ރައީސް ޔާމީން ޖަލަަށްލުމާއެކު، ޔޫޓީއެފް އިންޑިއާ ކުންފުންޏަކަށް

ދިވެހި ސިފައިންގެ ބޭހެއްގެ ގޮތުގައި ހަދަން ވިސްނާފައިވާ، އުތުރު ތިލަފަޅު (ޔޫޓީއެފް) ތަރައްގީ ކުރަން 186 މިލިއަން ޑޮލަރަށް އިންޑިއާގެ ކުންފުންޏަކާ ހަވާލު ކޮށްފި އެވެ.

އިންޑިއާ އިން ރާއްޖޭގެ މަސްލަހަތަށް އަތް ބާނާ ކަމަށް އެންމެ ފާޅުކަން ބޮޑު ގޮތެއްގައި ވިދާޅުވެ އިންޑިއާއަށް ގޮން ޖައްސަވަމުން ގެންދިޔަ ކުރީގެ ރައީސް އަބްދުﷲ ޔާމީންއަށް ކޮރަޕްޝަންގެ ތުހުމަތު ތަކެއްކޮށް 11 އަހަރުގެ ޖަލަށް ލުމާއެކު އުތުރު ތިލަ ފަޅު ހަދަން އިންޑިއާގެ ކުންފުންޏަކަށް ހަވާލުކުރި ހަބަރު ތިލަކުރީ އިންޑިއާގެ ނޫސްތަކުންނެވެ.

އުތުރުތިލަފަޅު ތަރައްގީ ކުރަން ދިވެހި ސަރުކާރާއި އިންޑިއާ ސަރުކާރާ ދެމެދު ހެދި އެއްބަސްވުމުގައި "ފޮރުވިފައިވާ ކަންތައްތަކެއް" އޮތް އިނދިކޮޅާއި ގިނަ އަދަދެއްގެ ރައްޔިތުންގެ ތުހުމަތު އިނގިލި ދިއްކުރި ނަމަވެސް ސަރުކާރުން އެކަން ދޮގުކުރި ބޮޑު މައްސަލަ ހިލުނު ޔޫޓީއެފްގެ މަސައްކަތް ހަވާލު ކޮށްފައި ވަނީ އިންޑިއާގެ ރެއިލް ވިކާސް ނިގަމް ކުންފުންޏާ އެވެ. މި މަޝްރޫއު ހަވާލުކުރީ 186 މިލިއަން ޑޮލަރު ނުވަތަ 2.8 ބިލިއަން ދިވެހި ރުފިޔާއަށް ކަމަށް އިންޑިއާގެ ނޫސްތަކުން ރިޕޯޓް ކޮށްފައިވެ އެވެ.

ނޫސްތަކުގައިވާ ގޮތުން މި ޕްރޮޖެކްޓް ހަވާލު ކުރިކަމުގެ ލިޔުން ރެއިލް ވިކާސް ނިގަމްއަށް ލިބިފައިވަނީ އިއްޔެ އެވެ. ނަމަވެސް މި މަޝްރޫއުގެ އެއްވެސް ވާހަކައެއް ދިވެހި ސަރުކާރުން މިހާތަނަށް އާއްމުކޮށްފައެއް ނުވެ އެވެ.

އުތުރު ތިލަފަޅުގައި ދިވެހި ސިފައިންގެ ކޯސްޓްގާޑަށް ހާއްސަ ބަނދަރެއް ހަދަން އިންޑިއާއާއި ދިވެހި ސަރުކާރުން ސޮއިކުރީ މިދިޔަ އަހަރުގެ ފެބްރުއަރީ މަހު އެވެ. މި މަޝްރޫއުގެ އަސްލު އޮތީ 2016 ގައި މަޝްވަރާކޮށް، ޑިފެންސް އެކްޝަން ޕްލޭނެއްގެ ދަށުންނެވެ. ނަމަވެސް ޔޫޓީއެފް އެއްބަސްވުމުގެ ސަބަބުން ރާއްޖޭގެ ސިޔާދަތަށް ގެއްލުންވާނެ ކަމަށް އިނދިކޮޅު ޕީޕީއެމް / ޕީއެންސީއިން ތުހުމަތުކުރެ އެވެ.

ޔޫޓީއެފް އެއްބަސްވުމުގެ މައްސަލަ ހޫނުވުމުން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ޑިފެންސް މިނިސްޓްރީން ވަނީ މި އެއްބަސްވުން ހިއްސާ ވެސް ކޮށްފަ އެވެ. މި މައްސަލާގައި އިނދިކޮޅު ޕީޕީއެމް ބުނެފައިވަނީ އެއްބަސްވުން 241 ކޮމެޓީގައި ދައްކާލީ ހަމަ ޖަސްޓް ކުޑަ ޕްރެޒެންޓޭޝަނެއްގެ ގޮތުގަ އެވެ.