އިންތިހާއަށް ޑެންގީ އިތުރުވެ ލަންކާ ހުމާ ފިހެނީ

އަވަށްޓެރި ސްރީލަންގައި ޑެންގީ ހުން ހަލުއި މިނުގައި އިންތިހާއަށް ފެތުރެމުން އެބަދެ އެވެ. ލަންކާގެ ނޭޝަނަލް ޑެންގީ ކޮންޓްރޯލް ޔުނިޓް (އެންޑީސީޔޫ) އިން ބުނީ މި މަހުގެ ފުރަތަމަ ދެ ހަފްތާގެ ތެރޭގައި އެކަނި ވެސް ޑެންގީ ހުން ޖެހިގެން ގާތްގަނޑަކަށް 4،000 ނޮވެލް ކޭސް ރިޕޯޓް ކޮށްފައިވާ ކަމަށެވެ. 

އަދި ބުނެފައި ވަނީ މުޅި ލަންކާގައި ޑެންގީ ފެތުރޭލެ ހަލުއި ކަމުން އާންމު ބަލިމަޑުކަމެއް ކުރިމަތި ވެދާނެ ކަމުގެ ކަންބޮޑުވުންތަކެއް މުޅި ލަންކާގައި އުފެދިފައި އެބައޮތް ކަމަށެވެ.

ލަންކާގައި މި އަހަރުގެ ޖެނުއަރީ އެއް ވަނަ ދުވަހުން ފެށިގެން މިހާތަނަށް ޖުމްލަ 33،656 ޑެންގީ ކޭސް ރިޕޯޓް ކޮށްފައިވާ ކަމަށް އެންޑީސީޔޫއިން ވަނީ ހާމަ ކޮށްފައި ވެއެވެ. އަދި މިހާތަނަށް ޑެންގީ ޖެހިގެން 20 މީހަކު މަރުވެފައި ވެއެވެ. އެ ޔުނިޓުން ބުނީ މިހާރު ކުރިމަތިވެފައިވާ މޫސުން ގޯސްވުމުގެ ދުވަސްތަކުގެ ސަބަބުން މަދިރި އާލާވުން އިތުރުވެ ޑެންގީގެ ބިރު ބޮޑުވެ އިތުރަށް ހާލަތު ގޯސްވުމުގެ ފުރުސަތުވެސް ވަރަށް ބޮޑު ކަމަށެވެ.

މި ހިނގާ މެއި މަހުގެ ފުރަތަމަ ހަފުތާގައި އެއްކުރި މަޢުލޫމާތަށް ބަލާއިރު ވެސް 1،954 ޑެންގީ ކޭސް ރިޕޯޓް ކޮށްފައިވާއިރު، 51.7 ޕަސެންޓް ރިޕޯޓް ކޮށްފައިވަނީ ހުޅަނގު ޕްރޮވިންސު ތަކުންނެވެ. އެންމެ ގިނަ ޑެންގީ ހުމުގެ ކޭސް ފެނިފައި ވަނީ ގަމްޕަހާއިންނެވެ. އެ ޕްރޮވިންސުގައި 475 މީހުނަށް ޑެންގީ ޖެހިފައިވާއިރު ވެރިރަށް ކޮލަމްބޯގައި 412 މީހުންނަށް މި މަހު ޑެންގީ ޖެހިފައި ވެއެވެ. 

ކޮލަމްބޯ އަކީ ދިވެހިން ވަރަށް ގިނައިން ގޮސް އުޅޭ އަދި ދިވެހިންގެ ބޮޑު އާބާދީއެއް ދިރިއުޅޭ ސިޓީއެކެވެ. މުޅި ލަންކާގައި ދިވެހިންގެ 16،000 އަށް ވުރެ ގިނަ މީހުން އުޅެ އެވެ.