ކެރެޓުގެ އަގު މާމަތީގައި، މިހާރު ހުރީ 90ރ. ގައި

ކެއުމުގައި އާންމުކޮށް ބޭނުންކުރާ މޭވާ އާއި ތަރުކާރީގެ ތެރެއިން މި ރޯދަމަސް ފެށުނު އިރު އެންމެ ތަދު ކަމަށް ފާހަގަ ކުރެވުނީ ކެރެޓެވެ. ރޯދަ ފެށި އިރު ކެރެޓް ކިލޯއެއް ބާޒާރުގައި ހުރީ 65ރ. އަށެވެ.

ރޯދަމަހުން ތިން ދުވަސް ގޮސް މިހާތަނަށް އާއިރު، ބާޒާރުގައި ކެރެޓް ލިބެން ހުރި ގޮޅިތަކުގެ އަދަދު އިހަށްވުރެ އިތުރު ކަމަށް ފާހަގަ ކުރެވެ އެވެ. ނަމަވެސް ގިނަ ގޮޅިތަކުގައި ކެރެޓު ލިބެން ހުރީ ވަރަށް މަދުންނެވެ. އަދި އޭގެ އަގު މިހާރު ވަނީ ބޮޑުތަނުން މައްޗަށް ޖެހިލާފަ އެވެ.

އިއްޔެ ބާޒާރުގައި ކެރެޓު ކިލޯއެއްގެ އަގު ހުރީ 80ރ. އާއި 120ރ. އާ ދެމެދުގަ އެވެ. އެވްރެޖުކޮށް 90ރ. އަށެވެ. މައިގަނޑު ދެ ބާވަތެއްގެ ކެރެޓް ހުރި އިރު، އޭގެ ތެރެއިން ގިނައިން ލިބެން ހުރި ވައްތަރުގެ ކޮލިޓީ ދެރަކަން ބާޒާރު ކުރަން ދިޔަ މީހުން ފާހަގަ ކުރެއެވެ.

ބާޒާރުގައި ތިބި ވިޔަފާރިވެރިން ބުނާ ގޮތުގައި ކެރެޓުގެ އަގު މަތި ކުރަން ޖެހިފައި ވަނީ ހޯލްސޭލަރުންގެ އަތުން ވެސް ކެރެޓް ނުލިބޭތީ އެވެ. ލިބޭ ފަހަރަކު ވެސް ލިބެނީ ވަރަށް މަދުން ކަމަށްވާތީ އެވެ. 

ރާއްޖެއަށް ކެރެޓު އިމްޕޯޓުކޮށް، ހޯލްސޭލްކުރާ ފިހާރައަކުން ބުނި ގޮތުގައި، މި ވަގުތަށް ގަނޑުކޮށް ވިއްކުން މަޑުޖައްސާލާފައި ވީ ނަމަވެސް މިއަދުގެ އާ ޝިޕްމަންޓެއް ލިބޭނެ އެވެ. މިއަދުގެ ވަގުތެއްގައި އަލުން ހޯލްސޭލް ކުރަން ފަށާނެ އެވެ. 

ކެރެޓް އިމްޕޯޓު ކުރާ ބައެއް ކުންފުނިތަކުގެ ރީޓެއިލް އައުޓްލެޓުތަކުން މިހާރު ވެސް 65ރ. އާއި 70ރ. އާ ދެމެދުގައި ކެރެޓު ކިލޯއެއް ލިބެން އެބަހުއްޓެވެ.