ތަކަންދޫ ކައުންސިލްގެ ގޮނޑި އެމްޑީޕީއަށް

ހއ. ތަކަންދޫ ކައުންސިލްގެ އަންހެން މެންބަރު އިންތިހާބު ކުރުމަށް މިއަދު ބޭއްވި ބައި އިލެކްޝަން ސަރުކާރު ހިންގާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ކާމިޔާބު ކޮށްފި އެވެ.

ތަކަންދޫ ކައުންސިލްގެ އަންހެން މެންބަރު އިންތިހާބު ކުރަން ޖެހުނީ ކުރީން މެންބަރަކަށް ހުންނެވި ޒާހިޔާ އަލީ އިސްތިއުފާ ދެއްވުމުންނެވެ. އޭނާ އިންތިހާބު ވީވެސް އެމްޑީޕީގެ ޓިކެޓްގައެވެ.

މިއަދު އޮތް އިންތިހާބުގައި ވާދަކޮށްފައި ވަނީ އެމްޑީޕީގެ ފާތިމަތު ޝައުފާ އާއި އަމިއްލަ ގޮތުން ފަހީމާ މުހައްމަދެވެ. ފަހީމާއަށް ލިބުނީ 203 ވޯޓެވެ. ޝައުފާ ވަނީ 237 ވޯޓް ހޯދާފައެވެ.

ސައްހަ ވޯޓްގެ އަދަދަކީ 440 އެވެ. ބާތިލް ވޯޓްގެ ގޮތުގައި 8 ވޯޓް ގުނާފައިވެއެވެ. މި އިންތިހާބުގައި 675 މީހަކަށް ވޯޓްލުމުގެ ހައްގު ލިބިފައިވިއެވެ. ވޯޓްލީ މީހުންގެ އިންސައްތައަކީ 66.37 ޕަސެންޓެވެ.

ތަކަންދޫ ކައުންސިލްގައި މެޖޯރިޓީ އޮންނަނީ އެމްޑީޕީ އެވެ. ތިން ކައުންސިލަރުން އެމްޑީޕީއަށް ނިސްބަތްވާއިރު ދެ ކައުންސިލަރުން އިންތިހާބުވީ އަމިއްލަ ގޮތުންނެވެ.