ފްލެޓްތައް ނިންމަން އިތުުރު ލޯނެއް ނުނަގާނެ: ފަހި ދިރިއުޅުން

ފަހި ދިރިއުޅުން ކޯޕަރޭޝަނުން ތަަރައްގީ ކުރާ 4،000 ހައުސިން ޔުނިޓްގެ މަސައްކަތް ނިންމަން އިތުރު ލޯނެއް ނަގަން ޖެހޭ ކަމަށް ދެކެވޭ ވާހަކަތައް އެ ކޯޕަރޭޝަނުން ދޮގުކޮށްފި އެވެ.

ފަހި ދިރިއުޅުން ކޯޕަރޭޝަނުން މިހެން ބުނެފައި މިވަނީ އެ ކޯޕަރޭޝަނުން ތަރައްގީ ކުރާ 4،000 ހައުސިން ޔުނިޓްގެ މަސައްކަތް ނިންމަން އިތުރު ލޯނެއް ނަގަން ޖެހޭ ކަަމަށާ ލޯން ހޯދާނެ ގޮތެއް އެ ކޯޕަރޭޝަނުން ބަލަމުންދާ ކަމަށް ބުނެ ދެކެވޭ ވާހަކަތަކާއި ގުޅިގެންނެވެ. ބައެއް ނޫސްތަކުގައިވެސް އެ ވާހަކަތައް ވަނީ ރިޕޯޓްކޮށްފައެވެ.

ބަޔާނެއް މެދުވެރިކޮށް ފަހި ދިރިއުޅުން ކޯޕަރޭޝަނުން ބުނީ ހައުސިން ޔުނިޓްތައް ނިންމަން އިތުރު ލޯނެއް ނަގަން ޖެހޭ ކަމަށް ދެކެވޭ ވާހަކަތަކީ ހަގީގަތާއި ހިލާފު ދޮގު ވާހަކަތަކެއް ކަމަށެވެ. މަސައްކަތް ކުރުމަށް ދެ ލޯނެއް ނަގާފައިވާ ކަމަށާ އެއީ އެ މަޝްރޫއު މުޅީން ނިންމަން އެންމެ ރަނގަޅު އަދަދެއް ކަމަށްވެސް ބުނެފައިވެއެވެ.

އެ ކޯޕަރޭޝަނުން ބުނި ގޮތުގައި 4،000 ހައުސިން ޔުނިޓްގެ މަސައްކަތް ނިންމަން އިތުރު ލޯނެއް ނަގަން ނުޖެހޭނެ ކަމަށާ އަދި ލޯނެއް ނަގަން އެއްވެސް ބަޔަކާއެކު މަޝްވަރާވެސް ކުރަމުން ނުގެންދާ ކަމަށެވެ. 

ފްލެޓްތައް ހަވާލުކުރާނީ ހުރިހާ މަސައްކަތެއް ނިންމުމަށް ފަހު ކަމަށާ އެ ގޮތުން ދޮރުތައް ހަރުކޮށް ފާހާނާ ފިޓިންގްސް ހަރުކޮށް ޓައިލްސް ޖަހައި ލައިޓާއި ފަންކާ ހަރުކޮށް ނިންމާނެ ކަމަށެވެ. އެ ކޯޕަރޭޝަނުން ތަރައްގީ ކުރަމުން ދަނީ ދެ ކޮޓަރި އަދި ތިން ކޮޓަރީގެ އެޕާޓްމެންޓްތައް ހިމެނޭ ފްލެޓްތަކެވެ.