އެސްޓީއޯއިން ޑީސަލާއި ޕެޓްރޯލުގެ އަގު ތިރިއަށް ކޮއްޕާލައިފި

ސަރުކާރުގެ ބޮޑު ފިހާރަ، އެސްޓީއޯއިން ވިއްކާ ޕެޓްރޯލާއި ޑީސަލްގެ އަގު ހެޔޮ ކުރަން ނިންމައި އަގުތައް ތިރިއަށް ކޮއްޕާލައިފި އެވެ. ތެލުގެ އަގުތައް ތިރިއަށް ގެންދިއުމާއެކު މިއަދުން ފެށިގެން ޕެޓްރޯލާއި ޑީސަލްގެ އަގު ހެޔޮ ވާނެ އެވެ.

އެސްޓީއޯއިން އެ ނިންމުން ގެނައީ ދުނިޔޭގެ ބާޒާރުން ތެޔޮ ގަންނަން ލިބޭ އަގު ހެޔޮ ވުމާއި ގުޅިގެނެވެ. ބާޒާރަށް އައި އެ ބަދަލާއެކު އަގާ ކުޅެލުމުން ޕެޓްރޯލް ލީޓަރަކުން 83 ލާރި އަދި ޑީސަލް ލީޓަރަކުން 62 ލާރި ކުޑަވެފައި ވެއެވެ. 

މިހާރު އެސްޓީއޯގެ ސަބްސިޑަރީ، އެފްއެސްއެމްގެ ސްޓޭޝަންތަކުން ޕެޓްރޯލް ލީޓަރެއް 15.14 ރ. އަށް، އަދި ޑީސަލް ލީޓަރެއް 15.70ރ. ލިބޭނެ އެވެ.   

ތެލުގެ އަގު ބޮޑު ކުރިއަސް އަދި ހެޔޮ ކުރި ނަމަވެސް އެސްޓީއޯއިން އަބަދުވެސް ދޭ ސްޓޭޓްމެންޓް މިފަހަރު ވެސް ދިނެވެ. ބުނަނީ އެ ކުންފުނިން އަބަދުވެސް މަސައްކަތް ކުރާނީ ފޯރު ކޮށްދޭ ހިދުމަތްތައް ހުއްޓުމެއް ނެތި، ދެމެހެއްޓެނިވި ގޮތެއްގައި ރައްޔިތުންނަށް ފޯރު ކޮށްދޭން ކަމަށެވެ. އެ ގޮތުން ދުނިޔޭގެ ބާޒާރުގައު ތެޔޮ ގަންނަން ލިބޭ އަގަށް އަންނަ ބަދަލުތަކާއެކު އެސްޓީއޯއިން ތެޔޮ ވިއްކާ އަގުތަކަށް ވެސް ބަދަލު ގެންނާނެ ކަމަށެވެ.

ސަރުކާރުގެ ބޮޑު ފިހާރަ، އެސްޓީއޯއަކީ ރާއްޖެއަށް އެންމެ ފުޅާ ދާއިރާއެއްގައި ތެޔޮ އެތެރެކޮށް ވިއްކާ ކުންފުންޏެވެ. އެ ކުންފުނީގެ ސަބްސިޑަރީ އެފްއެސްއެމް އަކީ "ފިއުލިން ދަ ނޭޝަން" ގެ ޝިއާރުގައި މުޅި ރާއްޖެއަށް ތެޔޮ ފޯރުކޮށްދިނުމުގެ މަސައްކަތްކުރާ  ކުންފުންޏެވެ.