އީދު ތަހުނިޔާ ނާރުވާ، ސްމާޓް މަގުބައްތީގެ ސްކްރީންތައް ނިވިފައި

މާލޭގެ ސްމާޓް ސްޓްރީޓް ލައިޓް / ސްމާޓް މަގުބައްތި ޕްރޮޖެކްޓްގައި ޖެހި ބައްތިތައް، އީދު އާއިރު ދަނޑިތަކުގެ ޑިޖިޓަލް ލެޑް ސްކްރީންތައް ހުރީ ނިވިފަ އެވެ. އެހެންވެ އެ ޑިސްޕްލޭތައް މެދުވެރިކޮށް ރޯދަ މަހުގެ ތަހުނިޔާ އާއި ކައުންސިލްގެ އެހެން މެސެޖްތައް އެރުވި ގޮތަށް އީދުގެ ތަހުނިޔާގެ މެސެޖްތައް އަރުވާފައެއް ނުވެ އެވެ.

މާލެއަށް މޮޑަން ރީތި ލުކެއް ގެނައުމަށް ފެށި ސްމާޓް މަގުބައްތި ޕްރޮޖްކެޓަކީ ޗައިނާގެ ޔުނާން ޕްރޮވިންސްގެ އެހީގައި ކައުންސިލުން ފެށި ޕްރޮޖްކެޓެކެވެ. އެ ޕްރޮޖެކްޓަކީ ޔުނާން ޕްރޮވިންސްގެ ހަދިޔާ އެކެވެ.

ސްމާޓް މަގުބައްތީގެ މަޝްރޫއު އާޓިފިޝަލް ބީޗުން ފެށިގެން ލޮނުޒިޔާރަތް ޕާކާ ހަމަޔަށް ސްމާޓް މަގުބައްތީގެ 10 ދަނޑިއެއް ޖަހާފައިވާއިރު ރޯދަ މަހުގެ ބޮޑު ބަޔަކާ ހަމައަށް އެ ބައްތިތަކުގައި ހިމެނޭ ޑިސްޕްލޭއަށް ކައުންސިލުން މެސެޖްތައް އަރުވަމުން ގެންދިޔަ އެވެ. ނަމަވެސް ބައްތިތަކުގެ ޑިޖިޓަލް ލެޑް ސްކްރީންތައް ނިވެމުން ގޮސް ކުޑައީދު އާއިރު އެއްވެސް ޑިސްޕްލޭއެއް ނުދިއްލެ އެވެ.

މާލޭގައި ޖަހަން ފަށާފައިވާ ސްމާޓް މަގުބައްތިތަކީ ފްރީ ވައިފައި އާއި ޑިޖިޓަލް ލެޑް ސްކްރީނާއި ސްޕީކާ ސިސްޓަމާއި ސީސީޓީވީ ކެމެރާގެ އިތުރުން މޫސުމަށް އަންނަ ބަދަލުތައް ދެނެގަތުމަށް ފަސޭހަ ވާނެހެން އެންވަޔަރަންމަންޓް ސެންސަރު ހަރު ކޮށްފައިވާ މަގުބައްތި ތަކެކެވެ. އޭގެ އެހީގައި ޕަބްލިކް މެސެޖްތަކާއި ދީނީ އިރުޝާދުތަކާއި ނަސޭހަތްތާއި ދުއާ ވެސް ފޯރުކޮށް ދެވޭ ގޮތަށެވެ.

ކައުންސިލުން ބުނެފައިވާ ގޮތުގައި ވިޔަފާރީގެ އުސޫލުން އިޝްތިހާރު ދެއްކޭނެ ގަވާއިދެއް ފާސްކޮށް އެ ފުރުސަތު ވެސް ކުރިއަށްއޮތްތަނުގައި ހުޅުވާލާނެ އެވެ. ސްމާޓް މަގުބައްތީގެ ސީސީޓީވީ ކެމެރާތަކުގެ ކޮންޓްރޯލް އޮންނާނީ ކައުންސިލްގަ އެވެ. ކައުންސިލްގެ ސީސީޓީވީ މޮނިޓަރިންގް ސިސްޓަމްގެ ތެރެއިން އެކަން ބެލަހައްޓައި ސީސީޓީވީ ކެމެރާތަކަށް ރެކޯޑް ކުރެވޭ ފުޓޭޖްތައް ފުލުހުން ބޭނުންވާ ހާލަތުގައި ފުލުހާ ހިއްސާ ކުރާނެ އެވެ.

ސްމާޓް މަގުބައްތި މަޝްރޫއަކީ މާލެސިޓީ ކައުންސިލްގެ މި ދައުރުގެ ސްޓްރެޓެޖިކް އެކްޝަން ޕްލޭންގައި ހިމެނޭ "ޑިޖިޓަލް މާލެސިޓީ" މަޝްރޫއުގެ ބައެކެވެ.