"ތާރީހު ލިޔާނީ ގައުމަށް އެންމެ ބޮޑު ހިޔާނާތްވި ސަރުކާރުގެ ގޮތު"
"މި ސަރުކާރުގެ ވާހަކަ ދިވެހި ތާރީހުގައި ލިޔާނީ މި ގައުމަށް އެންމެ ބޮޑު ހިޔާނާތްވި، ދިވެހި މަސްކަނޑު ވިއްކާލި ސަރުކާރުގެ ގޮތުގައި"
މި ސަރުކާރުގެ ނަން ތާރީހުގައި ލިޔާނީ ރާއްޖެއަށް އެންމެ ބޮޑު ހިޔާނަތްވި ދިވެހި މަސްކަނޑު ވިއްކާލި ސަރުކާރުގެ ގޮތުގައި ކަމަށް ކެންދޫ ދާއިރާގެ ޖުމްހޫރީ ޕާޓީގެ މެންބަރު އަލީ ހުސައިން ވިދާޅުވެއްޖެ އެވެ.
"ބާނަ ބާނަ ތިއްބާ ތިޔަ ވިއްކާލީ ކަނޑު" އެ ނަމުގައި ކާނިވާ ސަރަހައްދުގައި މިރޭ ބޭއްވި ޖަލްސާގައި ވާހަކަ ދައްކަވަމުން އަލީ ހުސައިން ވިދާޅުވީ ދިވެހި މަސްކަނޑުން ބައެއް ގެއްލުމަކީ ދިވެހީންގެ ޝަރަފާއި ކަރާމާތާ ގުޅިފައިވާ ކަމެއް ކަމަށާ އެކަމާއި ދެކޮޅަށް ކުރަން ޖެހުނު ކޮންމެ މަސައްކަތެއް ކުރާނެ ކަމަށެވެ.
1996 ވަނަަ އަހަރު ދިވެހީން ނިންމާފައި އޮތް ސާފު ނިންމެވުމެއް / ރައީސުލްޖުމްހޫރިއްޔާ ތަސްދީގު ކުރައްވާފައި އޮތް ނިންމުމެއް އެބައޮތް ކަމަށާ އެއީ ރާއްޖޭގެ އިގްތިސާދީ ސަރަހައްދަކީ 200 ނޯޓިކަލް މޭލް ކަމުގައި ކަނޑައަޅާ ގާނޫނުގައި އެކަން ސާފުކޮށް ބަޔާން ކުރުން ކަމަށް އަލީ ވިދާޅުވި އެވެ. އަދި ސަރުކާރުން މިއަދު ވަނީ ރައްޔިތުންގެ އެ ނިންމުމަށް ހަރާން ކޯރުވެފައި ކަމަށް ވިދާޅުވި އެވެ.
"މި ސަރުކާރުގެ ވާހަކަ ދިވެހި ތާރީހުގައި ލިޔާނީ މި ގައުމަށް އެންމެ ބޮޑު ހިޔާނާތްވި، ދިވެހި މަސްކަނޑު ވިއްކާލި ސަރުކާރުގެ ގޮތުގައި. ރައީސުލްޖުމްހޫރިއްޔާ ބަންޑާރަ ނާއިބު މެދުވެރި ކުރައްވާ މި ގައުމު ދިފާއު ކުރެއްވުމުގެ ބަދަލުގައި އަޅުގަނޑުމެންނަށް ވީ ބޭވަފާތެރި، ވީ ޣައްދާރު، ވީ ހިޔާނާތްތެރި،"
އަލީ ވަނީ މަސްކަނޑު ގެއްލުމަކީ ދިވެހީންނާއި ގުޅުންހުރި މައްސަލައެއް ކަމަށް ވިދާޅުވެ އެ މަަސައްކަތުގައި ބައިވެރިވާން ދެކޮޅު ހަދާ މީހުންނަށް ރައްދު ދެއްވާފައެވެ. މިރޭގެ ރެލީއަށް ނުދާން ޖުމްހޫރީ ޕާޓީގެ ލީޑަރު ގާސިމް އިބްރާހިމް އެދިވަޑައިގެންފައިވާތީ އެކަމަށް އިޝާރާތް ވާނެ ފަދައިން އަލީ ވަނީ އޭނާ ހުންނެވީ އެކަނި ނޫން ކަަމަށް ވިދާޅުވެފައެވެ.
ކަނޑުން ގެއްލުނު ބައި ހޯދުމަށް ކުރާ މަސައްކަތުގައި ރައްޔިތުންގެ ބައިވެރިވުން އޮތީ ވަރަށް ބޮޑަށް ކަމަށް ވިދާޅުވެ ރައްޔިތުންގެ އެ ބައިވެރިވުމާއި އެ ރައްޔިތުން ތިބި ގޮތުގެ ސަބަބުން ކުރިއަށްދާން ވަރަށް ބޮޑު ހިތްވަރެއް ލިބޭ ކަމަށް ވިދާޅުވި އެވެ.
އަދި ވިދާޅުވީ އޭނާއަކީވެސް މި ސަރުކާރު ގެނައުމަށް ވަރަށް ބުރަކޮށް މަސައްކަތް ކުރި ބޭފުޅެއް ކަމަށާ މި ސަރުކާރު ގެނައީ ފޮތިފޮތި ކޮށްފައި މަސްކަނޑުތަކާއި ބިންތައް ބޭރުގެ ފަރާތްތަކަށް ވިއްކަން ނޫން ކަމަށެވެ.
"ބައްލަވާ! ތިބޭފުޅުންނަށް އަޅުގަނޑުމެންގެ ކަނޑުގެ ސަރަަހައްދާމެދު އުނދަގޫ ވެގެން އުޅޭ ކަމަށް ވަންޏާ ފައިބާ ވަޑައިގަންނަވާ. މިހާރުން މިހާރަށް އިސްތިއުފާ ދީފައި ގެއަށް ވަޑައިގަންނަވާ،"
އަލީ ވަނީ މި ސަރުކާރުގައި ތިއްބެވި ބޭފުޅުން ތިއްބެވީ ގޮތް ހުސްވެފައި ކަމަށް ވިދާޅުވެ ކަނޑުން ގެއްލުނު ބައި ހޯދުމަށް ކުރާ މަސައްކަތް ކާމިޔާބު ކުރައްވާނެ ކަމަށް ވިދާޅުވެފައެވެ.
"އަޅުގަނޑުމެންނަށް އަދި ކަނޑު ގެއްލުނީއެއް ނޫން. އިރާދަކުރެއްވިއްޔާ ކިތަންމެ ކަމެއް ކުރެވޭނެ. އެ މަސައްކަތް އަޅުގަނޑުމެން ކުރާނަން،" އަލީ ހުސައިން ވިދާޅުވި އެވެ.
ކޮމެންޓް
Republic of Maldives