ފޭރުން އެހެން ލެވެލަކަށް، ސިމްވެސް ކްލޯން ކޮށްލަނީ

އޮޅުވާލައިގެން ފައިސާ ހޯދުން އެކި ދުވަސްވަރު ކުރީ އެކި ގޮތަށެވެ. ރާއްޖޭގައި މިކަން އެންމެ މަޝްހޫރު އެއްގޮތަކީ ބޭންކުގެ ނަމުގައި ގުޅައިގެން އެކައުންޓުގެ ޑީޓެއިލް ހޯދައިގެން އެކައުންޓްގައި ހުރި ފައިސާކޮޅު "ކަހާލު" މެވެ. އެހެންވެ ބޭންކުން އެކައުންޓުގެ މައުލޫމާތު ހޯދަން ނުގުޅާނެ ކަަމަށް ބުނާ ކެމްޕޭނެއް ދިވެހި ބޭންކުން ފެށި އެވެ. އެ ކެމްޕޭނާއެކު ސްކޭމަރުން ނުވަތަ އޮޅުވާލައިގެން ފައިސާ ހޯދާ މީހުންގެ މަސައްކަތް ވެސް ވަނީ އެހެން ލެވެލަކަށް ގެންގޮސްފަ އެވެ. އެންމެ ފަހުން ފެންމަތި ވެގެން ދިޔަ އެއް މައްސަލައަކީ ފޯނުގެ ވެރިފަރާތަށް ނޭނގި އޭގެ ސިމްގެ ނަކަލެއް ނުވަތަ "ސިމް ކްލޯން" އެއް ހެދުމެވެ. އެ ސިމް ބޭނުން ކޮށްގެން އިންޓަނެޓް ބޭންކިން އޯޓީޕީ ހޯދައި އިންޓަނެޓް ބޭންކިން މެދުވެރިކޮށް ފައިސާ ފޭރުމުގެ މައްސަލަތަކެވެ. އޭގެ ދެ މައްސަލައެއް ރާއްޖޭގައި މިހާރު ވެސް ފެންމަތިވެފައި ވެއެވެ. އެފަދަ މައްސަ ތަކެއް ބޭންކުން ފުލުހުންނާ ހިސާބަށް ވެސް ފޮނުވާފައިވާކަން "މި" ނޫހަށް އެނގެ އެވެ.

އެ ދެ މައްސަލަ ފުލުސް މޭޒުގައި އޮތްއިރު އެއީ އޮޅުވާލައިގެން ފައިސާ ހޯދުމުގެ އެހެން ލެވެލެކެވެ. މިހާރު ރާއްޖޭގައި ސިމް ނެގުމާއި ސިމްގެ އޯނާޝިޕް ބަދަލު ކުރަމުންދާ އުސޫލުގެ ދަށުން ވެރިފަރާތުގެ އިޒުނައެއް ނެތި އެކަމެއް ނުކުރެ ވެއެވެ. އެކަން ކުރާނަމަ ވެރި ފަރާތުގެ ގިނަ މައުލޫމާތު ތަކެއް ބޭނުންވެ އެވެ. ނަމަވެސް މި ހީލަތް ހަދާފައި ވަނީ ވެރި ފަރާތްތުގެ އެއްވެސް މައުލޫމާތެއް އެނގުމަކާ ނުލަ އެވެ. މިކަން ހިންގިކަން މޮބައިލް ސިމްގެ ވެރި ފަރާތަށް އެނގިފައި ވަނީ ވެސް ސިމްގެ އޯނަރު ނުވަތަ ވެރި މީހާ މޮބައިލް ރޭންޖު ނުލިބޭ ހިސާބެއްގައި ހުރެފައި ރޭންޖު ލިބޭ އޭރިއާ އަކަށް ދިޔަ ފަހުންނެވެ. އަދި އެ ހީލަތް ހިނގާފައިވަނީ ދަންވަރުގައި ކަމަށްވުމުން ސިމްގެ ވެރި ފަރާތްތަށް އެޓެންޑްވާނެ ފުރުސަތެއް ވެސް ނެތެވެ.

ސިމްގެ ވެރިފަރާތައް ނޭނގި އޯނާޝިޕް ބަދަލު ކޮށްގެން ވައްކަން ކުރުމަކީ ދުނިޔޭގައި ހިނގާ ކަމެވެ. އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ވެސް މި މަހު ވަނީ މިފަދަ މައްސަލަ ތަކެއް ތަހުގީ ކޮށްފަ އެވެ. އަވަށްޓެރި ބިޔަ ބޮޑު އިންޑިއާގައި ވެސް މިފަދަ ހާދިސާތައް އިތުރުވަމުން ދާތީ ސަލާމަތީ ފިޔަވަޅު ވަރުގަދަ ކުރަން ފަށާފައި ވެއެވެ. މީގެ ކުރީން ރާއްޖޭގައި މިފަދަ ކަމެއް ނާދެ އެވެ. މިފެށުނީ އަލަށެވެ. އަދި މި ހުރިހާ ކަމެއް ވެސް ފަސޭހައިން ކުރެވެނީ ރާއްޖޭގަ އެވެ.

ފުލުހުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ދިން މައުލޫމާތު ތަކުން އެނގުނު ގޮތުގައި ވެސް ސްކޭމްގެ ބޮޑު ބައެއް ހިންގަނީ އެންމެ ނުރައްކާތެރި ކުށްވެރިން ތިބި ޖަލުގެ ތެރެއިންނެވެ. އެކަން ކުރަން ބިދޭސީންގެ ނަމުގައި ނަގާފައިވާ ގިނަ އަދަދެއްގެ ސިމް އެ މީހުން ދަނީ ބޭނުން ކުރަމުންނެވެ. އޭގެ އެންމެ ޓޮޕް ފަހެއްގައި ބިދޭސީން ނަމްބަރުތައް އޮތްއިރު، އެ މީހުންނަކީ ރާއްޖޭގައި އުޅޭބައެއް ވެސް ނޫނެވެ. އެކަމަކު މީގެ ކޮންމެ މީހެއްގެ ނަމުގައި އެވްރެޖުކޮށް 5،000 ސިމް ކާޑު ރަޖިސްޓްރީ ކޮށްފައި ވެއެވެ. އަދި މި ސިމްތައް ބޭނުން ކޮށްގެން ފައިސާ ފޭރުން ވަނީ ނުރައްކާތެރި ދަރަޖައަކަށް ގެންގޮސްފަ އެވެ.

މޮބައިލް ސިމް "ކްލޯން" ކުރުން ސްކޭމްގެ މުޅިން އާ ދަރަޖައަކަށް ދިޔައިރު ސްކޭމް މިހާރު ހިންގަނީ ޖީމެއިލްގެ ޕާސްވޯޑް ހޯދައިގެން އިންޓަނެޓް ބޭންކިން ކޮންޓްރޯލް ދަށަށް ގެނެސްގޮސް ގެނެވެ. މީގެ އިތުރުން އެއިރެއްގައި ޓްރެންޑްވާ ހަބަރެއް ނުވަތަ ހާދިސާއަކާ ގުޅުވައި މައުލޫމާތު ދޭން ލިންކްތައް ފޮނުވައިގެން ވެސް އެކަން ކުރެ އެވެ. ދާދި ފަހުން ސޯޝަލް މީޑިއާގައި އާއްމު ވެގެން ދިޔަ މައްސަލައެއްގައި ފެންނަނީ މީހަކު ބޭންކާ މެދު ޝަކުވާ ކުރާ ތަނެވެ. އޭނަގެ ފައިސާކޮޅު ބޭންކުން "އަތުލި" ކަމަށް ބުނެ އެވެ. އެ ހަމަ ރަނގަޅު މާގާމެއްގައި ވެސް ހުންނެވި ޒުވާނެކެވެ. އޭނާ ހުންނެވީ ވަރުގަދަ ސްކޭމްއެއްގެ މަޅީގައި ބެދިފަ އެވެ.

އޭނާގެ ފޯނަށް ދަނީ ރާއްޖޭގައި ޓިކްޓޮކްގައި މަޝްހޫރު އަންހެން ތަރިއެއްގެ ވީޑިއޯއެއް ހުރި ކަމަށް ބުނާ މެސެޖެއްގެ ލިންކެކެވެ. އޭނާގެ އިންޓަނެޓް ބޭންކިންގެ ޕާސްވޯޑު ހޯދައި ފައިސާ ފޭރުނީ އެ ލިންކަށް ފިތައިލުމުންނެވެ. ހުރިހާ ޕާސްވޯޑެއް ފޯނުގައި ސޭވްކޮށްފައި ހުރުމުން އެ ހިސާބުން އޭނާގެ ހުރިހާ މައުލޫމާތެއް ލިބުނީ އެވެ. ފުރަތަމަ އެދުނީ އޭނާގެ ފޯނަށް ފޮނުވި ފަހަތުގައި "ޖީ" އަކުރު ހިމަނާފައިވާ ކޯޑު ދޭށެވެ. އެކޯޑަކީ އޯޓީޕީ މެދުވެރިކޮށް ފޯނަށް ދާ ޖީމެއިމްގެ ކޯޑު ނުވަތަ ޖީމެއިލްގެ ތަޅެކެވެ. މި ކޯޑު ހޯދައި އެނާގެ އިންޓަނެޓުގެ ޕާސްވޯޑާއެކު ފައިސާ ފޭރިގެންފައި ވެއެވެ.

މި މައްސަލައާ ގުޅިގެން ޕަބްލިކްގައި އޭނާއަށް މި ވާހަކައިގެ ހަގީގަތް ހިއްސާ ކުރަށް ނުކެރެ އެވެ. ސަބަބަކީ އެ ލިންކުގައި ހުރި ފޮޓޯތައް ބަލަން އޭނާ މަސައްކަތް ކޮށްފައި ވުމެވެ. ބޭންކަކަށް ވެސް ޕަބްލިކްގައި އެކަން ހިނގާ ދިޔަގޮތް ކިޔައިދޭކަށެއް ނުކުރެ އެވެ.

ބީއެމްއެލްގެ ޕީއާރު މެނޭޖަރު މުހައްމަދު ސައީދު ވިދާޅުވި ގޮތުގައި ގިނަ މީހުން ހިދުމަތް ހޯދާ ކުންފުނިތަކާއި މަޝްހޫރު ބްރޭންޑުތަކުގެ ނަމުގައި "ފިޝިން މެއިލް" ފޮނުވުން އާއްމެވެ. މިހާރު ސްކޭމް ކުރަނީ ހަމައެކަނި ފޯނު ކޯލަކުން ނޫނެވެ.

"ބީއެމްއެލްގެ އިންޓަނެޓް ބޭންކިންގެ ނަމުގައި ހަމަ އެގޮތަށް [އެކަމަކު ރަނގަޅަށް ބަލައިލުން ފޭކު ކަން އެނގޭ] ގޮތަށް އެބަ މެއިލް ކުރޭ. އެބަހުރި މެއިލް ފޮނުވާފަ ނެޓްފްލިކްސް އާއި މާސްޓަ ކާޑުގެ ނަމުގައި. މެއިލްގެ މެއިން ބައި އިންނަނީ އަސްލު މެއިލްއާ އެއްވެސް ތަފާތެއް ނެތް ގޮތުގައި. އެކަމަކު ރަނގަޅަށް ބެލީމަ އެނގޭ އެޑްރެެސް ތަފާތުކަން،" ސައީދު ވިދާޅުވި އެވެ.

އޭނާ ވިދާޅުވި ގޮތުގައި މިހާރު ޕާސްވޯޑް ހޯދައިގެން ވައްކަން ކުރުން އާއްމުވެފައި ވާތީ އިންޓަނެޓް ބޭންކިން އަށް ހާއްސަ މެއިލްއެއް އޮތުން މުހިންމެވެ. އަދި އަބަދު އެއް ޕާސްވޯޑެއް ގެންގުޅުމުގެ ބަދަލުގައި ޕާސްވޯޑް ބަދަލުކޮށް ވަރު ގަދަ ކުރުން މުހިންމެވެ.

މޮޅަށް ހީލަތް ހަދައިގެން ފައިސާ ހޯދުމުގެ އުކުޅުތައް ބަދަލު ކުރަމުން ގެންދާއިރު އެކަމަކީ ހޭލާ ތިބެން ޖެހޭ ކަމެކެވެ. ބުރަ މަސައްކަތުން ހޯދާ ފައިސާކޮޅު ރައްކާކުރާ އެކައުންޓްތަކުގެ ތަޅު ހުޅުވިޔަ ނުދޭން ސަލާމަތީ ފިޔަވަޅު އަޅައި ލޯ ހުޅުވަން ޖެހެ އެވެ.