ރައީސް ނަޝީދު ދިއްދޫއަށް ވަޑައިގެންފި
ރައީސް ނަޝީދު ދިއްދޫއަށް ވަޑައިގެންފައި ވަނީ ތިލައުތުރު އެވޯޑް ދިނުމުގެ ރަސްމީ ޖަލްސާގައި ބައިވެރިވެވަޑައިގަތުމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ތިލަންދުންމަތީ އުތުރުބުރީ ވެރިރަށް ދިއްދޫއަށް ވަޑައިގެންފި އެވެ.
ރައީސް ނަޝީދު ދިއްދޫއަށް ވަޑައިގެންފައި ވަނީ ތިލައުތުރު އެވޯޑް ދިނުމުގެ ރަސްމީ ޖަލްސާގައި ބައިވެރިވެވަޑައިގަތުމަށެވެ.
އެމަނިކުފާނަށް ދިއްދޫ އިން ހޫނު މަރުހަބާއެއް ދަންނަވާފައިވެއެވެ. ރަށްރަށުގެ ކައުންސިލްގެ ރަައީސުންނާއި މެންބަރުން އެމަނިކުފާނަށް މަރުހަބާ ވިދާޅުވި އެވެ. އަދި ދިއްދޫގެ ގިނަ ބަޔަކުވެސް ޖަމާވެފައި ވެއެވެ.
ނަޝީދު، ދިއްދޫއަށް ވަޑައިގެންފައި މިވަނީ އެމަނިކުފާނު ރައީސްކަން ކުރައްވާ އެމްޑީޕީ ވަރަށް ބޮޑަށް ބައިބައިވެ އާ ޕާޓީއެއް އުފެއްދުމުގެ މަސައްކަތް ކުރަމުން ދަނިކޮށެވެ.
އެމަނިކުފާނަށް ވަފާތެރި މަޖިލީހުގެ 13 މެންބަރަކު ވަނީ އެމްޑީޕީއާ ފެޔަށް ޖެހިވަޑައިގެންފައެވެ. އެ މެންބަރުން އިސްވެ އާ ޕާޓީއެއް އުފެއްދުމަށް މިއަދު ހުއްދައަށް ވެސް ވަނީ އެދިފައެވެ.
އަނެއްކޮޅުން ރައްޔިތުންގެ މަޖިލީހުގެ ރައީސްގެ މަގާމުން ރައީސް ނަޝީދު ދުރުކުރުމުގެ މަސައްކަތް ވަރަށް އަވަހަށް ފަށާނެ ކަމަށް ބެލެވެއެވެ.
ދިއްދޫއަކީ އެމްޑީޕީގެ ތާއީދު ބޮޑު ރަށެކެވެ. އެ ޕާޓީގެ ފިކުރު ބޮޑު އެމްޑީޕީގެ ސިޔާސީ ހަރަކާތްތައް ގިނަ ރަށެކެވެ.
ކޮމެންޓް
Republic of Maldives