ދޫކޮށްލާ ބޮލާބިހާ ބަނޑައިދުލުން އަސަރު ހުރި ވިޔަފާރިއެއް!

މައި ސިޓީގެ، މާލޭ ރޯމަސް މާރުކޭޓަށް ޖައްސާލައި މަސް ކަނޑައިދޭ އަށިތައް ކައިރީއަށް ބޮނޑިވެފައި އޮންނަ މެހި ބައިގަނޑުގެ ތެރޭ މަޑުކޮށްލައި ފަސް މިނިޓެއްހައި ތަން އޮބްޒާވް ކޮށްލާށެވެ. ވަރަށް އާދައިގެ ގޮތަކަށް އެކަމަކު ވަރަށް ރަނގަޅު އަދި އަސަރު ހުރި ވިޔަފާރިއެއް އުފެދި ދިރިގެން އަންނަ ގޮތް ފެންނާނެ އެވެ. 

މަސް ގަންނަ މީހާ މަސް ހިފައިގެން މަސްކަނޑާ އައްޓަށް ދިއުމުން މަސް ކަނޑައިދޭ މީހާއާ ދެމެދު ހިނގާނެ ކޮމިއުނިކޭޝަނަކީ އެއްމެ ސުވާލެއް ކޮށްލުމެވެ. އެހެން ހުރިހާ ވާހަކައެއް އޮންނާނީ ލޮލަށް ބަލައިލާ ގޮތަކާއި ނިތް އަރުވާލުމަކާއި މަހުގައި ވަޅި ޖައްސާލާ ގޮތެއްގެ މައްޗަށެވެ. ދެކެވޭ ވާހަކަ އޮންނާނީ އިޝާރާތުގެ ބަހުރުވައިގެ ތެރޭގަ އެވެ. 

ހަރުދަނާ ގޮތެއްގައި މަސްކަނޑައިދޭ މީހާގެ ދުލުން ބޭރު ކޮށްލާނެ ހަމައެކަނި ޖުމްލައަކީ "ބޮލާ ބިހާ ބަނޑައިދުލާ ބޭނުން ހެއްޔޭ؟" ކުރާ ސުވާލެކެވެ. އެ ނިމުނީ އެވެ. -- އެ ސުވާލު އަންނަނީ އޭގެ ތެރޭގައި ލަނގޮނޑި، ގޮހޮރާއި ކަށިފަތި ވެސް ހިމެނޭ ގޮތަށެވެ.  މަސް ކަނޑައިދޭ މީހާ އެ ޖުމްލަ ހަދާފައި ވަނީ އޭނާ އިސްކަން ދޭ ތަރުތީބުން ކަމަށް ހީކޮށްލާށެވެ. އެކަން ކުރަނީ އޭނާއަށް ފައިދާއެއް ވާން އޮތް ދިމާއަކަށް މަސްކެނޑުމުގެ ތަރުތީބު ގެންދާން ވެގެނެވެ. އެއީ އޭނާ ވަޅި ގެންގުޅޭން ބޭނުންވާ ގޮތެވެ.

އެ ދިމާއަށް ބަލައިގެން ހުރެ ހިޔާލަށް ގެންނާށެވެ؛ ހިޔާލަށް ގެންނަ ގޮތަށް، މިހެނެއް ނުވޭ ހެއްޔެވެ: 

ކައިބޮއެ އުޅުމުގައި ދިވެހިންނަށް ގަރުދިޔަ އާއި ގަރުދިޔަ މަހާއި ގަރުދިޔަ ބޯ މީރެވެ. ބޮލާ ބިހާ ބަނޑާދުލައި އެހައި މުހިންމެވެ. މެއާ ލަގޮނޑި އާއި ވަރަށް ބޭނުމެވެ. ކަށިފައްޗާ ގޮހޮރު ބަނޑު ހަމަ ކަމުދެ އެވެ. މަހާއި ބިހާއި ލަގޮނޑި އާއި ބަނޑައިދޫ ފަދަ ބާވަތްތަކަކީ ވަރަށް މީރު ވަރަށް ކާން ބޭނުން ބާވަތްކަކެވެ. މި ބާވަތްތަކުން މިހެން ކުޅު ދިޔައި ކުރިޔަސް ކޮންމެވެސް މައްސަލައެއް ދިމާވެފައި ވެއްޖެ އެވެ. އެއީ ދިރިއުޅުމަށް އައިސްފައިވާ ބަދަލުތަކާ އެކުއެކީގަ އެވެ. އިހަށް ލިބުނު ގޮތަށް މަހާއި ބިހާއި ލަގޮނޑި ލިބުމަކީ މިހާރު އެހާ ފަސޭހަ ކަމަކަށް ނުވެ އެވެ. އަދި ދިރިއުޅުން ބަދަލު ވެފައިވާ ގޮތުން އިހަށް ކައި އުޅުނު ގޮތަށް މިހާރުގެ ގޭތެރޭގައި ރަނގަޅު ގަރުދިޔަ ބޮލެއް ކާލުމަކީ މާ ކަމުދާ ކަމަކަށް ވެސް ނުވެއެވެ. މާ ވަސް ގަދައީ އެވެ. އެންމެ ފުކެއް ތިއްކެއް ހަރުލިޔަސް އެޕާޓްމަންޓުން ވަހެއް ނުފިލަ އެވެ. 

ބަލައިގެން ހުންނާށެވެ؛ މިހާ ހިސާބުން އެ އުފެދެނީ މަސްކަނޑައިދޭ މީހާގެ ހާއްސަ ޔުނީކް ވިޔަފާރިއެކެވެ. އެންމެ ކަހަލަ ގޮތަކަށް މާރުކޭޓުން މަސް ގަނެ ކަނޑަން ގޮސް މަހުގެ ބޮލާ ބިހާ ބަނޑައިދުލާއި މެއާ ކަށިފައްޗާއި ލަނގޮނޑި ދޫކޮށްލަނީ އަގަށް މަސްކަނޑައިދޭ މީހާގެ "ބަނޑަ" ށެވެ. އޭނާ އެ ކާލަންވީ އެވެ. އެހެން ވެގެން މަސްކަނޑާން މަހުގެ ނިގޫފަތުގައި ހިފުމާއެކު އެނާ އަހާނީ "ބޮލާ ބިހާ ބަނޑައިދުލާ ބޭނުން ހެެއްޔޭ؟" އެވެ. 

މިހާރު އާންމު ހުރިހާ ގޭބިސީއެއްގައި ދިރިއުޅުން އޮންނަ ގޮތުން ބޮޑު އަގެއްގައި މަސް ގަތަސް ބޭނުން ވާނީ ހަތަރުގަނޑު މަސް ހިފައިގެން އަވަހާ ގެއަށް ދާށެވެ. ފަހަރަކު ބަނޑައިދުލެއް، ބިހެއް ގެންދާނެ މީހަކު ވިޔަސް ގިނަ މީހުން ބޮލެއް ބަނޑައިދުލެއް ބިހެއް މެއެއް ގެންދާކަށް ބޭނުމެއް ނުވެއެވެ. ގޭތެރޭގައި ގަރުދިޔަ ވަސްގަނޑު ހިފައި އެ ނުފިލައިފާނެތީ އެވެ. ގަރުދިޔަ ވަހުގެ ދިރިއުޅުން ކަމަކު ނުދެ އެވެ. ލިފްޓަށް ދިޔަ ފައިބާނެތީ އެވެ. ސިޑި މުޑުދާރު ވާތީ އެވެ.

އެކުލާފައި ދިއުމުން މަސްކަނޑާ މީހުން މަހުގެ އެ ހުރިހާ ސާމާނެއް ތަށިތައްޓާ ވަށިވައްޓަށް ވާ ގޮތަށް ފުނިފުންޏަށް އެއް ކުރަނީ އެވެ. މަސްކަނޑައިދޭ މީހާއަށް ދޫކޮށްލާފައި ދާ މަހާއި ބިހާއި ލަގޮނޑި އާއި ބަނޑައިދޫ މަސްކަނޑާ މީހުން އެއްކޮށް ޕެކޭޖް ހަދަ އެވެ. ބޮޑު އަގުގައި ވިއްކާން އަތުރާލަ އެވެ. އެ ގަންނާނެ މީހަކު ވަންދެން މެހި ބުރާލަ ބުރާލާ ހުރެދާނެ އެވެ. އިރުއިރުކޮޅާ ފެންޖަހާލުމުން ތާޒާވެ އެވެ. ދެން އަދި އެ ދިމާއަށް އުދުހޭ މެހި އައިން މާ ގިނަ ވެއެވެ. 

އަތު ބުރު ވެސް ނާންގާ ފަސޭހަ ކަމާއެކު މަސްކަނޑައިދޭ މީހުން ކުރަނީ ވަރަށް އުނދަގޫ ބުރަ މަސައްކަތެކެވެ. އެމީހުން ކަނޑާ މަހުގެ ސައިޒާއި އަދަދުން އެއިން މީހަކަށް ލިބޭ އާމްދަނީއަކީ ކުރާ އުނދަގޫ ބުރަ ބޮޑު މަސައްކަތާ އަޅާބަލާއިރު އެހައި ރަނގަޅު އަގެއް ނޫނެވެ. ވަރަށް ކުޑަކުޑަ މިންވަރެކެވެ. އެއާހިލާފަށް މަސް ގަންނަ މީހުން ދޫކޮށްލާފައިދާ ބަނޑާއި ބިހާއި ބޮލާއި ބަނޑައިދުލާ، ލަނގޮނޑި އާއި މެއާ ކަށީގފަތީގެ ޕޭކްޖުން މަސް ކަނޑައިދޭ މީހާއަށް މާ ރަނގަޅު އާމްދަނީ ހޯދޭ ގޮތް ވެއެވެ.  "ފަލަގޮދާ" ވަރުގެ ބޮޑު އެއްޗެއް ޖީބަށްލާން ލިބެ އެވެ. 

އަގުތައް ހަދާލާގައި ހުންނަ ގޮތް ވެސް މިހުރީ އެވެ. އާދައިގެ ހެޔޮވަރު ކުޑަ މަހެއްގެ ބޮލެއް ވެސް މަސްކަނޑައިދޭ މީހާ ވިއްކާލަނީ 12ރ. އަށެވެ. ބޮލެއްގެ އަގު 10ރ. އަށް ވައްޓާލާ މީހަކު ވެސް ވަރަށް މަދެވެ. 

ދޮންބިހާއި ކިރުބިހުގެ ތައްޓެއް 150ރ. އިން ފެށިގެން 250ރ. އާ ދެމެދު އެވެ. ބޮލާއި ބިހާއި ބަނޑާއިދުލާ އެހެން ސާމާނު ޕެކެޖް ކޮށްފައިވާ ތައްޓެއް ނަމަ 350ރ. އަށް އަގު އަރުވާފައި ހުރެއެވެ. މަސްކަނޑާ އަށިމަތީން ސާފު ކޮށްލާފައި ވިއްކާ ވަރަށް ތުނި ގޮހޮރެއް ވެސް ވިއްކަނީ 10ރ. އަށެވެ. މެއާ ލަނޑޮނޑިއާއި ކަށިފަތީގެ ޕެކެޖްތައް 100ރ. އިން ދަށެއް ނުވެ އެވެ. މީގެ ޕެކޭޖްތަކުގެ ހައެއްކަ ތަށި ވިއްކާލީމާ ރަނގަޅު އާމްދަނީއެއް ލިބޭ މީހާ ހުންނަ ހިސާބަށް މަސް ކަނޑައިދޭ މީހާއަށް ދެވެއެވެ. 

"މިހެން ލިބޭ މިތަކެތި ގިނައިން ނަގައިގަންނާނީ ސައި ހޮޓާ ހިންގާ މީހުން، ރެސްޓޯރެންޓް ތަކުގެ މީހުން ... ގޭގެއަށް ހަމަ ނުގެންދޭ ވަރަށް މަދުން ނޫނީ. ފަޅު އޮޑި ފަހަރާއި ބޯޓު ފަހަރާއި ސައި ހޮޓާތަކުން ނަގައިގަންނަނީ، ބޭރު މީހުން ވެސް ގަނޭ" މަސްކަނޑައި ދެމުން ދިޔަ މީހެއްގެ ގާތުގައި އެހުމުން އޭނާ ބުނެ ދިނެވެ.

އޭނާ ބުނި ގޮތުގައި މަހުގެ އެ ބާވަތްތައް ގެއަށް ގެންދަން މީހުން ބޭނުން ނުވަނީ އެވެ. އެ މީހުން ދޭށޭ ނޭހިއަސް ނުގެންދެ އެވެ. އެކަމަކު އެއީ ފައިސާ ދީފައި ބަޔަކު ގަންނަ އެއްޗަކަށް ވުމުން އަހާފައި ނޫނީ މަސްކަނޑާ އެކަކު ވެސް އެ ތަކެތީގައި އަތެއް ނުލާނެ އެވެ.

"އެކަނި މަހުގެ ބޯ ގަންނަން ބާޒާރަށް އަންނަ މީހުން ވެސް އުޅޭ، އެކަމަކު އެއީ ވަރަށް މަދު ބައެއް!"

"ގިނަ ގޭގެއަށް ނުއެއް ގެންދާނެ، އެކަމަކު އަހާފައި މި ތަކެތި ހޯދަނީ، މަސްކަނޑާ މީހަކަށް ދުވާލު ލިބޭ އާމްދަނީއަށްވުރެ މިހެން ލިބޭ ބޯކޮޅު ވިއްކާލައިގެން ލިބޭ އާމްދަނީ މާ ރަނގަޅުވޭ! އެކަމަކު ބޯ އެ ލިބެނީ މަސްކަނޑާތީ އެހެންވީމާ ދެކޮޅު ވެސް އެބައޮތް،" މަސްކަނޑައި ދޭން ދާތާ ހަތް އަހަރު ވެފައިވާ މީހަކު ބުންޏެވެ.

ގަރުދިޔަ ބޮލަކީ ރަ މީރު ރަހަ އާއި ވަސް ގަދަ އެއްޗެކެވެ. ގަރުދިގަ ބޮލެއް ކެއުމަކީ ވަރަށް ގަޔާ ވެގެން ރަނގަޅަށް އަތްލައިގެން ކުރެވޭނެ ކަމެކެވެ. ކަށިފަތީގެ މަސް ކެއުމަކީ އެހައި މީރަސް އެހައި ފަސޭހަ ކަމެއް ނޫނެވެ. ރަނގަޅަށް ހޭކިލައިގެން ނޫނީ ކަމަކު ނުދެ އެވެ. 

މާލޭ މަސް މާރުކޭޓްގައި ވަކީން ކަށިފަތި ވިއްކަން ވެސް އަތުރާފައި ހުރެ އެވެ. މަސްކަނޑާއިރު ބާކީވާ ކަށިފައްޗަކީ ވެސް ގަރުދިޔައިގައި ވަރަށް މީރު އެއްޗެކެވެ. އަދި ކަށިފަތީގެ މަސްކޮޅާއި އެހެން ބައިތަކާ އެކުވެފައިވާ ތަކެއްޗަކީ ވަރަށް މީރުކޮށް މީހުން ކައި ލޮވެ އުޅޭ އެއްޗެއްސެވެ. ކަށިފައްޗަކީ މިހާރު އަގު ބޮޑުކޮށް ގަންނަން ޖެހޭ އެއްޗެކެވެ. ރިހާކުރު ކައްކާ ހާނާ ހަދާ މީހުން ވެސް ބައެއް ފަހަރު ކަށިފަތި، ބޮޑު އަގު ދީފައި ގެންދެ އެވެ. އެހެން ގެންދާ ގެންދިއުން ވެސް މަދެވެ. އެއީ މާލޭގައި ރިހާކުރަށް ކައްކާ ގޭގެ މަދުވެފައި ވާތީ އެވެ. މި ހުރިހާ ކަށިފައްޗާއި ބޮލާ ބިހާ ބަނޑައިދުލާއި މޭގަނޑާއި ލޮގޮނޑީގެ ފަހަތުން ހެޔޮވަރު ރަނގަޅު ވިޔަފާރިއެއް އެބަ އުފެދޭ ނޫން ހެއްޔެވެ؟