އަރައިގަނެ ލޫޓުވާލުމެއް ؛ ބިރުވެރި މަންޒަރެއް

މައި ސިޓީގެ ހުޅުމާލޭގަައި "ޖޫސް ޓައިމް" ގެ ނަމުގައި ހިންގަމުން އައި ކެއިންބުއިމުގެ ހިދުމަތްދޭ ތަނަކަށް ބަޔަކު މަރުތެޔޮ ފަދަ ހަތިޔާރަށް ފުދޭނެ އާލާތްތަކާއެކު ވަދެގަނެ އެތަން ލޫޓުވާލާ މަންޒަރު ފެންނަ ވީޑިއޯއެއް އާންމުވެ ސިއްހުން ގެނުވައިފި އެވެ.

އާންމުވެ ވައިރަލް ވެފައިވާ ވީޑިއޯއިން ފެންނަނީ ދެ މީހަކު އެތަނަށް ވަދެގަނެ ލޫޓުވާލާ މަންޒަރެވެ. އޭރު ދެ މީހުން ތިބެނީ ހެލްމެޓް އަަޅައި މޫނު ވެސް ނިވާ ކޮށްގެންނެވެ. ވަދެގެންފައި ވަނީ އެތާނގައި ހިދުމަތް ދޭން ހަދާފައިވާ ކުޑަދޮރަކުންނެވެ. އެ ދެ މީހުން ވަދެގަންނަނީ މަރުތޭލުކުން ތަޅައި ތަންތަން ސުންްނާފަތި ކުރަމުންނެވެ. 

"އެ މަންޒަރު ފެނި ބިރުން ފިތްކަނޑަައިގެންދާ ވަރުވޭ، މި ހަމަ ރާއްޖެތަ؟" ވީޑީއޯ ބަލާފައި މީހަކު އަހާފައި ވެއެވެ.

އެ މީހުން ވަދެގަންނަން ދިޔައިރު އިރު އެތަނުގައި ހުރީ ބިދޭސީ މުވައްޒަފެކެވެ. އެ މިހުން ވަދެ ގަތުމަށް ދިމާ ކުރުމާއެކު އޭނާ އެތަން ދޫކޮށްލައި ބިރުން ވަގުތުން ނިކުމެގެން ދެއެވެ. އަރައިގަތް އެ ދެ މީހުން ވެސް އެ ބިދޭސީ މީހާ ހިފަހައްޓާކަށް ނޫޅެ އެވެ. އެ ދެ މީހުން ވަދެ މުޅި ތަން ފުނޑުފުނޑު ކޮށްލާއި ހަދަ އެވެ. އެ ތެޅުމުގައި މަރުތޭލުން ތަޅާ ތަނުގައި ހުރި ހުރިހާ އެއްޗެއް ވަނީ ހަލާކު ކޮށްލާފަ އެވެ.

މުޅި ތަން ހަލާކު ކޮށް ލޫޓުވާލުމަށް ފަހު ވަތްގަނޑުގައި ހުރި ފައިސާކޮޅު ފޭރި ގަނެ އެ ދެ މީހުން ވަނީ ނިކުމެގެން ބާރަށް ހިނގާފައި ގޮތް ސައިކަލެއްގައި ގޮސްފަ އެވެ. އެ ހުރިހާ މަންޒަރެއް ބަލަން ދުރުގައި ބިރުން ތިބި ތިބި މީހުން އެތަނާ ކައިރިވަނީ އޭގެ ފަހުންނެވެ.

މަންޒަރު ދުށް މީހުން ބުނީ މިއީ އިއްޔެ ހިނގި ލޫޓުވާލުމެއް ކަމަށެވެ. ބައެއް މީހުން ބުނާ ގޮތުގައި މިއީ ހުޅުމާލޭގައި ދިވެހި އަންހެނަކު، ގަވައިދާ ހިލާފަށް ރާއްޖޭގައި އުޅޭ ބަންގަލޭދޭޝް މީހަކާއެކު ހިންގަމުން އައިސް އަންހެން މީހާ އަމިއްލައަށް ހިންގާން ފެށުމުން ބިދޭސީ މީހާ ހިތްހަމަ ނުޖެހިގެން ދިވެހިންގެ ބަޔަކަށް ފައިސާ ދީގެން ހިންގި އެތަން ލޫޓުވާލައި މުދަލަށް ގެއްލުން ދިނުމުގެ އަމަލެކެވެ. އެ ތަނަށް ވަދެ ގަތީ ގޭންގެއްގެ ބައެކެވެ، 

މި ނޫނަސް ބައިވަރު  ވާހަކަތައް މީ ވީޑިއޯއާ ގުޅިގެން މީހުން ހިއްސާކޮށްފައި ވެއެވެ. ނަމަވެސް އެ ވާހަކަތަކުން މީގެ ހަގީގަތް މުޅީން ސާފެއް ނުވެ އެވެ. މި ހާދިސާއާ ގުޅޭ ގޮތުން ފުލުހުން އެއްވެސް އެއްޗެއް ނުބުނެއެވެ.