ނަޝީދަށް ހަމަލާދިނީ ރައީސަށް އެނގިގެން، މަޖިލީހުގައި ހޫނު ބަހުސެއް

މީގެ ދެ އަހަރު ކުރިން، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަ ކޮށްލަން ދިން ބޮމުގެ ހަމަލާއަކީ ރައީސް އިބްރާހިމް މުހައްމަދު ސޯލިހަށް އެނގިގެން ދިން ހަމަލާއެއްކަމަށް ބުނެ ދަ ޑިމޮކްރެޓްސްގެ ފަރާތުން ބޮޑެތި ތުހުމަތުތަކެއް ސަރުކާރަށް އަމާޒު ކޮށްފި އެވެ. 

ތޮއްޑޫ ދާއިރާގެ މެމްބަރު ހަސަން ޝިޔާން ހުށަހަޅާފައިވާ އެމްޑީޕީގެ ފުރަތަމަ ވެރިކަމުގައި ދިވެހި ދަނޑުވެރިންނަށް ދެމުންއައި ސަބްސިޑީ އިއާދަކުރަން ހުށަހެޅި ގަރާރަށް ބަހުސްކުރައްވަމުން އިދިކޮޅު މެމްބަރުން ވަނީ މި ސަރުކާރުން ވެފައިވާ އެއްވެސް ވައުދެއް ނުފުއްދޭ ކަމަށް ބުނެ ބޮޑެތި ފާޑުކިޔުންތަކެއް އަމާޒުކޮށްފަ އެވެ.

އެ ބަހުސްގެ ތެރެއިން މޭ 6، 2021 ވަނަ ދުވަހުގެ ރޭ ނަޝީދަށް ހަމަލާދިން މައްސަލަ ފެއްޓެވީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފެވެ. އެ ހަމަލާ ދިނުމުގެ ކުރިން އެ މައުލޫމާތު ސީދާ ރައީސަށް އެނގިވަޑައިގަންނަވާ ކަމަށް އޭނާ ވިދާޅުވި އެވެ.

"އަޅުގަނޑު މި ދަންނަވާ ވާހަކައަކީ މި މަޖިލީހުގެ 241 ކޮމެޓީއިން ހިންގި އިންކުއަރީގައި ސާފުކޮށް އެބައޮތް އެނގެން ކެނެރީގޭ ހުންނަ ގޯޅީގައި ސައިކަލެއް ބަހައްޓާފައި އެ ސައިކަލުގައި ބޮމެއް ހަރުކޮށްފާ، ރައީސް ނަޝީދު ނުކުމެވަޑައިގަންނަވާ ގަޑީގައި އެ ބޮން ގޮއްވާލައިގެން ރައީސް ނަޝީދު މަރާލަން އުޅުނު ކަމުގެ މައުލޫމާތު ރައީސުލްޖުމްހޫރިއްޔާއަށް އެނގިވަޑައިގަންނަވާކަމުގެ މައުލޫމާތު ވަނީ ލިބިފަ އިންކުއަރީއަށް،" ހަސަން ލަތީފް ވިދާޅުވި އެވެ.

އޭނާ ވިދާޅުވީ އެ ސައިކަލުގައި ބޮން ހަރުކޮށްގެން މެރީބްރައުން ކައިރީއާއި ޔާގޫތުގޭ ކައިރިން ނަޝީދު އަވަހާރަކޮށްލަން އުޅުނުކަމުގެ މައުލޫމާތު ވެސް ރައީސްއަށް އެނގިވަޑައިގަންނަވާ ކަމަށެވެ. ހަސަން އެހެން ވިދާޅުވުމުން މާފަންނަނު މެދު ދާއިރާގެ އިބްރާހިމް ރަޝީދު (ބޮންޑޭ) ވަނީ އެއީ ކުރިން އެނގޭ މައުލޫމާތެއް ނޫން ކަމަށް ވިދާޅުވެފަ އެވެ. އެކަމަށް ޖަވާބު ދެއްވީ ނަޝީދެވެ.

ހަމަލާ ދީފައި ވަނީ ސީދާ ރައީސަށް އެނގިގެން ކަމަށް ހަސަން ލަތީފް ވިދާޅުވަނީ 241 ކޮމެޓީގެ އިންކުއަރީގެ ބައިވެރިވެވަޑައިގެން މައުލޫމާތު ރަގަޅަށް އެނގިގެން ކަމަށް ގަލޮޅު އިތުރު ދާއިރާގެ މެމްބަރު އީވާ އަބްދުﷲ ވަނީ ވިދާޅުވެފަ އެވެ.

"241 ކޮމެޓީގެ ޕަބްލިޝްކޮށްފަ އޮތް ރިޕޯޓަށް ބައްލަވާލައްވާ! އޭގައި ލިޔެފަ އޮންނާނެ، ނޯޅޭނެ އެކަކަށް ވެސް އެއީ ކާކުކަމެއް އެއީ ފުލުހުންގެ އިސްވެރިޔެކޭ ދެންނެވީމާ އެއީ ކާކުކަމެއް! އޭގާ ލިޔެފަ އޮންނާނެ މީ އެނގިހުރެގެން ހިނގާފައިވާ ކަމެކޭ! އަދި ފުލުހުން ބުނެފާ އޮންނާނެ ކަނޑައެޅިގެން ތިމަންނާމެންނަށް ސިފައިން ނޭންގީއޭ، ސިފައިން ތިމަންނަމެންނަށް އެންގިނަމަ ހުއްޓުވުނީހޭ. އަދި ރައީސުލްޖުމްހޫރިއްޔާއަށް އަންގާފައިވާ ކަމަށް ޕަބްލިކް ރެކޯޑުގައި އޮންނާނެ،" އީވާ ވިދާޅުވި އެވެ.

އީވާ ވިދާޅުވީ ސިޔާސީ ހަދަވެރިކަމެއްގައި ނަޝީދަށް ހަމަލާދޭން ދޫކޮށްލިއިރު އެ ސަރަހައްދުގައި ތިބި އެތައް ބައެއްގެ ފުރާނަ ނުރައްކަލަކަށް ހުށަހެޅުނު ކަމަށެވެ. އެހެންކަމުން ރައީސް ސޯލިހަކީ ރާއްޖެއަށް އޮތް ބޮޑު ނުރައްކަލެއް ކަމަށް އީވާ ސިފަކުރެއްވި އެވެ.

މީގެ ކުރީގެ ސަރުކާރުތަކުގައި ނަޝީދު ޖަލުގައި ބަންދުކޮށްގެން ގެންގުޅުނު ނަމަވެސް، އަވަހާރަކޮށްލަން ހަމަލާއެއް ދިނީ ރައީސް ސޯލިހުގެ ވެރިކަމުގައި ވެފައި، ދޭން ޖެހޭ ހިމާޔަތް ނުދިނީ ގަސްތުގައިކަމަށް ދޭހަވާ މޭރުމަކުން މާފަންނު އުތުރު ދާއިރާ އިމްތިޔާޒް ފަހުމީ ވެސް ވަނީ ވާހަކަދައްކަވައިފަ އެވެ.

"މަޖިލީހުގެ ރައީސް، އިއްޒަތްތެރި ރައީސް އަވަހާރަކޮށްލަން ބޮމުގެ ހަލަމާ ދީފަވަނީ އިބްރާހިމް މުހައްމަދު ސޯލިހުގެ ވެރިކަމުގަ. ކުރީގެ އެއްވެސް ސަރުކާރަކުން އެފުރުސަތެއް ނުދޭ. ކިތަންމެ ބޭފުޅުންނެއް ރައީސް [ނަޝީދު] ޖަލަށްލާފަވޭ އެހެންނަމަވެސް މަރުގެ އަދަބު ނުވަތަ އަވަހާރަކޮށްލަން ބޮމެއް ގޮއްވާލުމުގެ ފުރުސަތެއް ނުދޭ! މި މައުލޫމާތު ސަރުކާރަށް ލިބިފަވާއިރުގާ ރައީސްއަށް އެ ހިމާޔަތްނުދީ ހަމަލާ ދިނުމުގެ ފުރުސަތު ލިބިފަވަނީ،" އިމްތިޔާޒް ވިދާޅުވި އެވެ.

ދަ ޑިމޮކްރޭޓްސްއަށް ރައްދުދެއްވަމުން ދުވާފަރު ދާއިރާ އިސްމާއީލް އަހުމަދު ވިދާޅުވެފައި ވަނީ މުޅި ދައުލަތުން އެންމެ ބޮޑު ހަރަދެއް ކުރާ ހަމައެކަނި އިންސާނަކީ ރައީސް ނަޝީދު ކަމަށެވެ. 2008 ވަނަ އަހަރުން ފެށިގެން ދައުލަތުގެ ބަޖެޓުން އެތައް ހަރަދެއް ކުރަމުންދާ ކަމަށް އޭނާ ވިދާޅުވި އެވެ. އަދި މިހާރު ވެސް 50 މިލިއަނަށްވުރެ ބޮޑު ހަރަދެއް ކުރަމުންދާ ކަމަށް އޭނާ ވިދާޅުވި އެވެ.

"ރާއްޖޭގެ ރަގަޅު އަތޮޅަކަށް ނުކުރާ ހޭދަ މަނިކުފާނަށް އަންނަނީ ކުރަމުން! މިއަދުވެސް އެކަމަކު ކެތް ނުވެގެން ތިއުޅުއްވަނީ ވެރިކަމަށް ފެންބޮވާގެން،" އިސްމާއީލް ވިދާޅުވި އެވެ.

އޭނާގެ ވާހަކަތަކަށް ނަޝީދު ރައްދު ދެއްވި އެވެ. ނަޝީދު ވިދާޅުވެފައި ވަނީ ހަމަލާއަށްފަހު އިތުރުފަރުވާއަށް އެމަނިކުފާނު ޖަރުމަނަށް ގެންދިޔައީ އެ ގައުމުގެ ހަރަދުގައި ކަމަށެވެ. އަދި އެތަނުގައި ފަރުވާ ދީފައި ވަނީ ވެސް އެގައުމުގެ ހަރަދުގައި ކަމަށެވެ. އޭގެ ފަހުން އިނގިރޭސިވިލާތުގައި ހުރި ތިން ހަފްތާ ސަރުކާރުން އެމަނިކުފާނަށް ހަރަދެއް ކުރި ނަމަވެސް މެމްބަރު ވިދާޅުވާ ބޮޑު ހަރަދު ކުރަނީ އެމްއެންޑީއެފް އަށް ކަމަށް ނަޝީދު ވިދާޅުވި އެވެ.

ނަޝީދަށް ހަމަލާ ދީފައި ވަނީ ސީދާ ރައީސަށް އެނގިގެން އެމަނިކުފާނު އެ ފުރުސަތު ދެއްވުމުން ކަމަށް ފާޅުގައި މެމްބަރުން މީގެ ކުރިން ވާހަކަދައްކާފައެއް ނުވެ އެވެ.