"ކުށްކުރާ ބިދޭސީން ޑީޕޯޓްކުރަން ބޮޑެތި ގޮންޖެހުންތައް އެބަހުރި"

ވޯކް ޕާމިޓާއި ވިސާ ނެތި ރާއްޖޭގައި އުޅޭ ބިދޭސީންގެ ތެރެއިން ކުށްކުރާ ބިދޭސީން ޑީޕޯޓްކޮށްލަން ބޮޑެތި ގޮންޖެހުންތައް އެބަހުރި ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.

މާފަންދު މެދު ދާއިރާގެ މެމްބަރު އިބްރާހިމް ރަޝީދު ކުރެއްވި ސުވާލަކަށް ލިޔުމުން ދެއްވި ޖަވާބުގައި އިމްރާން ވިދާޅުވީ ވޯކް ޕާމިޓާއި ވިސާ ނެތި އުޅޭ ކުށްކުރާ ބިދޭސީންގެ މައްސަލަތައް ބެލުމުގެ މެންޑޭޓް އޮންނަނީ އިކޮނޮމިކް މިނިސްޓްއާއި މޯލްޑިވްސް އިމިގްރޭޝަނުގައި ކަމަށެވެ. އެހެންވެ، މި ދެ މުއައްސަސާއާ ބައްދަލުކޮށް އެކަމަށް ހައްލު ހޯދަން ވޭތުވެދިޔަ ތިން އަހަރު މަޝްވަރާތަކެއް ކޮށްފައިވާ ކަމަށް އިމްރާން ވިދާޅުވި އެވެ.

އިމްރާން ވިދާޅުވީ ކުށުގެ ވެށިން ހައްޔަރުކުރާ ބިދޭސީން އިމިގްރޭޝަނާ ހަވާލުކުރިޔަސް، އިމިގްރޭޝަންގެ ޑިޓެންޝަން ސެންޓަރުގައި ޖާގަ ނެތް ކަމަށެވެ. އަދި މިގޮތަށް ހައްޔަރު ކުރާ ބިދޭސީންގެ ލިޔެކިޔުމެއް ނެތުމުން، އެމީހުން ނިސްބަތްވާ ގައުމުގެ އެމްބަސީން އެއްބާރުލުން ލިބޭ މިންވަރު ދަށް ކަމަށެވެ. އެމްބަސީން ހަމަޖައްސައިދޭން ޖެހޭ ކަންކަން ކޮށްދިނުމުގައި މި ހާލަތުގައި ވަރަށް ގިނަ ވަގުތު ނަގާ ކަމަށް އިމްރާން ވިދާޅުވެފައިވެ އެވެ.

ޑިޓެންޝަން ސެންޓަރުގެ ޖާގަ ނެތުމުން އެތަނުގައި ޖާގަ އިތުރުކުރުމުގެ މަސައްކަތް އިމިގްރޭޝަނާ ގުޅިގެން ކުރަމުން އަންނަ ކަމަށް އިމްރާން ވިދާޅުވެފައިވެ އެވެ.
 
އިމްރާން ވިދާޅުވީ ކުރިން ބިދޭސީން ޝާމިލްވުން މަދު ކުށްތަކާއި ޖިނާއީ ބޮޑެތި ކުށްތަކުގައި ބިދޭސީން ޝާމިލްވާ މިންވަރު އިތުރުވާތީ ސިޔާސަތުތައް ކަނޑައަޅަން ހޯމް މިނިސްޓްރީ އާއި ފުލުހުން ގުޅިގެން ސިޔާސަތުތައް ކަނޑައެޅުމުގައްޔާއި އޮޕަރޭޝަންތައް ހިންގަން އިތުރު ސަމާލުކަމެއް ދެމުން އަންނަ ކަމަށެވެ. 

ބިދޭސީން އާންމުކޮށް ކުރާ ކުށްތަކުގެ ތެރޭގައި ހަށިވިއްކުމާއި ޖުވާ ކުޅުން ހިމެނެ އެވެ. ވޭތުވެ ދިޔަ ތިން އަހަރު އެކަންކަމާ ދެކޮޅަށް އޮޕަރޭޝަންތައް ހިންގާފައިވާ ކަމަށް އިމްރާން ވިދާޅުވި އެވެ. އަދި ޖިނާއީ ކުށްތަކަށް ނުވިޔަސް، މަގުމަތީ ވެހިކަލް ސާފުކުރާ ބިދޭސީންނާއި، މީހުންގެ ފަހަތުން އުޅޭ ބިދޭސީންނާއި، ގަވާއިދާ ހިލާފަށް މަގުމަތީގައި މުދާ ބަހައްޓައިގެން ވިޔަފާރި ކުރާ މީހުންގެ މައުލޫމާތު ފުލުހުން އެއްކޮށް، މަހަކު އެއްފަހަރު ސިޓީ ކައުންސިލާއި ހިއްސާ ކުރަމުންދާ ކަމަށެވެ.

އެކި މުއައްސަސާތަކާ ގުޅިގެން ގަވާއިދާ ހިލާފަށް އުޅޭ ބިދޭސީންނާއި ދެކޮޅަށް މަސައްކަތްތަކެއް ކުރި ނަމަވެސް، ސީދާ އެފަދަ ބިދޭސީންނަށް އަމާޒުކޮށްގެން ފުލުހުންގެ ހިދުމަތުން ހާއްސަ އޮޕަރޭޝަނެއް ނުހިންގާ ކަމަށް އިމްރާން ވިދާޅުވެފައިވެ އެވެ.

ރާއްޖޭގައި ހިންގާ ގިނަ ކުށްކުރުށުގައި ބިދޭސީން ޝާމިލްވެ އެވެ. މާރާމާރީއާއި މީހުން މެރުމުގެ މައްސަލަތަކުގައި ވެސް ފަހަކަށް އައިސް ބިދޭސީން ޝަމިލްވާ މިންވަރު ވަނީ އިތުރުވެފަ އެވެ.