"ރާއްޖޭގައި އެޗްއައިވީ ފެތުރިގަތުމުގެ ފުރުސަތު ބޮޑު"
އެންމެ ފަހުގެ ހިސާބުތައް ދައްކާގޮތުގައި މިދިޔަ އަހަރުގެ ނިޔަލަށް ރާއްޖޭގައި 37 މީހަކަށް އެއިޑްސް ބަލި ޖެހިފައިވެ އެވެ. އެއީ 31 ފިރިހެނުންނާއި ހަ އަންހެނުންނެވެ.
އެޗްއައިވީ / އެއިޑްސް ބަލީ ރާއްޖޭގައި ފެތުރިގަތުމުގެ ފުރުސަތު ބޮޑު ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވެފައި ވަނީ އެއިޑްސް ބައްޔާ ދެކޮޅަށް މަސައްކަތް ކުރާ ބައިނަލްއަގްވާމީ ދުވަސް ފާހަގަ ކުރުމުގެ ގޮތުން ގއ. ވިލިނގިލީގައި ބޭއްވި ހަފްލާއެއްގަ އެވެ. މިނިސްޓަރު ނަސީމް ވިދާޅުވި ގޮތުގައި އެޗްއައިވީ ޖެހިފައިވާ މީހުންގެ އަދަދު ރާއްޖޭގައި މަދެވެ. ނަމަވެސް، ބަލި ގިނަ ބަޔަކަށް ޖެހުމުގެ ފުރުސަތު ބޮޑު ކަމަށް މިހާތަނަށް ކުރި ދިރާސާތަކުން ދައްކަ އެވެ.
އެޗްއައިވީ އާއި ދާދި އެއްގޮތަށް ފެތުރޭ އެހެން ބަލިތައް ރާއްޖެއިން ފެންނަމުންދާ ކަމަށް މިނިސްޓަރު ވިދާޅުވެފައިވެ އެވެ.
"ރާއްޖޭގައި އެޗްއައިވީ ޖެހިފައިވާ މީހުންގެ އަދަދު މަދު ނަމަވެސް ގިނަބަޔަކަށް މި ބަލި ޖެހުމުގެ ފުރުސަތު ބޮޑު ކަމަށް ބެލެވޭ ކަންކަން ރާއްޖޭގައި ކުރެވިފައިވާ ދިރާސާތަކުން ފެންނަން އެބަހުރި. އެޗްއައިވީ އާއި ދާދި އެއްގޮތަށް ފެތުރޭ އެހެން ބަލިތައްވެސް ރާއްޖެއިން ފެންނަމުންދޭ،" މިނިސްޓަރު ވިދާޅުވި އެވެ.
- މިދިޔަ އަހަރުގެ ނިޔަލަށް ރާއްޖޭގައި 37 މީހަކަށް އެއިޑްސް ބަލި ޖެހިފައިވޭ
- އެއީ 31 ފިރިހެނުންނާއި ހަ އަންހެނުން
- 22 މީހަކަށް މިދިޔަ އަހަރުގެ ނިޔަލަށް އޭއާރްވީ ފަރުވާ ދެމުންދިޔަ
- 15 މީހަކު މަރުވެފައިވޭ
- އެޗްއައިވީއަށް ޕޮޒިޓިވް 450 ބިދޭސީއަކު ރާއްޖެއިން ފާހަގަވެފައިވޭ
ނަސީމް ވިދާޅުވީ ކުރިއަރާފައިވާ ގައުމުތަކެކޭ އެއްފަދައިން، ރާއްޖޭގައި ވެސް އެޗްއައިވީ އާއި ހެޕަޓައިޓިސް ފަދަ އެހެނިހެން ޖިންސީ ގުޅުމުން ފެތުރޭ ބަލިތައް ހިމެނޭގޮތަށް ކޮމްބައިންޑް ނޭޝަނަލް ސްޓްރެޖިކް ޕްލޭނެއް އެކުލަވާލައިފައިވާ ކަމަށެވެ. މިއީ މިފަދަ ބަލިތައް ކޮންޓްރޯލް ކުރުމަށް އެޅުނު މުހިންމު ފިޔަވަޅެއް ކަމަށެވެ.
"ރާއްޖޭގައި ވެސް ކުރިޔަށް އޮތްތަނުގައި މަސައްކަތް ކުރެވޭނީ މި ތިން ބަލި ހިމެނޭގޮތަށް ބަލިން ރައްކާތެރި ކުރުމާއި، ބަލި ދެނެގަތުމާއި ބަލި ޖެހޭ ފަރާތަތަކަށް ފަރުވާގެ ކަންކަން ހަޖެއްސުމަށް،“ ނަސީމް ވިދާޅުވި އެވެ.
ކޮމެންޓް
Republic of Maldives