ރައީސް މަސްވެރިންނާ ޑައިރެކްޓް ލިންކެއް، މެސެޖުތަކަށް ޖަވާބު ދެއްވާ

މަސްވެރިންނާ ބައްދަލުކޮށް ސީދާ އެމަނިކުފާނަށް މުއާމަލާތް ކުރެވޭނެފަދަ "ޑައިރެކްޓް ލިންކެއް" އަޅާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވި އެވެ.

ދާދިފަހުން ވެސް ރައީސް ވަނީ ކަންނެލި މަސްވެރިންގެ ކަންބޮޑުވުންތައް އަޑުއައްސަވަން ރައީސް އޮފީހުގައި މަސްވެރިންގެ ތަމްސީލް ކުރާ ޖަމިއްޔާއެކު ވެސް ބައްދަލުމެއް ބާއްވާފަ އެވެ. އަދި ކެޔޮޅުންނާއެކު ވެސް ބައްދަލު ކުރައްވާފައިވެ އެވެ. 

"ރައްޔިތުންނާއެކު" ޕޮޑްކާސްޓްގައި ވާހަކަފުޅުދައްކަވަމުން ރައީސް ޑރ. މުއިއްޒު ވިދާޅުވީ ރައީސް އޮފީހުގައިވެސް ކެޔޮޅުންނާ ބައްދަލުކޮށްފައިވާއިރު އަމިއްލަފުޅު ގޮތުންވެސް ބައްދަލު ކުރަމުން ގެންދާ ކަމަށެވެ.

"މިހާރު ބަރާބަރަށް ސީދާ ގުޅުން ވެސް އެބަ ބާއްވަން އެ ބޭފުޅުންނާ. [މަސްވެރިން] އަޅުގަނޑާ އެ ބޭފުޅުންނާ ޑައިރެކްޓް ލިންކެއް އެބައޮތް. ކޮންމެ ދުވަހަކު ވެސް މެސެޖު ކުރެއްވިޔަސް ޖަވާބު ދެން. އެ ބޭފުޅުން މުހިންމު،" ރައީސް ވިދާޅުވި އެވެ. 

ރައީސް ޑރ. މުއިއްޒު ވިދާޅުވީ މި ސަރުކާރުން ވެރިކަމާ ހަވާލުވީއިރު، މަސްވެރިން ކިރުވާފައިވާ މަހަށް 250 މިލިޔަން ރުފިޔާ ނުދީ އޮތެވެ. އެހެންނަމަވެސް އެ ފައިސާ ދައްކާ ހަލާސްކޮށް މިހާރު ދުވަހުން ދުވަހަށް ފައިސާ ދެމުންދާކަން ރައިސް ފާހަގަ ކުރެއްވި އެވެ. އަދި މިހާތަނަށް ޑިސެމްބަރު 10 އަކުން ފެށިގެން 470 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް ރައީސް ވިދާޅުވި އެވެ. 

"ބަރާބަރަށް ފައިސާ ދޭންފެށުމުން އޭގެ ހެޔޮ ނަތީޖާވެސް ދަނީ ފެންނަމުން. ކުރިން ފައިސާ ނުދެވުމުގެ ސަބަބުން މަސްދޯނިތަކުން އެތައް ޒުވާނުންނެއް ފޭބި. ނަމަވެސް މިހާރު އެ ފޭބި ޒުވާނުން މަސްދޯނިތަކަށް ދަނީ އަރަމުން. އެހެން މަސައްކަތް ފަށާފަ ވަޒީފާތަކަށް ދާން ފެށި ޒުވާނުން ދޯނިތަކަށް އަރަން ފަށައިިފި،" ޑރ. މުއިއްޒު ވިދާޅުވި އެވެ. 

ރައީސް ވިދާޅުވީ ބޭރުން ވަނީ ދޯނިތަކުގައި އުޅޭ ބިދޭސީންގެ ބަދަލުގައި ދިވެހިން ތިބުން ކަމަށާ އެކަމަކު އެކަންވާނީ ބަރާބަރަށް ފައިސާ ދީ އެފަދަ ކަންކަން މަސްވެރިންނަށް ގަބޫލު ކުރެވިގެން ކަމަށް ދެކެވަޑައިގަންނަވަ އެވެ. އަދި އެ ބަދަލު އަންނަން ފަށާފައިވާކަން ރައީސް ފާހަގަ ކުރެއްވި އެވެ. 

ރައީސް ވިދާޅުވީ އެންމެ ބޮޑު އެއް ވިސްނުންފުޅަކީ ވެލިއު އެޑް ނުވަތަ އަގު އެއްކުރެވޭ އުފެއްދުންތައް ތައްޔާރުކޮށް މާކެޓްކުރެވޭ ކެޕޭސިޓީ އިތުރު ކުރުމެވެ. އަދި މިހާރު ރާއްޖޭގައި އަގު އެއްކުރެވޭ މަހުގެ ބާވަތްތައް ތައްޔާރުކުރުމުގެ ކެޕޭސިޓީ ހުރީ 115 ޓަނުގައި ހުރިނަވެސް މިހާރު ކުރިއަށް ގެންދާ މަޝްރޫއުތަކާއެކު މަޝްރޫޢުތަކާއެކު މި އަދަދު ތިން ގުނަކޮށް 365 ޓަނުގެ އިތުރުވުމެއް އަންނާނެކަން ރައީސް ފާހަގަ ކުރެއްވި އެވެ.

"މިހާރު ކަޅުބިލަސް މަސް ކެޕޭސިީއަކީ 9،500 ޓަނު. މިހާރުގެ މަސައްކަތްތައް 25،000 ޓަނަށް އިތުރު ކުރެވޭނެ. އައިސް ޕްލާންޓްތަކުގެ ކެޕޭސިޓީއަށްވެސް 600 ޓަނު އިތުރު ކުރެވިދާނެ. މިއީ ކަންބޮޑުވުމެއް ނެތި ކުރިއަށް ގެންދެވޭނެ މަޝްރޫއުތައް،" ރައީސް ފާހަގަ ކުރެއްވި އެވެ. 

ރައީސް ޑރ. މުއިއްޒު ވިދާޅުވީ ރާއްޖޭގައި ހަރަކާތްތެރިވާ އޮޑިފަހަރުގެ %95 ޕަސެންޓް އުޅަނދު ރަޖިސްޓްރީކޮށްފައިވާ ކަމަށެވެ. މި މަސައްކަތް ފުރިހަމަ ވުމުން މުޢައްސަސާތަކާއި ބޭންކުތަކުންނާއި ފައިނޭންޝަލް އިންސްޓިޓިއުޝަންތަކުން ލިބިދޭ މާލީ އެހީތެރިކަން ނިޒާމީގޮތެއްގައި މަސްވެރިންނަށް ހޯދޭނެކަމަށް ރައީސް ވިދާޅުވި އެވެ.