ސްޕެއިންގެ އެންމެ ބޮޑު ޓޫރިޒަމް ބްރޭންޑުން "ބާސެލޯ ނަސަންދުރަ" ހުޅުވައިފި

ސްޕެއިންގެ ދެވަނަ އަށް އެންމެ ބޮޑު ޓޫރިޒަމް ބްރޭންޑެއް ކަމަށްވާ "ބާސެލޯ" ގެ ނަމުގައި ރާއްޖޭގެ ނަސަންދުރަ ޕެލަސް ހޮޓެއް ހުޅުވައިިފި އެވެ. 

ނަސަންދުރަ ހުރި ބިމާއި އެބިމާ އިންވެގެން ހުރި ބިން އެއްކޮށް ނަގައި ތަރައްގީކޮށްފައިވަނީ ގާތްގަނޑަކަށް 90 މިލިއަން ޑޮލަރު މި ފޮރިން އިންވެސްޓްމަންޓް ހިދުމަތަށް ގެނެސްފައި މިވަނީ ގިނަ ދުވަސްތަކަށްފަހު އެވެ.

ސްޕެއިންގެ ބާސެލޯ ބްރޭންޑުގެ މި ހޮޓަލުގައި 126 ކޮޓަރި ހުރެ އެވެ. މީގެ އިތުރުން މި ތަން ތަރައްގީކޮށްފައިވަނީ ދުރާލާ ވިއްކި 118 ސާވިސް އެޕާޓްމަންޓާއެކުގަ އެވެ. އެ އެޕާޓްމަންޓްތައް ދުވަހަށް ކުއްޔަށް ވެސް ދޫކުރާނެ އެވެ. 

ބާސެލޯ ނަސަންދުރަ ހޮޓަލުގައި ތިން ރެސްޓޯރެންޓަކާއި ސްނެކް ބާއަކާއި ޝީޝާ ލައުންޖެއް ވެސް ހުރެ އެވެ. ގްރައުންޑް ފްލޯގައި ހުންނަ ލައުންޖް "ކެފޭ އަލިމަސް" ހާއްސަކޮށްފައިވަނީ ދުވަހު ބުފޭ ސްޓައިލްގެ ރެސްޓޯރެންޓެކެވެ. އަދި "ޑޮން" އަކީ ޗައިނީސް ކެއުންތަކަށް ހާއްސަ ރެސްޓޯރެންޓެކެވެ. މި ހޮޓަލުގައި ސްޕާ އާއި ހަ ލަގްޒަރީ ޓްރީޓްމަންޓް ރޫމްގެ އިތުރުން ވެލްނެސް އޭރިއާއެއް ހުރެ އެވެ. ހޮޓަލުގެ ފުރިހަމަ ވަސީލަތްތައް ގާއިމްކޮށްފައިވާ ފިޓްނަސް ސެންޓަރުން ހަދާފައިވަނީ ރާއްޖޭގެ ކަނޑުގެ ރީތި މަންޒަރު ފެންނާނެ ގޮތަކަށެވެ. މީގެ އިތުރުން މި ހޮޓަލަކީ މިހާރު ރާއްޖޭގެ އެންމެ ބޮޑު ކޮންވެންޝަން ހޯލް ހުރި އިމާރާތެވެ. 

ކުރިން ރާއްޖޭގެ އެންމެ މަޝްހޫރު ހޮޓާ ހުރި ނަސަންދުރަ ޕެލަސް ހުރި ބިމުގައި ޒަމާނީ ހޮޓަލެއް އެޅުމުގެ މަސައްކަތް ހަވާލު ކުރީ 2015 ވަނަ އަހަރު އެވެ. މި މަސައްކަތް ހަވާލު ކުރީ އެންޕީއެޗް އިންވެސްޓްމެންޓް ކުންފުންޏާއެވެ. ކުރީގެ ނައިބް ރައީސް އަހުމަދު އަދީބުގެ ޓޫރިޒަމް މިނިސްޓަރު ކަމުގައި މި ބިން ހަވާލު ކޮށްފައި ވަނީ އައިލެންޑް އޭވިއޭޝަން ސާވިސަސް ހިންގި ހ. އޯކިޑް ލޮޖް ހުރި ބިމާއެކު 50 އަހަަރަށް، އަދި 99 އަހަރަށް މުއްދަތު އިތުރު ކުރެވޭ ގޮތަށެވެ. ނަމަވެސް މި ޕްރޮޖެކްޓް ދިނީ ޓޫރިޒަމް ގާނޫނާ ހިލާފަށް ކަމަށް ބުނެ އޭރުގެ އޮޑިޓަ ޖެނެރަލް މި އެއްބަސްވުމާމެދު އަލުން ގޮތެއް ނިންމަން ސަރުކާރަށް ލަފާ ދިނެވެ. އޭރުގެ އޮޑިޓަ ޖެނެރަލް ލަފާގައި ބުނެފައި ވަނީ ސަރުކާރަށް އެއްވެސް ފައިސާއެއް ނުދައްކާ އޭގެ ބަދަލުގައި ސީއެސްއާރު ކޮމްޕޯނަންޓެއް ހިމަނައިގެން އެ ބިން ދިގު މުއްދަތަކަށް ދިން އިރު، ސީއެސްއާރާ ގުޅޭ އެއްވެސް ތަފުސީލެއް އެއްބަސްވުމުގައި ނެތް ކަަމަށެވެ. ނަމަވެސް މި މަޝްރޫއު ހުއްޓުމެއް ނެތި ދިޔައީ ކުރިއަށެވެ. އެގޮތުން ފާއިތުވި އެމްޑީޕީ ސަރުކާރުގައިވެސް އެ މަޝްރޫއު ހުއްޓުވިފައިނުވެ އެވެ. 

ނަމަވެސް އެންމެފަހުން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޓޫރިޒަމް މިނިސްޓަރު ތޯރިގު އިބްރާހިމް ވަނީ ވަރަށް އަވަހަށް ހުއްދަ ދިނުމާއެކު ނަސަންދުރަ ހުޅުވާނެ ކަމަށް ވިދާޅުވެފަ އެވެ.