"ޖަލަށް ލިއަސް ރައީސް ޔާމީނަށް އިންތިހާބުގައި ވާދަ ކުރެއްވޭނެ"

އިދިކޮޅު ލީޑަރު ރައީސް އަބްދުﷲ ޔާމީނުގެ މައްޗަށް ޖަލު ހުކުމެއް އިއްވި ނަމަވެސް އެ މަނިކުފާނަށް ރިޔާސީ އިންތިހާބުގައި ޕީޕީއެމްގެ ޓިކެޓުގައި ވާދަ ކުރެއްވޭނެ ކަމަށް މަޖިލީހުގެ މަހިބަދޫ ދާއިރާގެ މެންބަރު، އަދި ޕީޕީއެމްގެ ސެނެޓާ، އަހުމަދު ތޯރިގު ވިދާޅުވެއްޖެ އެވެ.

އޭނާ ޓްވިޓާ މެދުވެރިކޮށް ނެރުނު ބަޔާނެއްގައި ބުނެފައި ވަަނީ ރައީސް ޔާމީނަށް އަހަރު ދުވަހަށްވުރެ ދިގު ހުކުމެއް ކުރާ ހާލަތެއްގައި އެމަނިކުފާނަށް ރިޔާސީ އިންތިހާބުގައި ޕީޕީއެމްގެ ޓިކެޓުގައި ވާދަ ކުރެއްވުމުގެ ފުރުސަތު ނުގެއްލޭނެ ކަމަށާއި އެފަދަ ހުކުމެއް ކުރި ނަމަވެސް ސުޕްރީމް ކޯޓުގައި އެ ހުކުމަށް ނިހާއީ ސިފަ ނުލިބޭ ހިނދެއްގައި ރިޔާސީ އިންތިހާބުގައި ވާދަކުރެއްވުމުގެ ފުރުސަތު އޮންނާނެ ކަމަށެވެ.

ސުޕްރީމް ކޯޓުން ކާށިދޫ ދާއިރާގެ ކުރީގެ މެންބަރު އިސްމާއީލް އަބްދުލްހަކީމުގެ މައްސަލާގައި ނިންމާފައިވާ ނިންމުމުން ގާނޫނު އަސާސީގެ 109 ވަނަ މާއްދާގައި ބަޔާންކުރާ ޝަރުތު ކަމުގައިވާ "12 މަސްދުވަހަށް ވުރެ ގިނަ ދުވަހުގެ ހުކުމެއް ތަންފީޒު ކުރަމުންދާ މީހަކުކަމުގައި ނުވުމުގެ ޝަރުތު ފުރިހަމަވާނީ ދަށު ކޯޓުގެ ހުކުމް ހައިކޯޓުން ދަމަހައްޓައި ސުޕްރީމް ކޯޓުން ނިހާއީ ހުކުމެއް ކުރުމުންކަން އެނގޭކަމަށް އޭނާ ފާހަގަ ކުރައްވަ އެވެ.

ހަމީދުގެ މައްޗަށް އެއް އަހަރާއި ހަ މަސްދުވަހަށް އަރުވާލުމުގެ ހުކުމެއް 2011 ގައި ކުރިއެވެ. އަދި އެހިސާބުން މަޖިލީހުގެ މެންބަރެއްގެ ޝަރުތު އުނިވެއްޖެ ކަމާމެދު ހިލާފު އުފެދި ސުޕްރީމް ކޯޓަށް ދިއުމުން އެ ކޯޓުން ނިންމި ނިންމުމުގައި ބުނެފައިވަނީ މަޖިލީހުގެ މެންބަރެއްގެ ޝަރުތާމެދު ހިލާފު އުފެދިއްޖެނަމަ އެކަމުގައި ބަސް ބުނާނީ ސުޕްރީމް ކޯޓު ކަމަށާއި، އިސްތިއުނާފު ކުރުމުގެ ހައްގަކީ ކޮންމެ މީހަކަށްމެ ގާނޫނު އަސާސީން ކަށަވަރު ކޮށްދޭ ހައްގެއް ކަމަށެވެ.

ތޯރިގު ވިދާޅުވީ ގާނޫނު އަސާސީގައި ރައްޔިތުންގެ މަޖިލީހުގެ މެންބަރުންގެ ޝަރުތުތަކާއި ރައީސުލްޖުމްހޫރިއްޔާއަކަށް އިންތިހާބުކުރާ މީހެއްގައި ހުންނަންވާ ޝަރުތުތައް ތަރުތީބު ކޮށްފައި ވަނީ އެއް އުސޫލުން ކަމަށާއި ފަހުބަސް ބުނުމުގެ ބާރު އޮތީ ސުޕްރީމް ކޯޓަށެވެ. އަދި 12 މަސް ދުވަހަށްވުރެ ދިގު ހުކުމެއް ރައީސް ޔާމީނުގެ މައްޗަށް އިއްވި ނަމަވެސް ރިޔާސީ އިންތިހާބުގައި ވާދަކުރެއްވުމުގެ ފުރުސަތު ރައީސް ޔާމީނަށް އޮންނާނެ ކަމަށެވެ.