ފެޝަން ޝޯއަކާއެކު ރިސޯޓް ހޮލިޑޭއިން ރާއްޖެ އިސްތިހާރުކޮށްފި
ރަޝިއާގައި ބޭއްވި މި މާކެޓިން އިވެންޓުގައި 20 ރިސޯޓަކުން ބައިވެރިވި. އަދި ރަޝިއާގެ މަޝްރޫއު ގިނަ ޓުއާ އޮޕަރޭޓަރުންވެސް ބައިވެރިވި
އިސްތިހާރު ކުރަން ތަފާތު ވިސްނުންތަކެއް އަބަދުވެސް ގެންގުޅޭ އެއް ކުންފުންޏަކީ ދިވެހި ވިޔަފާރިވެރިޔާ މުހައްމަދު ޝާޒް ވަލީދުގެ ރިސޯޓް ހޮލިޑޭސް އެވެ. ރަޝިއާގައި މައި އޮފީސް ހިންގާ އެ ކުންފުނިން މި ފަހަރު ރާއްޖެ އިސްތިހާރު ކޮށްފައި ވަނީ މުޅިން ތަފާތު ގޮތަކަށެވެ. ރާއްޖެ އިސްތިހާރުކުރީ ރަޝިއާގެ މޮޑެލްސް ބޭނުން ކޮށްގެން ފެޝަން ޝޯއަކާއެކުގަ އެވެ.
ރިސޯޓް ހޮލިޑޭސްގެ ވެރިޔާ ޝާޒް ވަލީދު ވިދާޅުވި ގޮތުގައި އިވެންޓަށް ރާއްޖޭގެ އަގު ބޮޑު ރިސޯޓްތައް ވިއްކާ 10 އެޖެންސީއަކަށް ދައުވަތު ދީ ބައިވެރި ކުރި އެވެ. މި އިވެންޓް ފެށިގެން ދިޔައީ ރާއްޖޭގެ ޓޫރިޒަމް ފަށައިދިން ޖޯޖް ކޯބިންގެ ވީޑިއޯ ގްރަފީއަކާއެކުގަ އެވެ. އެ ވީޑިއޯގައި 70 އިގެ އަހަރުތަކުގައި ރާއްޖޭގެ ޓޫރިޒަމް ފެށިގެން އައި ގޮތެވެ.
"އެ ވީޑިއޯ ވެގެން ދިޔައީ މިހާތަނަށް ރަޝިއާގައި ރާއްޖޭގެ މައުލޫމާތު އެެންމެ ފުރިހަމައަށް ލިބިގެން ދިޔަ ވީޑިއޯ ގްރަފީގެ ގޮތުގައި ބައިވެރިން ފާހަގަކުރި،" ވަލީދު ވިދާޅުވި އެވެ.
އޭނާ ވިދާޅުވީ މި އިވެންޓަކީ ރިސޯޓް ހޮލިޑޭސް އަދި ރިސޯޓްލައިފުން ރާއްޖެ އިޝްތިހާރު ކުރަން މިހާތަނަށް ހިންގި 10 ވަނަ ހަރަކާތެވެ. މި ހަރަކާތުގައި ވިއްސަކަށް ރިސޯޓަށް ރިކްއެސްޓް ކޮށްފައިވާނެ ކަމަށް ވެސް ވަލީދު ވިދާޅުވި އެވެ. މީގެ އިތުރުން މި އިވެންޓަށް ޓޫރިޒަމް މިނިސްޓްރީ އާއި އެމްއެމްޕީއާރުސީއަށް ވެސް ރިކްއެސްޓް ކޮށްފައި ވާނެ ކަމަށާ ނަމަވެސް އެ ދެފާތުން މި އިވެންޓުގައި ތަމްސީލް ނުކުވުމަކީ ހިތާމަ ކުރައްވާ ކަމެއް ކަމަށް ވެސް ވަލީދު ވިދާޅުވި އެވެ.
މި އިވެންޓް ކުރިއަށް ދިޔައިރު ލައިވް މިއުޒިކްގެ ހަރަކާތްތަކެއް ވެސް މި އިވެންޓް ކުރިއަށް ދިޔަ ހޯލްގައި ބޭއްވި އެވެ.
ކޮމެންޓް
Republic of Maldives