އުލިގަމަށް އުލިފުށި: ރިސޯޓް ލައިފުން 50 ކޮޓަރީގެ ހޮޓަލެއް
އުލިގަމްގައި ހޮޓަލެއް ހަދަން ބިޑް އުސޫލުން ލިބުނީ ރިސޯޓްލައިފް އަށެވެ. އެ ކުންފުނިން މިތަނުގައި 100 މިލިއަން ރުފިޔާއަށްވުރެ ބޮޑު އިންވެސްޓްމަންޓެއް ކުރާނެ އެވެ.
ރާއްޖޭގެ ޓޫރިޒަމްގެ އެއްވަނަ މާކެޓު ރަޝިއާ "ހިފަހައްޓަން" އެންމެ ބުރަކޮށް މަސައްކަތް ކުރައްވާ އެއް ބޭފުޅަކީ ރިސޯޓް ލައިފްގެ ވެރިޔާ މުހައްމަދު ޝާޒް ވަލީދު އެވެ. އޭނާ ގަދަޔަށް ކުރެއްވި މަސައްކަތް ސަރުކާރާއި ޓޫރިޒަމް ސިނާއަތުގެ އެއްބާނީ ކަމަށްވާ ޗަމްޕާ ހުސެއިން އަފީފުމެން ފަދަ ބޭފުޅުން ވެސް ތައުރީފު ކުރައްވަ އެވެ. އެކަމަކު މި ފަހަރު ޓޫރިސްޓުން ރާއްޖެ ގެނައުމަށް ވުރެ ރިސޯޓްލައިފްގެ ފިޔަވަޅު މިވަނީ މައްޗަށް ނަގަން ނިންމާފަ އެވެ. ޝާޒުގެ ބޮޑު އިންވެސްޓްމަންޓެއްގެ ގޮތުގައި ސިޓީ ހޮޓަލެއް އަޅަން ވަނީ އަމަލީ މަސައްކަތް ފަށަން ތައްޔާރުވެފަ އެވެ.
ރާއްޖޭގެ އެންމެ ރީތި އެއް ސަރަހައްދު ކަމަށްވާ ބޮޑުތިލަފުންމަތީގެ އުލިގަމުގައި އެމްޓީޑީސީ އިން ސިޓީ ހޮޓަލެއް ހަދަން ފަށާއި "ގާވެފައިވާ" ތަނުގައި ބޮޑު ސިޓީ ހޮޓަލެއް އެޅުމުގެ މަސައްކަތް ކުރަން ބިޑް އުސޫލުން ލިބިފައިވީ ރިސޯޓްލައިފް ކުންފުންޏަށެވެ.
ހޮޓަލުން ބައެއް މިއަހަރު ހުޅުވާނެ
އުލިގަމުގައި "އުލިފުށީ" ގެ ނަން ދީގެން ހަދަން ފަށާ ޓޫރިޒަމް މަޝްރޫއުއާ ބެހޭ ގޮތުން ރިސޯޓްލައިފްގެ ވެރިޔާ ޝާޒް "މި" ނޫހަށް ވިދާޅުވި ގޮތުގައި އުންމީދީ އެ މަޝްރޫއު އެ ކުންފުންޏަށް އުލިގަމް ކައުންސިލުން އެވޯޑް ކުމާއެކު މިހާރު އަމަލީ މަސައްކަތުގެ ތެރޭގައި ހިމެނޭ ތިމާވެށީގެ ދިރާސާ އާއި އެނޫން ވެސް ބައެއް ދިރާސާތައް ދަނީ ހަދަމުންނެވެ. އަދި އެތަނުގައި ހަދާނީ ތިމާވެއްޓާ ރަހުމަތްތެރި ސިފަތަކެއް ހުރި ހޮޓަލެއް ކަމަށް ވެސް ޝާޒް ވިދާޅުވެ އެވެ.
"މިހާރު ހޮޓަލުގެ ކުރެހުން ވެސް ގާތްގަނޑަކަށް ފައިނަލް ވެއްޖެ. މިއީ ޖުމުލަ 50 ކޮޓަރީގެ ހޮޓަލެއް. މި ބަލަނީ މީގެ ތެރޭން 30 ކޮޓަރި ނަމަވެސް މި އަހަރު ހުޅުވަން... މާތްﷲ އިރާދަކުރެއްވިއްޔާ އެކަމަށް ބޮޑަށް މަސައްކަތް ކުރާނަން،" ޝާޒް ވިދާޅުވި އެވެ.
100 މިލިއަނަށްވުރެ ބޮޑު އިންވެސްޓްމަންޓެއް
ޝާޒް ވިދާޅުވީ އުންމީދީ މި މަޝްރޫއަށް ގާތްގަނޑަކަށް 100 މިލިއަން ރުފިޔާއަށްވުރެ ބޮޑު އިންވެސްޓްމަންޓެއް ކުރާނެ ކަމަށް ބެލެވޭއިރު މިއީ އުލިގަމަށް ދިރުން ގެންނާނެ މަޝްރޫއަކަށްވެސް ވާނެ އެވެ.
"[އެމްޓީޑީސީ ހޮޓަލު] ގެ މަސައްކަތް ފެށި ހުއްޓިފައި ހުންނަތާ ވަރަށް ދުވަސްވެއްޖެ. އެހެންވެ މި މަސައްކަތުގެ ސަބަބުން އެތަނުގައި އާ ހޮޓަލެއް ހުޅުވި ވަޒީފާތަކެއް ވެސް އިތުރުވާނެ. އެންމެ މަދުވެގެން އުލިގަމުން ބޭނުންވާނެ 200 އެއްހާ ކުދިން. މިކަމަށް އެކަން ހާއްސަ ވާނެ،" ޝާޒް ވިދާޅުވި އެވެ. "މި ހޮޓަލުގެ ސަބަބުން ރަށުގައި ކުރާ އެހެނިހެން މަސައްކަތްތަކަށް ވެސް ދިރުން ލިބިގެން ދާނެ،"
ސަރުކާރުން ބޮޑުތިލަފުންމަތީ ހަނިމާދޫ އިންޓަނޭޝަނަލް އެއާޕޯޓު ތަރައްގީކޮށް ބޭރަށް ދަތުރު ފުޅާކުރެވޭ ގޮތަށް ތައްޔާރުވަމުންދާ ވަގުތެއްގައި ފެށި މި މަޝްރޫއާއެކު މުޅި ތިލަދުންމައްޗަށް މީގެ ފައިދާ ކުރާނެ އެވެ. ހާއްސަކޮށް ވަލީދުއަކީ ކޮވިޑުގެ ތެރޭގައި ވެސް ރާއްޖެއަށް ގިނަ ޗާޓަރުތަކެއްގައި ޓޫރިސްޓުން ގެނައި ބޭފުޅަކަށްވާތީ މި އެނދުތަކާއެކު ތިލަދުންމައްޗަށް ޗާޓަރު ފްލައިޓްތަކެއް ގެނައުމުގެ ދޮރު ވެސް ހުޅުވިގެން ދާނެ އެވެ.
އެމްޓީޑީސީން ކުރީ ކޮންކަމެއް؟
އުލިގަމުގައި ސިޓީ ހޮޓަލެއް ހުޅުވާއިރު މި ހޮޓާ ހުޅުވާ ސަރަހައްދަކީ ސަރުކާރު ކުންފުންޏަކުން ޓޫރިޒަމް ތަރައްގީ ކުރަން ހިންގި އެންމެ ނާކާމިޔާބު މަސައްކަތް ފެނިގެންދާ އެއް ސަރަހައްދެވެ.
އުލިގަމުގައި ހޮޓާ ހަދަން ސަރުކާރު ކުންފުނި އެމްޓީޑީސީއަށް ބިމެއް ދިނީ 27، ފެބްރުއަރީ 2007 ގައި އެވެ. އެ ކުންފުންޏަށް މި މަޝްރޫއު ހިންގަން އެ ރަށުން 36 ހެކްޓަރުގެ ބިމެއް ދީފައި އޮންނަތާ 16 އަހަރު ވަނީ ވެފަ އެވެ. ނަމަވެސް 100 އެނދު އަޅަން ފެށި މަސައްކަތް ކުރިއަށް ނުގޮސް ވަނީ ހުއްޓިފަ އެވެ. މިތަނުގައި ހުރި ބައެއް ތަކެތި ވިއްކާލަން ވެސް ސަރުކާރުން މަސައްކަތް ކުރި އެވެ. އަދި 2020 ގައި އަލުން މިތަނުގައި ހޮޓަލެއް ހަދަން ބިޑަށް ވެސް ލި އެވެ. ނަމަވެސް މަޝްރޫއު ކުރިއަަކަށް ނުދިޔަ އެވެ.
ކޮމެންޓް
Republic of Maldives