ފޯކައިދޫގައި ފެން ބޮޑުވެ ބައެއް ގޭގެއަށް ގެއްލުން ވެއްޖެ

މިހާރު ރާއްޖެއަށް ކުރަމުންދާ ވިއްސާރައިގައި އުތުރުގެ ށ. ފޯކައިދޫއަށް ބޯކޮށް ވާރޭވެހި އެ ރަށުގެ ބައެއް ގެތަކުގައި ފެންބޮޑުވެ ގެއްލުންތައް ލިބިއްޖެ އެވެ.

ވިއްސާރައިގައި ފެން ބޮޑުވުމުގެ ސަބަބުން އެ ރަށުގެ އާންމު ދިރިއުޅުމަށް ވަނީ ބުރޫ އަރާފަ އެވެ. 

ކޮމަންޑޫ ދާއިރާގައި ހިމެނޭ ފޯކައިދުއަށް ރޭ ދަންވަރުގެ ބޮޑު ބަޔަކުން ފެށިގެން ފަތިހާ ހަމައަށް ބޯކޮށް ވާރޭ ވެހިފައިވާއިރު އޭގެ ސަބަބުން ރަށުގެ ބައެއް ސަރަހައްދާއި ގޭގެއަށް ފެންވަދެފައި ވެއެވެ. ބައެއް ގޯތިތަކުގައި ފެން ހެދިފައިވާއިރު ހަ ގެއަކަށް ފެންގަނޑު ދެމިގަނެ ގެއްލުން ވެފައި ވެއެވެ. އޭގެ ތެރޭގައި ހިފާގެންގުޅޭ ސާމާނާއި އަންނައުނާއި އިލެކްޓްރޯނިކް ސާމާނު ހިމެނެ އެވެ.  

ފޯކައިދޫގައި ބޮޑު ބައެއްގައި ފެން ބޮޑުވެފައިވާތީ ފުލުހުންނާއެކު އެ ރަށުގެ ކައުންސިލުން ގެންދަނީ ފެން ހިއްކަމުންނެވެ.

ފޯކައިދޫ ފެން ބޮޑުވި އިރު މޫސުން ގޯސްވެ، މުޅި ރާއްޖެއަށް މިއަދު ވިއްސާރަ ކުރާނެ ކަމަށް ގައުމީ މޫސުމާ ބެހޭ އިދާރާއިން ލަފާކޮށްފައި ވެއެވެ. ރާއްޖޭގެ ބޮޑު ސަރަހައްދަކަށް ރެއިން ފެށިހގެން ދަނީ ވެސް ވިއްސާރަވެ ވާރޭ ވެހެމުންނެވެ. މެޓް އޮފީހުން މިއަދު ވަނީ މުޅި ރާއްޖެއަށް ހުދު ސަމާލެއް ވެސް ނެރެފަ އެވެ. އެ އިދާރާއިން ބުނީ މުޅި ދިވެހި ރާއްޖެއަށް ގުގުރުމާއެކު މިއަދުގެ އެކި ވަގުތުތަކުގައި ބޯކޮށް ވާރޭ ވެހޭނެ ކަމަށް ލަފާ ކުރެވޭ ކަމަށެވެ.

ވާރޭ ވެހޭނެ އިރު ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށް ވެސް ލަފާ ކޮށްފައިވެ އެވެ.

މެޓުން މުޅި ރާއްޖެއަށް މޫސުމުގެ އިންޒާރު ނެރެފައިވާއިރު، އިއްޔެ ރާއްޖޭގެ ދެކުނަށް މޫސުން ގޯސްވެ، ރީނދޫ ސަމާލު ނެރެފައިވެ އެވެ.