ރައީސަށް ދައުވާ ކުރާނެ، އެކުގައި ތިބެ ސަރުކާރު ނިންމާނެ: ނާޒިމް

މަގާމުގައި ހުންްނެވި ނަމަވެސް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްގެ މައްޗަށް ދައުވާ ކުރެވޭނެ ކަމަށާ ޗާގޯސް އާއި ރާއްޖޭގެ އިން ވަކި ކުރުމުގެ މައްސަލާގައި އިންޓަނޭޝަނަލް ޓްރައިބިއުނަލް ފޯ ދަ ލޯސް އޮފް ދަ ސީ (އިޓްލޮސް) އިން ނިންމި ނިންމުމުގެ ސަަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާތީ އެކަމާއި ގުޅިގެން ރައީސުލްޖުމްހޫރިއްޔާގެ މައްޗަށް ދައުވާ ކުރައްވާނެ ކަމަށް މޯލްޑިވްސް ނެޝަނަލް ޕާޓީގެ ރައީސް މުހައްމަދު ނާޒިމް މިރޭ ވިދާޅުވެއްޖެ އެވެ.

"ބާނަ ބާނަ ތިއްބާ ތިޔަ ވިއްކާލީ ކަނޑު" އެ ނަމުގައި ކާނިވާ ސަރަހައްދުގައި މިރޭ ބޭއްވި ޖަލްސާގައި ބައިވެރިވި އެތައް ހާސް ބަޔަކާ މުހާތަބުކޮށް ވާހަކަ ދައްކަވަމުން ނާޒިމް ވިދާޅުވީ ރައީސް ސޯލިހް ހުންނެވީ ގައުމަށް އެންމެ މަތީ ދަރަޖާގައި ހިޔާނާތްތެރިވެވަޑައިގެންފައި ކަމަށެވެ. 

ސަރުކާރުން އަމަލުކުރި ގޮތުން ދިވެހީންގެ ކަނޑުގެ ސަރަހައްދުން 44،000 އަކަ ކިލޯ މީޓަރުގެ ބައެއް ގެއްލިފައިވާ ކަން ފާހަގަ ކުރައްވާ އެއީ މުޅި ރައްޔިތުން ނުކުމެ އެކީގައި އިހުތިޖާޖު ކުރަން ޖެހޭ ކަމެއް ކަމަށް ނާޒިމް ވިދާޅުވި އެވެ. ނާޒިމް ވިދާޅުވީ ދިވެހި ކަނޑުން ގެއްލުނީ ސްވިޒަލޭންޑް ވަރުގެ ބޮޑު ބައެއް ކަމަށެވެ. 

ނާޒިމް ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މަގާމުން ދުރު ކުރަން ޖެހޭ ކަމަށާ ރައީސުލްޖުމްހޫރިއްޔާގެ މަގާމުގައި އެމަނިކުފާނު ހުންްނެވުމުގެ ގާނޫނީ ހައިސިއްޔަތު މުޅީން ގެއްލިފައިވާ ކަމަށް ވިދާޅުވެފައެވެ. އަދި ރައީސް ސޯލިހްގެ މައްޗަށް ދައުވާ ކުރަން ޖެހޭ ކަމަށް ވެސް ވިދާޅުވި އެވެ.

މަގާމުގައި ހުންނެވުމަކީ ރައީސުލްޖުމްހޫރިއްޔާގެ މައްޗަށް ދައުވާ ނުއުފުލޭނެ ސަބަބެއް ނޫން ކަމަށާ ގާނޫނުން އެ ފުރުސަތު އެބައޮތް ކަމަށް ވިދާޅުވި އެވެ. އަދި ރައީސްގެ މައްޗަށް ދައުވާ ކުރައްވާނެެ ކަމަށް ވިދާޅުވި އެވެ.

"މި މައްސަލާގައި އަޅުގަނޑުމެން ރައީސުލްޖުމްހޫރިއްޔާގެ މައްޗަށް ދައުވާ ކުރާނެ ވާހަކަ ވެސް ދަންނަވަން،" ނާޒިމް ވިދާޅުވި އެވެ.

ނާޒިމް ވަނީ ސަރުކާރު ފެއިލްވެފައިވާ ކަަމަށް ވިދާޅުވެ ސަރުކާރާއި ދެކޮޅަށް މަސައްކަތް ކުރުމުގައި އެކުގައި ދެމި ތިބޭނެ ކަމަށްވެސް ވިދާޅުވެފަ އެވެ. ނާޒިމް ވިދާޅުވީ ކަނޑުން ބައެއް ގެއްލުމުގެ މައްސަލާގައި ޕާޓީތަކުން އެކުވެ މަސައްކަތް ކުރާ ގޮތަށް މި ސަރުކާރު ބަދަލު ކުރަން ވެސް މަަސައްކަތް ކުރާނެ ކަމަށެވެ. އަދި އެ މަސައްކަތުގައި އެކުގައި ތިބުމަށް އެދިވަޑައިގެންނެވި އެވެ.

"އަޅުގަނޑުމެން އެކަތިގަނޑަކަށް ވާންޖެހިއްޖެއްޔާ ވާނެ އަޅުގަނޑުމެން. އަޅުގަނޑުމެން ގުޅިގެން މި ސަރުކާރު ބަދަލު ކޮށްލާނެ،"

ނާޒިމް އަދި ވިދާޅުވީ ދިވެހީންނަށް މީގެ ކުރީން އެންމެ ބޮޑު ހިޔާނާތެއްވި އެއް ވެރިއަކީ ބޮޑުވަޒީރު އިބްރާހިމް ފާމްލަދޭރިކިލެގެފާނު ކަމަށާ އެއީ އައްޑޫ ގަން 100 އަހަރަށް ކުއްޔަށް ދިނުމަށް ނިންމި ނިންމުން ކަމަށެވެ. ނަަމަވެސް 75 އަހަރުގެ މަސައްކަތުން ގަން ދިވެހީންނަށް ހޯދިފައިވާ ކަމަށާ ރައީސް ސޯލިހް މި ގައުމަށްވީ ހިޔާނާތް މާ ބޮޑު ކަމަށެވެ.

"މި ސަރުކާރު މި އޮތީ ބޮޑުތަނުން ފެއިލްވެފައި. މިއަދު ރަައީސުލްޖުމްހޫރިއްޔާ ޖެހޭނީ ފައިބާ ވަޑައިގަންނަވަން. އަޅުގަނޑުމެން ތިބޭފުޅާއަށް [ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް] މާފުކުރާކަށް ނެތީން. ކަނޑުން ގެއްލުނު ބައި ހޯއްދަވައި ދެއްވާށޭ،" ނާޒިމް ވިދާޅުވި އެވެ.