ހަތް ޕާޓީއެއް ވިހިހާހުން ޖޫރިމަނާކޮށްފި

ސިޔާސީ ޕާޓީތަކުން މާލީ ރިޕޯޓް ހުށަހަޅަން ޖެހޭ ގޮތަށް / ހުށަހަޅަން ޖެހޭ ތާރީހަށް ހުށައަޅާފައި ނުވާތީ ހަތް ޕާޓީއެއް ޖޫރިމަނާ ކޮށްފި އެވެ.

އިލެކްޝަންސް ކޮމިޝަނުން މިއަދު ބުނީ މާލީ ރިޕޯޓް ހުށަހަޅަން ޖެހޭ ގޮތަށް / ހުށަހަޅަން ޖެހޭ ތާރީހަށް ހުށައަޅާފައި ނުވާތީ ޖޫރިމަނާ ކޮށްފައި ވަނީ އަދާލަތު ޕާޓީ އާއި ދިވެހި ރައްޔިތުންގެ ޕާޓީ (ޑީއާރުޕީ) އާއި މޯލްޑިވްސް ނެޝަނަލް ޕާޓީ (އެމްއެންޕީ) އާއި މޯލްޑިވްސް ރިފޯމް މޫވްމަންޓް (އެމްއާރުއެމް) އާއި ޕީއެންސީ އާއި އެމްއެސްއެލްޑީޕީގެ އިތުރުން މޯލްޑިވްސް ތާޑްވޭ ޑިމޮކްރަޓިކް (އެމްޓީޑީ) އެވެ.

އެއިން ކޮންމެ ޕާޓީއެއް ޖޫރިމަނާކޮށްފައިވަނީ 20،000 ރުފިޔާ އިންނެވެ.

އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު "މި" ނޫހަށް ވިދާޅުވީ މާލީ ރިޕޯޓް ހުށަހަޅަން ޖެހޭ ގޮތަށް / ހުށަހަޅަން ޖެހޭ ތާރީހަށް ހުށައަޅާފައި ނުވާތީ ހަތް ޕާޓީ ޖޫރިމަނާ ކުރަން ނިންމީ ކޮމިޝަންގެ އިއްޔެގެ ބައްދަލްވުމުގައި ކަމަށެވެ. އަދި އެ ނިންމުން ޕާޓީތަކަށް މިހާރު ރަސްމީކޮށް އަންގާފައިވާ ކަމަށެވެ.

ޖޫރިމަނާ ފައިސާ އަންނަ ޖަނަވަރީ 31 ގެ ކުރީން އެ ފައިސާ ދައްކަންވެސް ވަނީ އަންގާފައެވެ.

ސިޔާސީ ޕާޓީތަކުގެ ގާނޫނުގައިވާ ގޮތުން ކޮންމެ އަހަރެއްގެވެސް ފުރަތަމަ ތިން މަސްތެރޭ އެ ޕާޓީއެއްގެ މާލީ ރިޕޯޓާއި އަހަރީ ރިޕޯޓް ހުށައަޅަން ޖެހެ އެވެ. މި ހަތް ޕާޓީއަކީ މާޗް 31 ގެ ނިޔަލަށް ރިޕޯޓްތައް ހުށައަޅާފައި ނުވާ ޕާޓީތަކެވެ.

ހަބީބު ވިދާޅުވި ގޮތުގައި ބައެއް ޕާޓީތަކުން މުއްދަތުގައި އެއް ރިޕޯޓް ހުށައެޅި އެވެ. ނަމަވެސް ބައެއް ޕާޓީތަކުން ހުށައެޅީ ހުށައަޅަން ޖެހޭ ގޮތަކަށް ނޫނެވެ. އަދި ބައެއް ޕާޓީތަކުން ރިޕޯޓް ހުށައެޅީ ތާރީހުގެ ފަހުންނެވެ.

ޖޫރިމަނާ ކުރި ފައިސާ މުއްދަތުގައި ނުދައްކައިފިނަަމަ ފަހުގެ ފުރުސަތު ދީ މައްސަލަ ޝަރީއަތަށް ފޮނުވާނެ އެވެ. އަދި ދައުލަތުން ފައިސާ ދޭ ޕާޓީތަކަށް ފައިސާ ދޫކުރާނީ ޖޫރިމަނާ ފައިސާ އުނިކުރުމަށް ފަހު އެވެ.

ނަމަވެސް ޖޫރިމަނާ ކުރި ޕާޓީތަކުގެ ތެރެއިން 10،000 މެންބަރުން ހަމަވެ ދައުލަތުގެ ބަޖެޓުން ފައިސާ ލިބެނީ އަދާލަތު ޕާޓީއަށް އެކަންޏެވެ. ދެން ހުރީ ކިރިޔާ 3،000 މެންބަރުން ހަމަވާ / 3،000 މެންބަރުން ހަމަނުވާ ޕާޓީތަކެވެ. މީގެ ތެރެއިން ޑީއާރުޕީއަކީ 3،000 ހަމަނުވެގެން އުވާލަން ނޯޓިސްވެސް ދީފައިވާ ޕާޓީއެކެވެ. އެ ޕާޓީއަށް ސިޔާސީ އެއްވެސް ހަރަކާތެއް ނުހިންގަންވެސް ކޮމިޝަނުން ވަނީ އަންގާފައެވެ.