ނިޝާމާގެ ޕޯސްޓްމޯޓަމް ހަދައިފި، ރިޕޯޓް ދެ ދުވަސް ފަހުން

ހދ. ނޮޅިވަރަމްގައި މަރާލައިފައި އޮއްވާ ފެނުނު، އެ ރަށު ނިޝާމާ މުހައްމަދުގެ ޕޯސްޓްމޯޓަމް ހަދައިފި އެވެ. ނިޝާމާ މާރާލީ މި މަހުގެ 10 ވަނަ ދުވަހު އެވެ.

ޕޯސްޓްމޯޓަމަށް ނިޝާމާގެ ހަށިގަނޑު ބޭރަށް ފޮނުވާލީ އިއްޔެ އެވެ. ފުލުހުން ދެންމެ ބުނީ ނިޝާމާގެ ޕޯސްޓްމޯޓަމް އިއްޔެ ހަދާފައިވާ ކަމަށެވެ. އަދި ދެ ދުވަސްތެރޭ އޭގެ ނަތީޖާ ރިޕޯޓް ލިބޭނެ ކަމަށް ބެލެވެއެވެ.

ނިޝާމާ މަރާލުމުގެ ތުހުމަތު އޮތީ އޭނާގެ ފިރިމިހާ އަބޫބަކުރު ފައިސަލް އަށެވެ. ނަމަވެސް އޭނާ ވަނީ ހައްޔަރުކޮށް ތަހުގީގު ޖަލެއްގައި ހުއްޓާ ދަންޖެހި އަމިއްލައަށް މަރުވާން މަސައްކަތް ކުރަނިކޮށް ސަލާމަތް ކޮށްގެން ހޮސްޕިޓަލްގައި ފަރުވާ ދެމުން ދަނިކޮށް މަރުވެފަ އެވެ.

ނިޝާމާ، 28، ގެ މަރާ ގުޅިގެން ތަހުގީހުގައި 10 ދުވަސް ފަހުން ޕޯސްޓްމޯޓަމް ހަދަން ހަށިގަނޑު ފޮނުވި އިރު، އަދި މަރުގެ ތުހުމަތު އޮތް އޭނާގެ ފިރިމީހާ ވެސް މަރުވެފައިވެ، އޭނާގެ ހަށިގަނޑު މާލެ ގެނެސް އާއިލާއާ ހަވާލުކޮށް ވަޅުލާފައިވާއިރު، މި މަރާގުޅިގެން މިހާތަނަށް ކަންކަން ހިނގާފައިވާ ގޮތުން ފުލުހުންނަށް ވަނީ އާންމު ފާޑުކިޔުން އަމާޒު ވެފަ އެެވެ.

ނިޝާމާ މާރާލާފައި އޮތީ އޭނާ ދިރިއުޅެމުން އައި ގޭގެ ކޮޓަރިތެރޭގަ އެވެ. އޭނާ ފެނުނު އިރު އޭނާގެ މަރުގެ ތުހުމަތު އޮތް ފިރިމިހާ ފުރައިގެން ގޮސް ހުރީ ކުޅުދުއްފުށީގަ އެވެ. ފުލުހުން ކޯޓް އަމުރެއްގެ ދަށުން އޭނާ ހައްޔަރު ކުރީ، އޭނާ އަމިއްލައަށް ފުލުހަށް ހާޒިރުވުމުންނެވެ.

ނިޝާމާ އާއި އަބޫބަކުރު ފައިސަލް މަރުވެފައިވާއިރު އެ ދެމީހުންގެ ކުޑަ ތިން ކުދިން ވަނީ ޔަތީމް ވެފަ އެވެ. މިއީ މި ފަހުން މިފަދަ ހާދިސާއެއްގެ ތެރެއިން އެކުއެކީގައި ދިވެހި ދެމަފިރިއަކު މަރުވެ، ކުދީން ޔަތީމްވި ފުރަތަމަ ފަހަރެވެ.