މާފަރުން ޕާޓީތަކަށް ބިން: 15 އަހަރަށް، އަކަފޫޓެއް 2ރ. އަށް

ނ. މާފަރުން ސިޔާސީ ޕާޓީތަކަށް ބިން ދޭ އުސޫލެއް އެ ރަށު ކައުންސިލުން ވަނީ އެކުލަވާލާފަ އެވެ. އެ އުސޫލުގައިވާ ގޮތުންނަމަ ބިން ދޭނީ 15 އަހަރެވެ. އަދި އަގު ކަނޑައަޅާފައި ވަނީ އަކަފޫޓަކަށް 2ރ. އަށްވުރެ ކުޑަވާނެ ގޮތަށެވެ. 

މާފަރު ކައުންސިލުން ނެރެފައިވާ އުސޫލުގައިވާ ގޮތުން އެއީ ރާއްޖޭގައި ރަޖިސްޓްރީ ކޮށްގެން ހިންގާ ސިޔާސީ ޕާޓީތަކުގެ ތެރެއިން ޕާޓީގެ ދަފްތަރުގައި 10،000 މީހުން ހަމަވާ ސިޔާސީ ޕާޓީތަކަށ،ް ޕާޓީ ހިންގުމަށް ބޭނުންވާ އިދާރީ އޮފީސް ނުވަތަ ހަރުގެ ހެދުމަށާއ،ި ސިޔާސީ ހަރަކާތައް ހިންގަން މާފަރުން ބިން ދޫކުރަން ހެދި އުސޫލެކެވެ. 

އެ އުސޫލުގައިވާ ގޮތުން އެއްވެސް ސިޔާސީ ޕާޓީއަކުން ބިން ހޯދަން މާފަރު ކައުންސިލަށް އެދިއްޖެ ނަމަ އެ ބިން ދޫކުރާނެ ތަން މާފަރުން ފާސް ކޮށްފައިވާ ލޭންޑް ޔޫސް ޕްލޭނުގައި ބަޔާން ކޮށްފައިވާ ބިންތަކުގެ ތެރެއިން މާފަރު ކައުންސިލުން ކަނޑައަޅާ ބިމެއް އެ ސިޔާސީ ޕާޓީއަކަށް ދޫކުރާނެ އެވެ. 

ބިން ދޫކުރާނީ 15 އަހަރުގެ ދުވަހަށް ޕާޓީއަކާއި މާފަރު ކައުންސިލާއި ދެމެދު ހަދާ އެއްބަސްވުމަކުންނެވެ. އަދި ސިޔާސީ ޕާޓީތަކަށް ބިން ދިނުމުގައި ބަލަނީ މާފަރުގައި ބިންހުރި ނިސްބަތަކުން 3000 އަކަފޫޓަށްވުރެ ބޮޑު ނޫން ބިންތަކެވެ.  

މާފަރު ކައުންސިލުން ސިޔާސީ ޕާޓީތަކަށް ބިން ދެނީ ކަނޑައެޅިފައިވާ އުސޫލެއް މަތިން ޝަރުތުތަކަކާއެކުގަ އެވެ. ބިން ބޭނުން ކުރެވޭނީ ގާނޫނުތަކާއި ގަވާއިދުތައް ހުއްދަކުރާ ތަރަހައިގެ ތެރޭގަ އެވެ. ސިޔާސީ ޕާޓީއަށް ދޫކުރެވޭ ބިމުގައި ރަށުގެ އާންމު މަސްލަހަތު ގެއްލޭފަދަ ކަންކަމާއ،ި އާއްމު ރައްޔިތުންނަށް އުނދަގޫ ވާފަދަ ކަންކަމެއް ނުކުރެވޭނެ އެވެ. އިސްލާމް ދީނާއި ހިލާފު އެއްވެސް އަމަލެއް ނުވަތަ ކަމެއް ނުވަތަ ޝިއާރެއް ބޭނުން ނުކުރެވޭނެ އެވެ. ހާރިޖީ ގުޅުންތަކަށް ހީނަރުކަން ލިބިދާނެ ފަދ،ަ ނުވަތަ ބޭރު ގައުމަކާއި ގުޅޭގޮތުން ނުވަތަ އެފަދަ ގައުމަކަށް ނިސްބަތްވާ ރައްޔިތުންނާއި މެދު ނުރަނގަޅު ތަސައްވުރެއް އުފެދޭ ޒާތުގެ އެއްވެސް ކަމެއް ނުކުރެވެ އެވެ.