ޕޯސްޓްމޯޓަމް ރިޕޯޓް: ނިޝާމާ މަރާލީ ކަރުގައި އެއްޗެއް އަޅާ ނޭވާ ހާސްކޮށްލައިގެން

ހދ. ނޮޅިވަރަމްގައި މަރާލައިފައި އޮއްވާ ފެނުނު، އެ ރަށު ނިޝާމާ މުހައްމަދުގެ ޕޯސްޓްމޯޓަމްގެ ވަގުތީ ރިޕޯޓް ލިބިއްޖެ އެވެ.

ދިވެހި ފުލުހުންގެ ހިދުމަތުންް ދެންމެ ބުނީ އެ ރިޕޯޓްގައިވާ ގޮތުން ނިޝާމާ މަރާލާފައިވަނީ ކަރުގައި އެއްޗެއް އަޅާ ނޭވާ ހާސްކޮށްލައިގެންނެވެ.

ނިޝާމާ މާރާލީ މި މަހުގެ 10 ވަނަ ދުވަހު އެވެ.

ޕޯސްޓްމޯޓަމަށް ނިޝާމާގެ ހަށިގަނޑު ބޭރަށް ފޮނުވާލީ މި މަހުގެ 21 ވަނަ ދުވަހު އެވެނިޝާމާގެ ޕޯސްޓްމޯޓަމް އެ ދުވަހު ހަދާފައިވެއެވެ. އަދި ނިޝާމާގެ ހަށިގަނޑު މިއަދު މާލެ ގެނެސް މަގުރިބު ނަމާދަށް ފަހު ވަނީ ވަޅުލާފައެވެ.

ނިޝާމާ މަރާލުމުގެ ތުހުމަތު އޮތީ އޭނާގެ ފިރިމިހާ އަބޫބަކުރު ފައިސަލް އަށެވެ. ނަމަވެސް އޭނާ ވަނީ ހައްޔަރުކޮށް ތަހުގީގު ޖަލެއްގައި ހުއްޓާ ދަންޖެހި އަމިއްލައަށް މަރުވާން މަސައްކަތް ކުރަނިކޮށް ސަލާމަތް ކޮށްގެން ހޮސްޕިޓަލްގައި ފަރުވާ ދެމުން ދަނިކޮށް މަރުވެފަ އެވެ.

ނިޝާމާ މާރާލާފައި އޮތީ އޭނާ ދިރިއުޅެމުން އައި ގޭގެ ކޮޓަރިތެރޭގަ އެވެ. އޭނާ ފެނުނު އިރު އޭނާގެ މަރުގެ ތުހުމަތު އޮތް ފިރިމިހާ ފުރައިގެން ގޮސް ހުރީ ކުޅުދުއްފުށީގަ އެވެ. ފުލުހުން ކޯޓް އަމުރެއްގެ ދަށުން އޭނާ ހައްޔަރު ކުރީ، އޭނާ އަމިއްލައަށް ފުލުހަށް ހާޒިރުވުމުންނެވެ.

ނިޝާމާ އާއި އަބޫބަކުރު ފައިސަލް މަރުވެފައިވާއިރު އެ ދެމީހުންގެ ކުޑަ ތިން ކުދިން ވަނީ ޔަތީމް ވެފަ އެވެ. މިއީ މި ފަހުން މިފަދަ ހާދިސާއެއްގެ ތެރެއިން އެކުއެކީގައި ދިވެހި ދެމަފިރިއަކު މަރުވެ، ކުދީން ޔަތީމްވި ފުރަތަމަ ފަހަރެވެ.