީ އިންތިހާބެކޭ އެއްގޮތަށް ވޯޓުގެ 42 ޕަސެންޓް ޕީޕީއެމް އިން ނަގާނެ ކަމަށެވެ. އަދި ޖުމްހޫރީ ޕާޓީން 12 ޕަސެންޓް ވޯޓު ނަގާނެކަމަށާއި، 4 ޕަސެންޓް ވޯޓު ބެހިގެން ދާނީ އެމްއާރްއެމް އާއި އަދާލަތުގެ މެދުގައި ކަމަށް ނަޝީދު ހިސާބު ޖެއްސެވިއެވެ. ބާކީ 42 ޕަސެންޓް ވޯޓަކީ އެމްޑީޕީގެ އެއްޗެއް ކަމުގައި ވިއަސް ރައީސް ސޯލިހު ބަރުލަމާނީ ނިޒާމަށް ތާއީދު ނުކުރައްވައިފިނަމަ ވޯޓުގެ 15 ޕަސެންޓް ރައީސް ސޯލިހަށް ގެއްލޭނެ ކަމަށް ނަޝީދު ވިދާޅުވިއެވެ. އެހެން އެކަން ވުމުން ރައީސް ސޯލިހަށް ލިބިވަޑައިގަންނަވާނީ 27 ޕަސެންޓް ކަމަށް ރައީސް ނަޝީދު އިންޒާރުދެއްވުމަށް ފަހު ނަޝީދު، ސޯލިހަށް ގޮވާލެއްވީ ގަދަ ބަސް ވިދާޅުނުވެ ބަރުލަމާނީ އާއި އެއްކޮޅަށް އެރުއްވުމަށެވެ. ހިސާބު ޖަހަން މޮޅީ އަދުރޭ ކަމަށް ބުނެ އެމްޑީޕީ މީހުން ޖޯކު ޖެއްސެވެ. ނަމަވެސް މިހާރު އެންމެ މޮޅު ހިސާބު ޓީޗަރަކަށް މިވީ އެމްޑީޕީ ގެ ރޫހާނީ ލީޑަރު ނަޝީދު އެވެ.

ރައީސް ނަޝީދު ރޭ ދެއްކެވި ވާހަކައިގެ ދޭހައަކީ ބަރުލަމާނީ ނިޒާމަށް ރައީސް ސޯލިހު ތާއިދު ނުކުރައްވައިފިނަމަ 2023 ގެ އިންތިހާބް ގައި ނަޝީދު މަސައްކަތް ކުރައްވާނީ ރައީސް ސޯލިހާއި ދެކޮޅަށް ކަމެވެ. ނަޝީދުގެ ހިސާބު އަދަދުތަކުން ރައީސް ސޯލިހަށް ގެއްލޭނެ ކަމަށް އެވިދާޅުވި 15 ޕަސެން ވޯޓު އެހެން ކަމުން ލިބޭނީ ނަޝީދަށްތާ އެވެ. ސުވާލަކީ އެމްޑީޕީ ބައި ބައި ކޮށް، ސޯލިހާއި ވަކިވެެވަޑައިގެން ނަޝީދު އަރާވަޑައިގަންނަވާނީ ކޮން އޮޑިއަކަށް ތޯއެވެ؟ ނުފެތޭނެ ކަމަށް ވިދާޅުވި އޮޑި އެހެން މީހަކު ފޭރިގަނެެގެން ގޮސް ފައްތާލުމުން ދެން ވަޑައިގެން އަރުވާނީ ޕީޕީއެމް ގެ އޮޑިއަށް ތޯއެވެ؟ ނޫންނަމަ ޖުމްހޫރީ ޕާޓީގެ އޮޑިއަށް ތޯއެވެ؟ ރާއްޖޭގެ ސިޔާސީ މައިދާނަކީ ރަނޑިންނާއި ކަސްބީންގެ މައިދާނަކަށް ވުމުން މިއިން ކޮންމެ ޕާޓީ އަކުން ވެސް ނަޝީދާއި ޑީލް ހަަދައިފާނެ އެވެ. ނަމަވެސް ނަޝީދާއެކު އެއްބަސް ވުމެއް ހަދާ ހުރިހާ ޕާޓީ އަކުން ވެސް ނަޝީދަކީ ނަޝީދުކަން ދަންނަން ޖެހޭނެއެވެ. ނަޝީދާއި އެކު ހަދާ އެއްބަސްވުމުގެ ބިންގާ އޮންނާނީ ޗަސް ބިމުގައެވެ. އެހެން ނޫނަސް ނަޝީދު ހިމެނޭ ކޯލިޝަނަކަށް ރައްޔިތުން އިތުބާރު ކުރާނެތޯ އެއީ ވެސް ހަމަ ކުރަން ޖެހޭ ސުވާލެކެވެ!

ރައީސް ސޯލިހެއް، ރައީސް ނަޝީދެއް، ޤާސިމެއް، މައުމޫނެއް، އިމްރާނެއް، ޝާހިދެއް، ނާޒިމެއް، ޖާބިރެއް އަދި ޝިހާމެއް ވެސް ކަމަކު ނުދެއެވެ. ރާއްޖޭގެ ސިޔާސީ މައިދާނުގައި މިވަގުތު ތިބީ ރަނޑީން، ނުވަތަ ކަސްބީން، ނުވަތަ ވަގުން، ނުވަތަ ކޮރަޕްޓް މީހުން، ނުވަތަ އަމިއްލަ ފައިދާ އަށް ދައުލަތުގެ ފައިސާ ހަބޭސް އަރުވާ މީހުންނެވެ. މިއެންމެން ޖެހެނީ 2023 ގައި ބޭރު ކުރާށެވެ. ނަމަވެސް މިމީހުން ބޭރުކޮށްފައި ދެން ވަކި ލާނީ ވެސް ކާކު ތޯއެވެ؟ އެސުވާލުގެ ޖަވާބު އަޅުގަނޑަކަށް އަދި ހަމަ ގައިމުވެސް ނޭގެއެވެ؟ ފުރޮޅިގެންދާ ކޮންމެ ދުވަހަކު މިސުވާލުގެ ޖަވާބާއި ކައިރިއަށް ދިވެހީން ގެންގޮސް ދޭނެއެވެ. ބަލަން ތިބެމާ ހިނގާށެވެ.