ކޯޓުން ވޯޓު ބަދަލު ކުރުމަކީ ނަޝީދު ޖޯކް ޖައްސަވާ ކަމެއް: މިހާރު ކީއްވެ؟

މިދިޔަ މަހުގެ ބޭއްވި އެމްޑީޕީގެ ރިޔާސީ ޕްރައިމަރީ ރައީސް އިބްރާހިމް މުހައްމަދު ސޯލިހް ކާމިޔާބު ކުރެއްވީ ވޯޓްލީ މީހުންގެ 61 ޕަސެންޓް ވޯޓުންނެވެ. އެއީ 24566 ވޯޓެވެ. އެމަނިކުފާނާއި ވާދަ ކުރެއްވި އެމްޑީޕީގެ ރައީސް މުހައްމަދު ނަޝީދަށް ލިބިވަޑައިގަތީ 15641 ވޯޓެވެ. އެއީ ވޯޓްލީ މީހުންގެ 39 ޕަސެންޓެވެ.

އެ އިންތިހާބުގެ ނަތީޖާ ގަބޫލު ކުރައްވަން ފުރަތަމަވެސް ނަޝީދު ދެކޮޅު ހެއްދެވި އެވެ. ދެ ރައީސުންގެ މެދުގައި 8،925 ވޯޓްގެ ބޮޑު ފަރަގެއް އޮތަސް ނަތީޖާ ޝީޓްތަކުން ކުރީގައި އުޅުއްވަނީ އެމަނިކުފާނު ކަމަށް ވިދާޅުވަމުން ގެންދިޔަ އެވެ. ވަގުތީ ނަތީޖާ އިއުލާނު ކުރުމުން އެ ވާހަކަފުޅު ބަދަލު ކުރެއްވި އެވެ. ރައީސް ސޯލިހަށް 24،000 ވުރެ ގިނަ ވޯޓް ލިބިވަޑައިގެންފަައިވާ ކަމަށް ދެއްކި ނަމަ ވެސް އެއީ ކަށަވަރު ކުރަން ޖެހިފައިވާ އަދަދެކޭ ވިދާޅުވެއެވެ.

ނަޝީދު ދެކެ ވަޑައިގަންނަވާ ގޮތުގައި ރިޔާސީ ޕްރައިމަރީގެ ވޯޓުލުމުގައި ހިނގާފައިވާ އޮޅުވައިލުންތައް އެއްކިބާ ކޮށްފިނަމަ ރައީސް ސޯލިހަށް ލިބި ވަޑައިގެންނެވި ކަމަށް ބުނާ ވަރަށް ގިނަ ވޯޓުތައް އުނިވެގެން ދާނެ އެވެ. ރައީސް ސޯލިހު މޮޅެއް ވާނީ ކުޑަ ފަރަގަކުންނެވެ.

"އަޅުގަނޑު ލަފާ ކުރަނީ ވޯޓުލީ ލިސްޓަށް ބަލައިފި ނަމަ ކުޑަ ފަރަގަކުން ރައީސް ސޯލިހު މޮޅުވެދާނެ ކަމަށް،" ނަފުސާ ދެކޮޅަށް ބަލި ގަބޫލު ކުރައްވައި ފުރަތަމަ ފަހަރަށް ވިދާޅުވި އެވެ.

ރިޔާސީ ޕްރައިމަރީން މޮޅުވެ ވަޑައިގަތީ ރައީސް ސޯލިހެވެ. ރައީސް ސޯލިހަށް ރިޔާސީ ޓިކެޓް ރަސްމީކޮށް އެރުވުމަށް ވަގުތު ކުޑަތަންވެފައި އޮއްވާ ކުއްލި ގޮތަކަށް އެ އިންތިހާބުގެ މައްސަލަ ރައީސް ނަޝީދުގެ ފަރާތްޕުޅުން ކޯޓަށް ގެންދިޔަ އެވެ. ރައީސް ނަޝީދުގެ ކެމްޕެއިންގައި އިސްކޮށް އުޅުއްވި ބޭފުޅުންނާއި އެމަނިކުފާނަށް ވެރިކަން ހޯއްދަވައި ދިނުމަށް މަސައްކަތް ކުރައްވާ ގާނޫނީ ވަކީލުން އިސްވެ ތިއްބަވާ ހުށައެޅުއްވި މައްސަލާގައި ތިން ކަމަކަށް އެދެ އެވެ.

އެއް ކަމަކީ ރިޔާސީ ޕްރައިމަރީ ބާތިލުކޮށް އަލުން ޕްރައިމަރީ ބާއްވަން އަމުރު ކޮށް ދިނުމެވެ. ދެވަނަ ކަމަކަށް ރައީސް ސޯލިހަށް ރިޔާސީ ޓިކެޓް އެރުވުން ހުއްޓުވައިދޭށެވެ. އެމްޑީޕީގެ ދަފްތަރުން އުނިކުރި 39،000 މެންބަރުން އެ ޕާޓީގެ ދަފްތަރުގައި ހިމެނުމަށް އެމްޑީޕީގެ މައްޗަށް އަމުރެއް ނެރެދޭށެވެ. އެއީ ނަޝީދު ބޭނުންފުޅުވާ ގޮތެވެ. އެމަނިކުފާނުގެ "ފިކުރެއްގެ ދިރުން" ފެކްޝަނުން އެދޭ ގޮތެވެ. 

ނަޝީދަކީ ރާއްޖޭގެ ފުރަތަމަ ޑިމޮކްރެޓިކް ހަމައިން ވެރިކަމަށް ވަޑައިގެންނެވި ލީޑަރެކެވެ. ރާއްޖެއަށް ޒަމާނީ ޑިމޮކްރަސީ ގެނައުމަށް ގަދަ އަޅައި ނުކުންނެވި ލީޑަރެވެ. އެހެން ނަމަވެސް މިހާރު އެމަނިކުފާނާއި "ފިކުރެއްގެ ދިރުން" ފެކްޝަނުގެ މަސައްކަތް ހުރީ ޑިމޮކްރެޓިކް ހަމައިގައިތޯ މީހުން ސުވާލު ކުރެ އެވެ. ނަޝީދުގެ ފަރާތްޕުޅުން މިހާރު މުޅީން އަންނަނީ އެމަނިކުފާނާއި އެ މަނިކުފާނު ރައީސްކަން ކުރައްވާ އެމްޑީޕީގެ ވާދަވެރީން ކުރާ ކަމަށް ބުނަމުން އައި ކަންކަމެވެ. 

ޕީޕީއެމަކީ ރައީސް އަބްދުﷲ ޔާމީނަކީ ރައްޔިތުންްގެ ވޯޓުން ކަަންކަން ނިންމުމުގެ ބަދަލުގައި ކޯޓުން ކަންކަން ނިންމަން އުޅޭ ބައެއްގެ ގޮތުގައި ސިފަކޮށް ވާހަކަ ދެއްކެވީ ނަޝީދެވެ. ރައްޔިތުންގެ ނިންމުން ބަދަލު ކުރަން ރައީސް ޔާމީނާއި ގާސިމް އިބްރާހިމް ކޯޓަށް ވަޑައިގަންނަވާ ކަމަށް ވިދާޅުވެ އެންމެ ބޮޑަށް ފާޑުވިދާޅުވަނީ ނަޝީދާއި އެމްޑީޕީންނެވެ. ހާއްސަކޮށް ނަޝީދުގެ އަރިހުގަައި މިއަދު ތިއްބެވި "ފިކުރެއްގެ ދިރުން" ހިންގަވާ ބޭފުުޅުންނެވެ.

މިހާރު ނަޝީދާއި އެމަނިކުފާނުގެ އަރިސް ބޭފުޅުން ވެސް އިހްތިޔާރު އެ ކުރެއްވެވީ އެ ގޮތެވެ. އެމްޑީޕީގެ 40،887 މެންބަރުން ނިކުމެ ވޯޓްދީ ނިންމި ގޮތް ކަމު ނުގޮސްގެން އެ ގޮތް ބަދަލު ކުރަން ކޯޓަށް މައްސަލަ ގެންދިޔައީ އެވެ. ކޯޓުން އަމުރެއް ހޯދައިގެން ޕްރައިމަރީ ބާތިލު ކުރަން ބޭނުންވީ އެވެ. މީގެ ކުރިން 2013 ވަނަ އަހަރުގެ ރިޔާސީ އިންތިހާބުގެ ފުރަތަމަ ބުރު ކޯޓުން ބާތިލު ކުރުމުން ފާޑުވިދާޅުވި ބޭފުޅުން ބޭނުން ވަނީ އެމްޑީޕީގެ ރިޔާސީ ޕްރައިމަރީ ބާތިލުކޮށް އަލުން ޕްރައިމަރީ ބާއްވައިދޭން ކޯޓް އަމުރެއް ދޭށެވެ. އެމްޑީޕީގެ ރިޔާސީ ޓިކެޓް ރައީސް ސޯލިހަށް އެރުވުން ހުއްޓުވައި ދިނުމަށް އަމުރެއް ނެރެ ދޭށެވެ. 

ސިޔާސީ ތަޖުރިބާކާރުން ދެކެވަޑައިގަންނަވާ ގޮތުގައި މިއީ ސިޔާސީ ގަޑުބަޑެއް އުފެއްދެވުމުގެ ބޭނުންފުޅުގައި ނަޝީދު އިސްވެ ކުރައްވާ ކަމެކެވެ. ކޯޓަށް މައްސަލަތައް ވެއްދެވުމުގައި އެމްޑީޕީގެ ބައެއް އިސް ބޭފުޅުންނާއި ގާނޫނީ ވަކީލުން ބޭރަށް ދެއްކެވި ނަމަވެސް މި މަސައްކަތުގެ އަޑީގައި ހުންނެވީ ނަޝީދެވެ. 

އަނެއްކޮޅުން މިއީ އެއްވެސް އަސާސެއް އޭގެ މައްޗަށް ބިނާވެފައި އޮތް މައްސަލަތަކެއް ނޫންކަން އެމަނިކުފާނަށް ވެސް އެނގިވަޑައިގަންނަވާނެ އެވެ. އެމްޑީޕީގެ ރިޔާސީ ޕްރައިމަރީގެ ނަތީޖާއަކީ ސާފު ނަތީޖާ އެކެވެ. ނަތީޖާގައި ބޮޑެތި އޮޅުވާލުންތަކެއް ހުރި ކަމަށް ބުނާ ބުނުމަކީ ހުސް ވާހަކަ އެވެ. ޕްރައިމަރީގެ ވޯޓް ނެގުމާއި ހަމައަށް ވެސް ނަޝީދުގެ ކޭމްޕުން ވިދާޅުވަމުން ގެންދެވީ ވޯޓް އޮޅުވާލަން އެއްވެސް ފުުރުސަތެއް ނުދެއްވާނެ އެވެ. ރައީސް ސޯލިހްގެ ކޭމްޕުން ވޯޓުން ވައްްކަން ކުރަން ރާއްވަވާ ކޮންމެ ރޭއްވެވުމެއް ފެއިލްކޮށްލާނެ އެވެ. ފާރަވެރިވެ ކަންކަން ހިނގާ ނުހިނގާ ބައްލަވާނެ އެވެ.

އިންތިހާބުގެ ކަންކަން ކުރިއަށް ދިޔައީ ރައްޔިތުންގެ ކުރިމަތީގަ އެވެ. މީޑިއާގެ ހާޒިރުގައެވެ. ދެ ރައީސުންގެ މަންދޫބުންނާއި އޮފިޝަލުންގެ ފުރިހަމަ ފާރަވެރިވުން އޮވެގެނެވެ. ޕްރައިމަރީގައި ހަމަނުޖެހުންތަކެއް ހިނގި އެވެ. ބައެއް ރަށްރަށުގައި ވޯޓްފޮށި ފަޅާލާ ކަރުދާސްތައް އުކާލާ އިރާލުން ފަދަ ކަންކަން ވެސް ހިންގި އެވެ. އެކަމަކު އެއިން އެއްވެސް ކަމަކުން ދެ ރައީސުންނަށް ވީ މޮޅެއް ނެތްކަން އެއީ ހަގީގަތެވެ. އެކަންކަމުން ޕްރައިމަރީގެ ނަތީޖާއަށް އައި ބަދަލެއް ނެތެވެ. ހަމަނުޖެހުން ހިންގި ވޯޓިން މަރުކަޒުތަކުގައި އަލުން ވޯޓްގެ ކަންކަން ފެށުނީ ދެ ރައީސުންގެ މަންދޫބުންނާއި އޮފިޝަލުންގެ ހާޒިރުގައި މައްސަލަތައް ހައްލުކޮށް ރުހުން ހޯދައިގެންނެވެ.

އެހެން ކަމުން ޕްރައިމަރީގެ ނަތީޖާ ސާފުވެ އިންތިހާބުން ކުރި ލިބިވަޑައިނުގަތުމުން ދެން އެ ވާހަކަތައް އަލުން ދައްކަވާ ނިމިގެން ދިޔައީ އިންސާފެއް ނެތް އަނިޔާވެރި ޕްރައިމަރީއެއް ކަަމަށް ބުނުމަށް ޖާގައެއް ނެތެވެ. 

ދެން އޮތީ ރިޔާސީ ޓިކެޓް ހަވާލު ކުރުން ހުއްޓުވުމުގެ އަމުރަކަށް އެދުމެވެ. އެމްޑީޕީން ބުނި ގޮތުގައި އިންތިހާބުގެ ދާއިމީ ނަތީޖާއާއެކު ރައީސް ސޯލިހަށް ވަނީ ރިޔާސީ ޓިކެޓް އަރުވާފައެވެ. މިރޭ އޮންނަ އިވެންޓަކީ ރިޔާސީ ޓިކެޓް އެރުވުމުގެ ރަސްމީ އިވެންޓެކެވެ. އެއީ ޕާޓީގެ ބަދަހިކަން ދައްކާލައި އާ ހިތްވަރަކާއެކު އެމްޑީޕީ އަލުން ނުކުތުމަށް އަޒުމް އާ ކުރުމުގެ އިވެންޓެކެވެ.

އެހެންވީމަ ނިމިފައިވާ ކަމެއް ހުއްޓުވައި ދިނުމަށް ކޯޓަށް މައްސަލައެއް ވެއްދުމަކީ ހެއްވާ ކަމެކެވެ. އެކަން ދިފާއު ކުރައްވާ އަދި މައްސަލަ ކޯޓަށް ހުށައަޅުއްވާ ވަކާލާތު ކުރައްވަން ތިއްބެވި ގާނޫނީ ބޭފުޅުން ވިދާޅުވާ ގޮތުގައި ރަައީސް ސޯލިހަށް ރިޔާސީ ޓިކެޓް ރަސްމީކޮށް އެރުވި ކަމުގެ އެއްވެސް ހެއްކެއް ނެތެވެ. އެހެންވީމަ މިއީ ކޯޓަށް ހުށައެޅޭނެ މައްސަލަ އެކެވެ. އަދި ކޯޓަށް އެކަން ހުއްޓުވައި ވެސް ދެވިދާނެ ކަމެކެވެ.

އެމްޑީޕީގެ އެތެރޭގެ އިންތިހާބުތަކުގައި ބޭނުން ކުރާ ދަފްތަރުން އުނިކޮށްފައިވާ 39،000 ވުރެ ގިނަ މެންބަރުން އަލުން ދަފްތަރު ކޮށްދޭން ކޯޓްގައި އެދުމަކީ ވެސް ވަރަށް ބޮޑު ޖޯކެކެވެ. އެމްޑީޕީގެ އެތެރޭގެ އިންތިހާބުތަކުގައި ބޭނުންކުރާ ދަފްތަރަކީ ސިޔާސީ ހުރިހާ ޕާޓީއެއްގެ ބައިވެރިވުން އޮތް ގަޑުބަޑުވެފައިވާ ދަފްރަތެކެވެ. އެކަން އެމްޑީޕީގެ ލީޑަޝިޕްގެ ހުރިހާ ބޭފުޅުންނަށް ވެސް އެނގިވަޑައިގަންނަވާނެ އެވެ. ނިމިގެންދިޔަ ޗެއާޕާސަން އިންތިހާބުގައި ދެ ރައީސުންގެ ފަޅީން ނުކުންްނެވި ދެ ކެންޑިޑޭޓުންގެ ވެސް އެންމެ ބޮޑު އެއް ވައުދަކީ އިންތިހާބުތަކުގައި ބޭނުންކުރާ ދަފްތަރު ސައްހަ ކުރުމުގެ ވައުދެވެ.

ޗެއާޕާސަން ފައްޔާޒް އެކަން ކުރެއްވީ އެވެ. ދަފްތަރުން އުނިކުރި 39،000 މެންބަރުންގެ ތެރެއިން 15،000 ވުރެ ގިނަ މެންބަރުންނަކީ ސިޔާސީ ހަތް ޕާޓީއެއްގެ ދަފްތަރުގައި ތިބި އެ ޕާޓީތަކުގެ މެންބަރުންނެވެ. އެމްޑީޕީގެ އެތެރޭގެ އިންތިހާބެއްގައި އެހެން ޕާޓީތަކަށް ނިސްބަތްވާ 15،000 ވުރެ ގިނަ މީހުންނަށް ވޯޓްލާން ފުރުސަތުދީ އެ މީހުން ބޭނުން ގޮތަކަށް ނަތީޖާ އަނބުރާލަން ފުރުސަތު ދިނުމަކީ ކޮން ކަހަލަ ކަމެއް ހެއްޔެވެ. 

އިލެކްޝަންސް ކޮމިޝަނުން ސިޔާސީ ޕާޓީތަކަށް ފައިސާ ދެނީ އެ ކޮމިޝަންގައި އޮންނަ ދަފްތަރެއްގެ މައްޗަށް ބަލާފައެވެ. ދަފްތަރު ބޮޑުވި ވަރަކަށް ލިބޭ ފައިސާގެ އަދަދު ގިނަ ވެއެވެ. ކޮމިޝަންގައި އެމްޑީޕީގެ 58،000 މެންބަރުންގެ ދަފްތަރެއް އޮވެ އެމްޑީޕީގައި 96،000 މެންބަރުންގެ ދަފްތަރެއް ބާއްވައިގެން އެ ޕާޓީން ތިބޭނެ ހެއްޔެވެ. އެމްޑީޕީގެ އެތެރޭގެ އިންތިހާބުތަކުގައި ބޭނުން ކުރަމުން އައި 96،000 މެންބަރުންގެ ދަފްތަރަކީ ސައްހަ ދަފްތަރެއް ނަމަ އަދި އެއީ ސައްހަ ނަންބަރެއް ނަމަ އެ އަދަދު ކޮމިޝަންގެ ދަފްތަރުގަައި ނޯންނަންވީ ސަބަބެއް ނެތެވެ. އެވަރުގެ އަދަދެއް އެެމްޑީޕީގައި އޮތްނަމަ ދައުލަތުގެ ބަޖެޓުން އެތައް މިލިއަން ރުފިޔާއެއް އިތުރަށް ލިބުނީ ހެވެ. އެ ފައިސާ ލިބެން އޮތް ނުހޯދާ އެ ޕާޓީން އޮންނާނެ ހެއްޔެވެ. ނޯންނާނެ އެވެ. މިކަމުންވެސް އެތެރޭގެ ދަފްތަރު ގަޑުބަޑުވެފައި އޮތް މިންވަރު ސާފެވެ.

މި ހުރިހާ ކަމަކުން އެތައް ވާހަކައެއް ބުނެ ދެއެވެ. އެއީ ޑިމޮކްރަސީގެ ލީޑަރުން ކަމަށް ދައުވާ ކުރަމުން އައި ބޭފުޅުންގެ ކިބާގައި ޑިމޮކްރަސީގެ އެއްވެސް ސިފައެއް ނެތް ކަމެވެ. ތިމާ ބޭނުން ނުވާ ނަތީޖާއެއް ލިބުމުން ދެން ކުރެވެން އޮތް ކޮންމެ ކަމެއްވެސް ކުރައްވާނެ ކަމެވެ. ސިޔާސީ މައިދާން ގަޑުބަޑުކޮށް ބާރާއި ނުފޫޒު ބޭނުން ކުރައްވައިގެންވެސް ބޭނުންވާ ނަތީޖާ ހާސިލު ކުރައްވަން މަސައްކަތް ކުރައްވާނެ ކަމެވެ.

ވޯޓުން ނިންމާ ނިންމުން ބަދަލު ކުރަން ކޯޓަށް ވަޑައިގަތީ ޔާމީނާއި ގާސިމް އެކަންޏެއް ނޫނެވެ. މިއަދު އެ ލިސްޓަށް ރައީސް ނަޝީދާއި އެމަނިކުފާނުގެ އަރިސް ބޭފުޅުންގެ ނަންވެސް އިތުރުވީ އެވެ. ރައްޔިތުން ނިންމުން ގަބޫލު ކުރައްވަން ދެކޮޅު ހެއްދެވި ލީޑަރުންގެ ލިސްޓްގައި ނަޝީދުގެ ނަންވެސް ހިމެނިވަޑައިގަތީ އެވެ. ސާފުކޮށް ފެންނާން އޮތް ނަތީޖާއެއް ގަބޫލު ކުރަައްވަން ދެކޮޅު ހެއްދެވި ރައީސެއްގެ ގޮތުގައި ހިމެނިވަޑައިގަތީ އެވެ.

ކޮންމެ ކަމަކަށް ގޮތް ނިންމަން ކޯޓަށް ވަޑައިގަންނަވަނީ އެ ނޫން ގޮތަަކުން މޮޅުވެވެން ނެތިގެން ކަމަށް ވާދަވެރީންނަށް އަމާޒު ކުރައްވަމުން ގެންދެވި ބަސް އަމިއްލަފުޅަށް ނިސްބަތް ކުރެއްވީ އެވެ.