ފައިސަލްގެ ހާލު ސީރިއަސް، އޮތީ ވެންޓިލޭޓަރުގައި

ހދ. ނޮޅިވަރަމުގައި މިދިއަ ހޮނިހިރު ދުވަހު މެންދުރު މާރާލާފައި އޮއްވާ ފެނުނު ނިޝާމާ މުހައްމަދު 28، ގެ ފިރިމީހާ އަބޫބަކުރު ފައިސަލް ޖަލުގައި ދަންޖެހެން މަސައްކަތް ކުރުމާ ގުޅިގެން އޭނާގެ ހާލު ސީރިއަސްވެ ފަރުވާ ދެމުންދަނީ ވެންޓިލޭޓަރުގައި ކަމަށް ކުޅުދުއްފުށި ރީޖަނަލް ހޮސްޕިޓަލުން ބުނެފި އެވެ.

އެ ހޮސްޕިޓަލުގެ ތަރުޖަމާނު މުހައްމަދު މޫސާ މިއަދު ވިދާޅުވީ ފައިސަލްގެ ހާލު ކްރިޓިކަލް ކަމަށާއި ފަރުވާ ދެމުން ދަނީ ވެންޓިލޭޓަރުގައި ކަމަށެވެ. އެކަމާ ގުޅޭ އިތުރު މައުލޫމާތު އޭނާ ނުދެއްވަ އެވެ.

ފުލުހުން ރޭ ބުނީ ނިޝާމާގެ މަރާއި ގުޅިގެން ހައްޔަރު ކޮށްފައިވާ އޭނާގެ ފިރިމީހާ ފައިސަލް ބަންދު ކޮށްފައި ހުރި ތަނުގައި ދަން ޖެހެން މަސައްކަތް ކުރަނިކޮށް ރޭ 11:15 ހާއިރު ފެނިފައިވާ ކަމަށެވެ. ވަގުތުން އޭނާ ގެންދިޔައީ އޭނާ ހޮސްޕިޓަލަށް ގެންގޮސް އައިސީޔޫގައި ފަރުވާދޭން ފަށާފައިވާ ކަމަށެވެ.

އެކަމާއި ގުޅިގެން ބަލަން ޖެހޭ ކަންކަން އެޗްއާރުސީއެމް އާއި އެންއައިސީއަަށް ހުށައަަޅައިގެން ބަލަމުންދާ ކަމަަށްވެސް ފުލުހުން ބުނެފައިވެ އެވެ.

ނިޝާމާ މަރުވެފައި އޮއްވާ ފެނުނުއިރު ފައިސަލް ހުރީ ކުޅުދުއްފުއްޓަށް ގޮހެވެ. އޭނާ އެރަށު ޕޮލިސް ސްޓޭޝަނަށް ދިޔައީ އަމިއްލައަށް ކަމަށެވެ އެވެ. އެކަމަކު ފަހުން ފުލުހުން އޭނާ ހައްޔަރަށް ގެނައީ ކޯޓު އަމުރެއް ހޯދައިގެންނެވެ. އޭނާގެ ބަންދަށް 15 ދުވަހުގެ މުއްދަތެއް ކޯޓުން ދީފައިވެ އެވެ.

ނިޝާމާގެ ހަށިގަނޑު މިހާރު ވަނީ މާލެ ގެނެސްފަ އެވެ. ފުލުހުން ކުރިން ބުނެފައި ވަނީ އޭނާގެ ހަށީގަނޑު ޕޯސްޓްމޯޓަމަށް ފޮނުވަން ވާންޖެހޭ ތައްޔާރީތައް ވަމުންދާ ކަމަށެވެ.