އަލީ ހާލިދު އަލުން ޕީއެސްއެމަށް، ޝަމީމް ރައީސް އޮފީހަށް

ސަރުކާރުން ހިންގާ ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރު އަލީ ހާލިދާއި ޑެޕުއިޓީ މެނޭޖިން ޑިރެކްޓަރު މުހައްމަދު ޝަމީމްގެ ދައުރު ހަމަވެ މަގާމުން ވަކިވެވަޑައިގެންފައި ވަނިކޮށް އަލީ ހާލިދު އަލުން ޕީއެސްއެމްގެ އެމްޑީގެ މަގާމަށް ހަމަޖައްސަވައިފި އެވެ.

ޕީއެސްއެމްގެ އެމްޑީ އާއި ޑީއެމްޑީގެ މަގާމުގެ މުއްދަތަކީ ހަތަރު އަހަރެވެ. އެމްޑީގެ މަގާމަށް އަލީ ހާލިދު އައްޔަން ކުރެއްވީ ޑިސެންބަރު 25، 2018 ގަ އެވެ. ޑީއެމްޑީގެ މަގާމަށް ޝަ،ީމް އައްޔަން ކުރެއްވީ އޭގެ އެއް ދުވަސް ފަހުން ޑިސެންބަރު 26، 2018 ގައެވެ.

ރައީސުލްޖުމްހޫރިއްޔާގެ އޮފީހުން ބުނީ އަލީ ހާލިދު އަލުން، ޕީއެސްއެމްގެ އެމްޑީގެ މަގާމަށް ހަމަޖައްސަވަން ރައީސް ނިންމަވާފައިވާ ކަމަށެވެ. އެކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އަށް މިހާރު ވަނީ އަންގާފައެވެ.

ދައުރު ހަމަކުރެއްވި މުހައްމަދު ޝަމީމަށް ހަމަޖައްސަވައި ދެއްވީ ރައީސުލްޖުމްހޫރިއްޔާގެ އޮފީހުގެ އިސް މަގާމެކެވެ. ރައީސް އޮފީހުގެ އަންޑަ-ސެކްރެޓަރީގެ މަގާމަށް ޝަމީމް މިއަދު ހަމަޖެއްސެވުމުން މިއަދު ވަނީ އޮފީހަށްވެސް ނިކުންނަވަން ފައްޓަވާފައެވެ.

ރައީސް އިބްރާހިމް މުހައްމަދު ސޯލިހް ކުރީން ވެސް ވަނީ ޕީއެސްއެމްގެ ހިންގުމަށް ބަދަލު ގެންނަވަން އެމްޑީގެ މަގާމާއި ޑީއެމްޑީގެ މަގާމަށް ބޭފުޅުން ހަމަޖައްސަވަން މަސައްކަތް ވެސް ކުރައްވާފަ އެވެ. އެގޮތުން މީޑިއާގެ ވަރަށް ތަޖުރިބާކާރު ދެ ބޭފުޅަކާ ރައީސް ސޯލިހް ބައްދަލު ކުރައްވާ ވާހަކަފުޅު ދައްކަވާ އެއްބަސްވުމަކަށް ވެސް ވަޑަައިގެންނެވި އެވެ. ނަމަވެސް އެކުއެކީގައި މަސައްކަތް ކުރައްވާ އެ ދެ ބޭފުޅުން މަގާމުން އައްޔަން ކުރެއްވުން ފަސް ވުމުން އެ ދެ ބޭފުޅުން އެކުގައި އެހެން މީޑިއާ ކުންފުންޏެއްގެ އިސް މަގާމުތަކަށް ވަޑައިގެންނެވީ އެވެ. އޭގެ ފަހުން ވެސް މަގާމާއި ހަވާލުވެވަޑައިގަތުމަށް އެ ދެ ބޭފުޅުންނަށް ވެސް ރައީސް އޮފީހުން ނޯޓިހެއް ފޮނުވި އެވެ. ފަހުން އެ ބޭފުޅުން އެކަމަށް އިއުތިރާޒު ކުރެއްވީ އެވެ.