މާލެ ބަނދަރަށް ވަނީ އާގު ބޯޓަކުން އަޅާލި ތެޔޮ ކަމަށް ބެލެވޭ : އީޕީއޭ
މާލެ ބަނދަރުގެ އެކި ސަރަހައްދުތަކުން އެޅިފައިވާ ތެޔޮ ހުރިކަމަށް އީޕީއޭއިން ބުނެ އެވެ. އަދި ތެލުގެ ސާމްޕަލް ނަގައިގެން ތަހުގީގު ކުރަމުންދާ ކަމަށްވެސް އީޕީއޭއިން ބުނެ އެވެ.
މާލެ ބަނދަށް ލައްވެފައި ހުއްޓައި ފެނުނީ، މާލެ ކައިރީގައި އޮތް އާގު ބޯޓަކުން އަޅާލި ތެޔޮ ކަމަށް ބެލެވޭ ކަމަށް، އެންވަޔަރަމެންޓް ޕްރޮޓެކްޝަން އޭޖެންސީން (އީޕީއޭ) އިން ބުނެފި އެވެ.
"މި" ނޫހަށް ވާހަކަ ދައްކަވަމުން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް ވިދާޅުވީ ތެލުގެ ސާމްޕަލް ނަގައިގެން ތަހުގީގު ފަށާފައިވާ ކަމަށާ، މިހާތަނަށް ބެލެވެނީ މި ތެލަކީ އާގު ބޯޓަކުން އަޅާލާފައިވާ އެއްޗަކުންވުން ގާތް ކަމަށެވެ. މިއީ މިހާތަނަށް މީހުން ދިރިއުޅޭ ރަށެއްގެ ފަޅުތެރެއަށް ތެޔޮ އެޅިގެން ހިނގި މިފަދަ އެންމެ ބޮޑު ހާދިސާ ކަމަށް އޭނާ ވިދާވި އެވެ.
"ތެޔޮ ހުރި ބަނދަރުގެ އެކި ދިމަދިމާލަށް ވެސް ވަދެފަ. ހުރި މަސްވެރިން ޕާކި ދިމާލުގަ ވެސް. އެހެންވެ ބެލެވެނީ އާގު ބޯޓަކުން އަޅާލި ތެލެއް ކަމަށް،" ނައީމް ވިދާޅުވި އެވެ.
މާލެ ބަނދަރުގައި އެޅިފައިވާ ތެޔޮ ސިފައިންގެ "އޮއިލް ބޫމް" ބޭނުންކޮންގެން ނަގާފައިވާއިރު 18 ފީފާ ނުވަތަ ހައެއްކަ ޓަނުގެ ތެޔޮ ވަނީ މާލެ ބަނދަރުން ނަގާފަ އެވެ. މި ހާދިސާ ހިނގުމާ ގުޅިގެން "މި" ނޫހުން ހެދި އިންޓެޕްތް ރިޕޯޓަކަށް މައުލޫމާތު ދިން މިކަމުގެ އެކްސްޕާޓުންވެސް ބުރަވަނީ މި ތެލަކީ އާއްމުކޮށް ރާއްޖޭގައި ބޭނުން ކުރާ ތެލަކަށްނުވެ އެވެ. މި ތެލުގެ އޮލަކަމާއި ހުރިގޮތަށް ބަލާއިރު ބޮޑަށް ބުރަވަނީ މި ތެޔޮވާނީ ހެވީ ފިއުލް ސީއެސްޓީ 180 ގެ ތެލަށެވެ، މި ތެޔޮ އަޅާނީ އާގު ބޯޓު ފަހަރަށެވެ.
އީޕީއޭ ނައީމް ވިދާޅުވީ ބަނދަރުން ފެނުނު ތެލުގެ ސާމްޕަލް ނަގައިގެން ހަދާ "އޮއިޕް ފިންގާ ޕްރިންޓިން" ހަދަން ފަށާފައިވާ ކަމަށާ، މިކަން ކުރަނީ ދައުލަތުގެ އެކި އިދާރާތައް ގުޅިގެނެވެ. ނަމަވެސް މިކަން ދިމާވި ސަބަބެއް ނުވަތަ ކުރިބަޔަކު ހޯދޭނެ ދުވަހެއް ނޭނގޭ ކަމަށް ނައީމް ވިދާޅުވި އެވެ.
"ބޮޑު ޕްރޮސެސްއެއް މިއީ. މިއީ ވަރަށް އުނދަގޫ ޕްރޮސެސްއެއް،" ނައީމް ވިދާޅުވި އެވެ.
ތެލުގެ ސާޕްމަޕް ނަގައިގެން ތަހުގީގު ކުރިނަމަވެސް މިކަން ކުރި ފަރާތެއް ހޯދަން ރާއްޖެއަށް ފަސޭހަ ނުވާނެ ކަމަށް ތަޖުރިބާކާރުން ވަނީ "މި" ނޫހުގެ "މާލެ ފަޅުން ފަސް ޓަނު ތެޔޮ ؛ ތެލުގެ އަޑީގައި ގިނަ ސުވާލު ތަކެއް" ރިޕޯޓަށް ކިޔައިދީފަ އެވެ. ސަބަބަކީ މިކަމުގެ ތަޖުރިބާއާއި އިލްމްހުރި މީހުން ނެތުމާއި އެނގުނުނަމަވެސް ފިޔަވަޅު އެޅޭނެ ބާރެއް ރާއްޖޭގައި ނެތުމެވެ. ރާއްޖެއަށް ފިޔަވަޅެއް ނޭޅޭނެ އެއް ސަބަބަކީ އިންޓަނޭޝަނަލް މެރިޓައިމް އޮގަނައިޒޭޝަން (އައިއެމްއޯ) އިން ހަދާފައިވާ "މާޕޯލް ރެގިއުލޭޝަން" އަށް ބާރު ލިބިގެން ރާއްޖޭގައި ހަދަން ޖެހޭ "މާޗެންޓް ޝިޕިން އެކްޓެއް" ނެތުމެވެ. އެހެންވެ ރާއްޖެއަކަށް މިފަދަ މައްސަލަތަކުގައި ދެވޭނެ އަދަބެއް ނޯވެ އެވެ. އެހެންވެ އައިއެމްއޯ ގަވާއިދު ތަންފީޒު ކުރުމުގެ ބާރެއް ރާއްޖެ އަކު ނެތެވެ.
ކޮމެންޓް
Republic of Maldives