އާޒިމް އެއް އަހަރަށް އެމްޑީޕީން ވަކިކޮށް ބޮޑެތި ފިޔަވަޅުތަކެއް އަޅައިފި

މެދުހެންވޭރު ދާއިރާގެ މަޖިލީސް މެމްބަރު އަލީ އާޒިމް އެއް އަހަރު ދުވަހުގެ މުއްދަތަށް އެމްޑީޕީން ވަކިކޮށް ޕާޓީގެ ފިޔަވަޅު އަޅާ ކޮމެޓީ އިން އޭނާއަށް ބޮޑެތި ފިޔަވަޅުތަކެއް އަޅައިފި އެވެ.

އެމްޑީޕީގެ ފިޔަވަޅު އަޅާ ކޮމެޓީ އިން އާޒިމްގެ މައްސަލަ ބަލަން ފެށީ ކުރީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަނުނާ ގުޅިގެން ޗާގޯސް މައްސަލައިގައި އިދިކޮޅު ޕާޓީތަކާ ގުޅިގެން މަސައްކަތްކޮށް އަދި އެ މައްސަލައިގައި ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައަށް ތާއީދުކޮށް ސޮއި ކޮށްފައިވާތީ އެވެ.

މި މައްސަލަ ބެލުމަށްފަހު ތިން ފިޔަވަޅެއް އަޅަން ކޮމެޓީ އިން ނިންމާފައިވެ އެވެ. އެއީ:

އެމްޑީޕީގެ ފިޔަވަޅު އަޅާ ކޮމެޓީން މިއަދު އާންމުކުރި ރިޕޯޓުގައި ބަޔާންކޮށްފައިވާ ގޮތުގައި، ބަންޑާރަ ނައިބް ރިފްއަތުގެ އިތުބާރު ނެތް ކަމަށް އެމްޑީޕީގެ އެއްވެސް ގުނަވަނަކުން ނިންމާފައިނުވާއިރު، ބަންޑާތަ ނައިބްގެ އިތުބާރު ނެތް ކަމަށް އާޒިމް ސޮއިކުރެއްވީ ޕާޓީގެ ސިޔާސަތުތަކާ ދެކޮޅަށް ކަމަށެވެ.

އިދިކޮޅު ފަރާތްތަކުން ޗާގޯސް މައްސަލައިގައި ބޭއްވި ދެ ޕްރެސް ކޮންފަރެންސެއްގައި ޕާޓީގެ ސިޔާސަތުތަކާމެދު ނުރުހުން ފާޅުކޮށް، ރައީސް އިބްރާހިމް މުހައްމަދު ސޯލިހަށް އާޒިމް ފާޑުވިދާޅުވެފައިވާ ކަމަށް ރިޕޯޓުގައި ބަޔާންކޮށްފައިވެ އެވެ.

"ޕާޓީގެ ޕާލަމެންޓަރީ ގްރޫޕުގެ މެމްބަރަކު އިދިކޮޅު ފަރާތްތަކުން އިންތިޒާމްކުރާ މި ބާވަތުގެ ސިޔާސީ ހަރަކާތްތަކުގައި ބައިވެރިވުމަކީ، ޕާޓީގެ އަސާސީ ގަވާއިދާ ކަނޑައެޅިގެން ހިލާފު ކަމެއް ކަމުގައި ކޮމެޓީގެ ހުރިހާ މެމްބަރުން އިއްތިފާގުވޭ،" ރިޕޯޓުގައި ބަޔާންކޮށްފައިވެ އެވެ.

ރިޕޯޓުގައި އިތުރަށް ފާހަގަކޮށްފައިވާ ގޮތުގައި އެމްޑީޕީގެ ރިޔާސީ ކެނޑިޑޭޓަކީ ރައީސް ސޯލިހު ކަމަށްވާއިރު، މިދަނޑިވަޅުގައި އެފަދަ ހަރަކާތްތަކުގައި ބައިވެރިވުމަކީ ޕާޓީގެ މަސްލަހަތަށް ގެއްލުންވާނެ ކަމެއް ކަމަށް ވެސް ބަޔާންކޮށްފައިވެ އެވެ. 

މި މައްސަލައިގައި ފިޔަވަޅު ނާޅައިފިނަމަ ކުރިމަގުގައި އެހެން މެމްބަރުން ވެސް މިބާވަތުގެ އަމަލުތައް ހިންގުން ތަކުރާރުވެދާނެ ކަމަށް ވެސް ބަޔާންކޮށްފައިވެ އެވެ.

އެމްޑީޕީގެ ފިޔަވަޅު އަޅާ ކޮމެޓީ އިން މި މައްސަލަ ބަލަން ފެށުމުން ނަޝީދު ވަނީ ނުރުހުން ފާޅުކުރައްވާފަ އެވެ. ޕާޓީ އިން އެންމެ ފުރަތަމަ ވަކިކުރަންވީ ރައީސް ސޯލިހު ކަމަށް ވެސް މިއަދު ވިދާޅުވެފައިވެ އެވެ.