ނައީމާގެ މަރުގެ ތަހުގީގަށް ބައެއް މީހުންގެ ގައިން އިނގިލީގެ ނިޝާން ނަގަނީ

މި މަހުގެ ހަތްވަނަ ދުވަހު، ނ. މަނަދޫގައި އަނިޔާވެރިކޮށް މަރާލާފައި އޮއްވާ ފެނުނު އެ ރަށު އަންނާރުމާގޭ ނައީމާ މޫސާ، 62 ގެ މަރުގެ މައްސަލައިގެ ތަހުގީގަށް އެރަށުގެ ބައެއް މީހުންގެ އިނގިލީގެ ނިޝާން ފުލުހުން ނަގަމުން އެބަދެ އެވެ. 

މަނަދޫ ކައުންސިލުގެ ރައީސް އަބްދުއްރަހްމާން ސަބީހް "މި" ނޫހަށް ވަނީ އެކަން ކަށަވަރު ކޮށްދެއްވާފަ އެވެ. އޭނާ ވިދާޅުވީ އެ މައްސަލައިގެ ތަހުގީގުގެ ބޭނުމަށް ބައެއް މީހުންގެ ފިންގަޕްރިންޓް ނަގަމުން ދާކަމަށް ފުލުހުން ބުނެފައިވާ ކަމަށެވެ. އަދި، ތަހުގީގަށް ކުރިއެރުން ލިބެމުން އަންނަ ކަމަށް ވެސް ފުލުހުންނާ ހަވާލާދީ އޭނާ ވިދާޅުވި އެވެ.

ނައީމާ އޭނާ ދިރިއުޅެމުން ދިޔަ ކޮޓަރީގައި މަރުވެފައި އޮއްވާ ފެނުނީ އޭނާގެ ހަބަރެއް ނުވާތާ ދެ ދުވަހެއް ވެގެން އެ ރަށުގެ ބައެއް މީހުންނާއެކު ފުލުހުން އެގެއަށް ވަދެ ބެލުމުންނެވެ. އޭނާގެ ހަށިގަނޑުގެ ގިނަ ތަންތަނަށް ތޫނު އެއްޗަކުން ހަމަލާދީ، ކަރު ވެސް ބުރި ކޮށްލަން މަސައްކަތް ކޮށްފައި ހުރިއިރު، ޖިންސީ ގުނަވަނަށް ވެސް ހަމަލާ ދީފައި ހުރިކަމަށް މައުލޫމާތު ލިބެއެވެ.

ނައީމާގެ މަރާ ގުޅިގެން ފުލުހުން މިހާތަނަށް ވަނީ އެރަށުގެ ބައެއް ތަންތަން ބަލާ ފާސްކޮށްފައެވެ. އޭގެ ތެރޭގައި އެ ރަށުގެ ފަޅުގެއެއް ހިމެނެއެވެ. އެ ގެ ބަލާފާސް ކުރީ ނައީމާގެ ގެއިން ފެށިގެން ގޮސް، އެ ގެޔަށް ނިމޭ ހުސްފައިގެ ފިޔަވަޅުތަކެއް ފެނުމުންނެވެ.

އެ މައްސަލައިގައި މިހާތަނަށް ފުލުހުން މާބޮޑު މައުލޫމާތެއް ނުދެއެވެ. މީހަކު ހައްޔަރު ނުކުރާއިރު، ތުހުމަތުވާ މީހެއް ވެސް ހާމަކޮށްފައެއް ނުވެއެވެ.