ވައިހުރި ގޮތުން ވަކިވުމާއި ވަކިކުުރުމުގެ ސިޔާސީ ކޮޅިގަނޑެއް!

ކޮންޓްރޯލާ އޮފް އިމިގްރޭޝަންގެ މަގާމު މުހައްމަދު އަހްމަދު ހުސައިން (ހަނަފީ) އަށް ލިބިވަޑައިގަތީ ކިހިނެތް ހެއްޔެވެ. ހަޔާ އެޑިއުކޭޝަން މިނިސްޓަރުގެ ނާއިބަކަށް އައިމިނަތު މުހައްމަދު ސަލީމް (ސޮނީ) ހެރިޓޭޖް މިނިސްޓަރުގެ ނާއިބުކަން ވަލީދާ ވަލީދަށް ވަޑައިގަތީ ކިހިނަކުން ހެއްޔެވެ؟ އެއީ އެ ބޭފުޅުން ގާބިލް ކަމުން ލިބިވަޑަައިގެން މަގާމުތަކެއް ހެއްޔެވެ؟ އެ ސުވާލުގެ ޖަވާބު ވަރަށް ސާފެވެ. ގާސިމް އިބްރާހިމްގެ އެހީތެރިކަން ލިބިވަޑައިގެން އެ މަނިކުފާނު އެއިން ބޭފުޅެއްގެ ނަން ނުފޮނުއްވިނަމަ އެއިން މަގާމަކަށް ހުވަފެނުގައިވެސް ވަޑައިނުގެންނެވުނީހެވެ. އެމްޓީސީސީގެ ސީއީއޯގެ މަގާމަށް އާދަމް އާޒިމް އަދި އެމްޑަބްލިއުއެސްސީގެ އެމްޑީގެ މަގާމަށް ހަސަން ޝާހަށް ފުރުސަތު ލިބިވަޑައިގަތީ ވެސް ގާސިމް އެ ފުރުސަތު ފަހިކޮށް ދެއްވީމަ އެވެ.  

ކިތަންމެ ގަބޫލުކުރައްވަން ދަތިވިޔަސް ހަގީގަތަކީ މިއީ އެވެ. މިއިން ހަމަ އެއްވެސް ބޭފުޅަކަށް މިހާރު އެ ހުންނެވި މަގާމަށް ވަޑައިގެންނެވުނީ ގާސިމްގެ ފުރިހަމަ އެހީތެރިކަން ލިބިވަޑައިގަތީމައެވެ. ގާސިމްގެ ޖުމްހޫރީ ޕާޓީން އެ ބޭފުޅުންގެ ނަންތައް ރައީސުލްޖުމްހޫރިއްޔާއަށް ފޮނުއްވެވީމައެވެ.

މިއިން ބޭފުޅަކު އެހެން ޕާޓީއެއްގައި ހުންނެވި ނަމަވެސް އެ ފުރުސަތު ލިބިވަޑައިނުގަތީސްކަން ކަށަވަރެވެ. ހަގީގަތަކީ މި ބޭފުޅުން ޖުމްހޫރީ ޕާޓީގައި ތިއްބެވީވެސް މަގާމަކަށް ވަޑައިގަތުމުގެ އެންމެ ފަހި ފުރުސަތު އޮތީ ޖޭޕީގައި ކަމަށް ވުމުންނެވެ. ގާސިމްގެ ހިތްޕުޅުގެ ތަނަވަސް ކަމާއި ފުރުސަތުތައް ދެއްވުމުގައި ދީލަތިކަން އެނގިވަޑައިގަންނަވާތީ އެވެ. އެ ނޫން ދެވަނަ އެއްވެސް މަގުސަދެއް / ބޭނުމެއްގައެއް ނޫނެވެ. ގާސިމަށް ތާއީދު ކުރައްވާތީއެއް / ޖުމްހޫރީ ޕާޓީގައި ހުންނެވުމަށް ލޯބި ކުރައްވާތީ އެއް ނޫނެވެ.

މިހާރު މި އޮތީ ގާސިމާއި ޖުމްހޫރީ ޕާޓީ ދޫކޮށްލާފައި "ރައްކާތެރި" ހިސާބަކަށް ދާންޖެހޭ ސިޔާސީ ތޫފާނެއްގެ ކޮޅިގަނޑު ލައްވާލާފައެވެ. މިއީ އެ ޕާޓީއަށް / ގާސިމަށް އާ ކަމެއް ނޫނެވެ. މިއީ ތިން ވަނަ ފަހަރެވެ. ކުރީން 2008 ވަނަ އަހަރު އޮތް ސަރުކާރުން ޖުމްހޫރީ ޕާޓީ ވަކިވާން ޖެހުނު ވަގުތުވެސް އެ ޕާޓީގެ ސްލޮޓްގައި ތިއްބެވި ހުރިހާ ބޭފުޅުންހެން ވެސް ގާސިމާއި ޖުމްހޫރީ ޕާޓީ ދޫކޮށްލެއްވީ އެވެ. ރައީސް ޔާމީންގެ ވެރިކަމުގައި ވެސް ޖޭޕީ ވަކިކޮށް މަގާމުގައި ތިއްބެވި އެ ޕާޓީގެ މެންބަރުންނަށް ޖެހުނީ ކޮންމެވެސް އެއްގޮތެއް އިހްތިޔާރު ކުރައްވާށެވެ. އޭރުގެ އިކޮނޮމިކް މިނިސްޓަރު މުހައްމަދު ސައީދާއި އެންވައިރަމަންޓް މިނިސްޓަރު ތޯރިގް އިބްރާހިމް އާއި އެ ނޫންވެސް އެކި މަގާމުތަކުގައި ތިއްބެވި ހުރިހާ ބޭފުޅުން ވެސް ގާސިމާއި ޖޭޕީ ދޫކޮށް ލެއްވީ އެވެ. ޖުމްހޫރީ ޕާޓީއަށްޓަކައި މަގާމު ދޫކޮށްލެއްވީ އޭރުގެ ޓްރާސްޕޯޓް މިނިސްޓަރު އަމީން އިބްރާހިމް އެކަންޏެވެ.

އޭރުވެސް އޮތީ މިހާރުގެ ހަގީގަތެވެ. އޭރު ޖުމްހޫރީ ޕާޓީ ދޫކޮށްލި ހުރިހާ ބޭފުޅުން ވެސް އެ ޕާޓީގައި ތިއްބެވި އެއީ މަގާމު ލިބިވަޑައިގަތުމަށް އެންމެ ފަސޭހަ މަގަކީ ޖޭޕީގައި ތިއްބެވުމުން ކަަމަށް ވީތީ އެވެ.

ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީން ވަކީން ކެންޑިޑޭޓަކު ނެރެ އެ ޕާޓީ އިސްވެ އުފައްދާ ކޯލިޝަނަކުން ވާދަކުރަން ނިންމާ ޕާޓީގެ ޓިކެޓް ގާސިމް އިބްރާހިމަށް މިހާރު ވަނީ ޓިކެޓް ކަށަވަރު ކުރައްވާފައެވެ. އެއާއެކު ރައީސް ސޯލިހް އާ ދައުރަކަށް އިންތިހާބު ކުރުމަށް އެމްޑީޕީގެ ކޯލިޝަންގެ ތެރެއަށް ޖުމްހޫރީ ޕާޓީ ގެނައުމަށް ކުރަމުން އައި އުންމީދު މުޅީން ގެއްލުނީ އެވެ.

މިހާރު އޮތީ މަގާމުގައި ތިއްބަވަން ބޭނުންނަމަ ޖުމްހޫރީ ޕާޓީން ވަކިވެވަޑައިގަތުމެވެ. އިމިގްރޭޝަންގެ ވެރިޔާ މުހައްމަދު އަހްމަދު ހުސައިން (ހަނަފީ) އާއި ކުންފުނިތަކުގެ ވެރީން ކަމަށްވާ އާދަމް އާޒިމް އާއި ހަސަން ޝާހް އާއި ޑެޕިއުޓީ މިނިސްޓަރުން ކަމަށްވާ ވަލީދާ ވަލީދާއި އައިމިނަތު މުހައްމަދު ސަލީމް (ސޮނީ) އިހްތިޔާރު ކުރެއްވީ ޖުމްހޫރީ ޕާޓީ ދޫކުރައްވާ މަގާމުގައި ތިއްބެވުމެވެ. ހުއްޖަތަކީ ރައީސް ސޯލިހްގެ ވެރިކަން ކުރެއްވުމުގައި ކުޅަދާނަ ކަމާއި ގައުމަށް ގެނެސް ދެއްވި ތަަރައްގީ އާއި ހަމަޖެހުން ބޮޑުވުމެވެ. އެމަނިކުފާނަށް ދެވަނަ ދައުރެއް ހޯއްދަވައި ދެއްވުމަށް ގައުމު އެދި ގޮވާ ގޮވުންތަކަށް އިޖާބަ ދެއްވުމެވެ. އެ ބޭފުޅުންގެ ނަޒަރުގައި މަގާމު ދިފާއު ކުރެއްވުން ނެތެވެ. އޮތީ އިހްލާސްތެރިކަމާއެކު ގައުމަށްޓަކައި ހިދުމަތް ކުރުމެވެ.

މިހާރު ޖޭޕީގެ ވަޒީރުންގެ ގޮތުގައި ތިއްބެވީ ތިން ބޭފުޅެކެވެ. އެއީ ޓްރާންސްޕޯޓް މިނިސްޓަރު ކަމުގައި އައިޝަތު ނަހުލާ އާއި އެންވައިރަމަންޓް މިނިސްޓަރު ކަމުގައި ޑރ. ހުސައިން ރަޝީދު ހަސަން އާއި ޓޫރިޒަމް މިނިސްޓަރު ކަމުގައި ޑރ. އަބްދުﷲ މައުސޫމެވެ. 

މައުސޫމް މިހާރު އެ ހުންނެވީ ޖޭޕީ އިން އެއްފައި ނަންގަވައިގެންނެވެ. ޖުމްހޫރީ ޕާޓީގެ ހުރިހާ ގުރޫޕްތަކުން ރޭ ނިކުންނަވައިފި އެވެ. ދެން އޮންނާނީ އިސްތިއުފާ ދެއްވާ ވަޑައިގަތުމެވެ. މަގާމެެއް ނެތް ދުވަހު ގާސިމްގެ ސަން އައިލެންޑްގެ ވެރިކަން ދެއްވާ ލައްކައެއްހާ ރުފިޔާގެ މުސާރާގައި ބެހެއްޓެވި ދުވަހާއި ގާސިމްގެ ހިޔަނިން ޓޫރިޒަމް މިނިސްޓަރު ކަމަށް ވަޑައިގެންނެވި ދުވަސް މާޒީވީ އެވެ.

ނަހުލާ އާއި ހުސައިން ހައްދަވާނެ ގޮތެއް ނޭންގެ އެވެ. ބަޔަކު / ބޭފުޅަކު ގާސިމާއި ޖުމްހޫރީ ޕާޓީއަށް ވަފާތެރިވެވަޑަައިގަންނަވާނަމަ މި ދެ ބޭފުޅުން ވެވަޑައިގަންނަވާނެ އެވެ. ހައްދަވާ ގޮތެއް ބައްލަވަން ތިއްބަވާށެވެ. 

މިއީ ސިޔާސީ މައިދާނުގައި މިއަދު ވައިހުރި ގޮތުން ވަކިވުމުގެ ކޮޅިގަނޑު އޮތް ގޮތެވެ. ދެން އޮތީ ވައި ހުރި ގޮތުން ވަކިކުރުމުގެ ކޮޅިގަނޑު އޮތް ގޮތެވެ.

ފުރަތަމަ އައީ އެ ކޮޅިގަނޑެވެ. އެމްޑީޕީ ދެބައިވެ ދެ ފެކްޝަނެއްގެ ގޮތުގައި މަސައްކަތް ފެށީއްސުރެ އެކަން ހައްލުކުރައްވާނެ ގޮތެއް ރައީސް ސޯލިހް ގެންދެވީ ހޯއްދަވަމުންނެވެ. ނަމަވެސް އެއްވެސް ކޮޅެއް މެދެއް ފެނިވަޑައިނުގަަތެވެ. އާހިރުގައި ކަަންކަން ބޮޑުވެ ބައިބައިވުން ދިޔައީ ބޮޑުވަމުންނެވެ.

އެމްޑީޕީގެ ރިޔާސީ ޕްރައިމަރީއަށް ފަހު ރައީސް ނަޝީދު ވަނީ "ފިކުރެއްގެ ދިރުން" ނަމުގައި ވަކި ހަރަކާތެއް ހިންގަވަން ފައްޓަވާފައެވެ. ފާޅުގައި ރައީސާ ދެކޮޅަށް ނިކުންނަވާ ތާއީދު ނުކުރައްވާނެ ކަމަށް ވިދާޅުވެ އެވެ. އެމްޑީޕީއަށް އެހެން ގޮތެއް ހޯއްދެވުމަށް ކަމަށް ވިދާޅުވެ ޖުމްހޫރީ ޕާޓީއާއެކު ނަޝީދުގެ މަންދޫބުން ވަނީ މަޝްވަރާވެސް ކުރައްވަން ފައްޓަވާފައެވެ.

އެހާ ހިސާބުން ވަކިކުުރުމުގެ ކޮޅިގަނޑު ފެށުނީ އެވެ. ފުރަތަމަ ވަކި ކުރެއްވީ އެސްޓީއޯގެ މެނޭޖިން ޑިރެކްޓަރުގެ މަގާމުގައި ހުންނެވި ހުސައިން އަމްރެވެ. ދެން ރައީސް އޮފީހުގެ މިނިސްޓަރު ކަމުގައި ހުންނެވި މުހައްމަދު ޝިފާޒެވެ. ޝިފާޒާއި އަމްރަކީ ނަޝީދުގެ އެންމެ ވަފާތެރި ބޭފުޅުންނެވެ. ޝިފާޒަކީ އެމްޑީޕީގެ ނައިބު ރައީސެވެ. ދެން އެގްރޯ ނެޓްގެ ވެރިޔާ ހާރޫނެވެ. އޭނާއަކީ ވެސް ފިކުރެއްގެ ދިރުމަށް ތާއީދު ކުރައްވާ ބޭފުޅެކެވެ. އަދި ރައީސަށް ތާއީދު ނުކުރައްވާތީ އެންވަޔަރަމެންޓް މިނިސްޓްރީގެ އެގްޒެކްޓިވް ޑިރެކްޓަރު ލަގީބް މުހައްމަދު މާހިދުވެސް ވަނީ މަގާމުން ވަކިކޮށްފައެވެ.

އޭގެ ފަހުން ރަށްރަށުގައި ސިޔާސީ އެކި މަގާމުތަކުގައި ތިއްބެވި ނަޝީދަށް ތާއިދު ކުރައްވާ ބައެއް ބޭފުޅުންވެސް އެ ދަނީ މަގާމުތަކުން ވަކި ކުރައްވަމުންނެވެ. އަދި ކުރިއަށް އޮތީ އެވެ. ކުންފުނިތަކުގެ ވެރީންގެ ގޮތުގަ އާއި އެގްޒެޓިކް ޑިރެކްޓަރުންގެ ގޮތުގައިވެސް ނަޝީދަށް ފާޅުގައި ތާއީދު ކުރައްވާ ރައީސާ ދެކޮޅަށް ވާހަކަ ދައްކަވާ ބޭފުޅުން އެބަތިއްބެވި އެވެ. އެ ބޭފުޅުން ވަކި ކުރައްވާނެކަން ޔަގީނެވެ.

ކޮންމެ ބޭފުޅަކު ވަކިކުރެއްވުމާއެކު ރައީސް ނަޝީދުގެ ފަރާތްޕުޅުން އަންނަނީ ޓްވީޓެވެ. ވިދާޅުވަނީ އެއިން ކޮންމެ ބޭފުޅެއްގެ މުސްތަގުބަލް ވަރަށް އުޖާލާ ކަމަށެވެ. ކުރިމަގު އެބަ އޮތް ކަމަށެވެ. މި ސަރުކާރުގެ މަގާމު ގެއްލުމަކީ ދެރައެއް ނޫން ކަމަށެވެ. ނަޝީދު އެ ވިދާޅުވަނީ ޖޭޕީއާއެކު ކުރެވޭ މަޝްވަރާތަކާއެކު އެމަނިކުފާނުގެ ބައިވެރިވުން އޮތް ސަރުކާރެއްގައި މި ބޭފުޅުންނަށް ފުރުސަތު ފަހިކޮށްދެއްވާނެ ވާހަކަ އެވެ.

އެކަމަށް ވުރެ މިވަގުތަށް އެންމެ ޝައުގުވެރިވީ ވައިހުރި ގޮތުން ވަކިވުމާއި ވަކިކުުރުމުގެ ކޮޅިގަނޑުގައި ދެން ވާނެ ގޮތެވެ. ސަރުކާރުގައި ތިބި ބޭފުޅުންގެ ތެރެއިން ދެން ވަކި ކުރައްވާނީ ކޮން ބޭފުޅުންނެއް ހެއްޔެވެ. ނަޝީދާއެކު ތިއްބަވާނީ ކޮން ބޭފުޅުންނެއް ހެއްޔެވެ. މަގާމު ދިފާއު ކުރެއްވުމަށް ނަޝީދު ދޫކޮށްލައްވާ ރައީސް ސޯލިހްގެ ފަޅިއަށް ވަޑައިގަންނަވާނީ ކޮން ބޭފުޅުންނެއް ހެއްޔެވެ.

މަގާމު ދިފާއު ކުރެއްވުމަށް ގާސިމް ދޫކުރައްވާ ވަޑައިގަންނަވަނީ ދެން ކޮންކޮން ބޭފުޅުންނެއް ހެއްޔެވެ. މަގާމު ދޫކޮށްލައްވާ ގާސިމްގެ އަރިހަށް ވަޑައިގަންނަވާނީ ކޮން ބޭފުޅުންނެއް ހެއްޔެވެ. މާ ލަސްތަކެއް ނުވެ އެކަންކަން މުޅީން ޔަގީން ވެދާނެ އެވެ. މި ރޯދަ ނިމޭން ވާއިރަށް މަންޒަރު ސާފުވާނެ އެވެ. ފަހަރުގައި ހައިރާންވެ އަންތަރީސްވާނެ ވަރުގެ ނިންމުންތައްވެސް ނިންމާފާނެ އެވެ. ބަލަން ތިބެމޭ ހިނގާށެވެ.