ރޮހިންޔާ ރެފިއުޖީ ކޭމްޕްގައި ރޯވެ 12,000 މީހުން މަގުމަތިވެއްޖެ
މީގެ ކުރީން 2021 ވަނަ އަހަރާއި 2022 ވަނަ އަހަރު ވެސް ރެފިޔުޖީ ކޭމްޕުތަކުގައި 222 އަލިފާނުގެ ހާދިސާ ހިނގި އެވެ. 2021 ވަނަ އަހަރުގެ އަލިފާނުގެ ހާދިސާއެއްގައި 15 މީހުން ވަނީ މަރުވި އެވެ.
އަނިޔާކޮށް ބިރު ދައްކައި އަމިއްލަ ވަޒަން، މިއަންމާއިން "ފައްސައި ބޭރުކޮށްލި" ރޮހިންޔާ މުސްލިމުންގެ ބޮޑު އާބާދީއެއް ބަންގްލަދޭޝްގެ އިރުދެކުނުގައި ދިރިއުޅޭ ރެފިޔުޖީ މައި ކޭމްޕެއްގައި އަނެއްކާވެސް އަލިފާން ރޯވެ ގިނަ އަދަދެއްގެ ބަޔަކު ގެދޮރު ގެއްލިއްޖެ އެވެ.
ލޯކަލް ސުޕްރިންޓެންޑެންޓް އޮފް ޕޮލިސް މުހައްމަދު މަހުފޫޒުލް ރޮއިޓާސް އަށް ވިދާޅުވީ މި ބޮޑު އަލިފާނުގައި އެއްވެސް މީހަކު މަރުވި ކަމުގެ ރިޕޯޓެއް އަދި ނެތް ކަމަށެވެ.
އޭނާ އަދި ވިދާޅުވީ ރޮހިންޔާ ރެފިޔުޖީ ކޭމްޕުތަކުގައި އަލިފާނުގެ ހާދިސާތައް ހިނގުމަކީ ދޭތެރެ ދޭރެއިން ހިނގާ ކަމަށާއި އެކަމަކު މިފަހަރުގެ އަލިފާނަކީ ވަރަށް ބޮޑަށް ފެތުރުނު އަލިފާނަކަށްވި ކަމަށެވެ. ފަޔާ ފައިޓަރުންނާއި ލޯކަލް ފަޔާ ސާވިސަސް އަށް ތަމްރީނު ލިބިފައިވާ ރޮހިންޔާ ރެފިއުޖީ ވޮލަންޓިއަރުން އެކުވެ އަލިފާންގަނޑު ކޮންޓްރޯލް ކޮށްފައިވި ނަމަވެސް މިއީ ވަރަށް ބިރުވެރި ބޮޑު އަލިފާނެއް ކަމަށެވެ.
ރޮހިންޔާ ދަރިކޮޅުގެ މިލިޔަނަކަށްވުރެ ގިނަ ރެފިޔުޖީން ދިރިއުޅޭ ދުނިޔޭގައިވާ އެންމެ ބޮޑު ރެފިއުޖީ ކޭމްޕުން ބޮޑު ބައެއްގައި އަލިފާން ރޯވުމުގެ ސަބަބުން 2,000 އަށްވުރެ ހިޔާ އަނދައި 12,000 އަށްވުރެ ގިނަ ރެފިޔުޖީން، އޮނާއި ސަތަރި ބޭނުން ކޮށްގެން ބިނާކޮށްފައިވާ ވަގުތީ ހިޔާވަހިކަން ގެއްލި މަގުމަތިވެފައި ވެއެވެ.
ބަންގްލަދޭޝްގެ ރެފިޔުޖީންނާ ބެހޭ ސަފީރު މިޖާނޫރް ރަޙްމާން ވިދާޅުވީ މި ހާދިސާގައި 35 މިސްކިތަކާއި ރޮހިންޔާ ކުޑަކުދިންނަށް ތަޢުލީމު އުނގަންނައިދިނުމަށް ބޭނުން ކުރަމުން އައި 21 މަރުކަޒެއް ވެސް ވަނީ އަނދާ ހުލިވެފައިވާ ކަމަށާއި ގިނަ އަދަދެއްގެ ފިހާރަތަކުގައި ރޯވެ މުދާ ވެސް އެކަށް އަނދައިގެން ގޮސްފައިވާ ކަމަށެވެ.
ކޭމްޕުގައި ރޯވީ ކޮން ސަބަބަކާ ހުރެކަން ވެސް އަދި ސާފު ނުކުރެވޭ ކަމަށް ވެސް ރަހުމާން ވިދާޅުވި އެވެ.
މީގެ ކުރީން 2021 ވަނަ އަހަރާއި 2022 ވަނަ އަހަރު ވެސް ރެފިޔުޖީ ކޭމްޕުތަކުގައި 222 އަލިފާނުގެ ހާދިސާ ހިނގި އެވެ. 2021 ވަނަ އަހަރުގެ އަލިފާނުގެ ހާދިސާއެއްގައި 15 މީހުން ވަނީ މަރުވި އެވެ.
ކޮމެންޓް
Republic of Maldives