ރަނގަޅު ގޮތަކީ އެމްޑީޕީ އާއި ޑިމޮކްރެޓިކްސް ގުޅުން: ރައީސް ނަޝީދު

ރާއްޖެއަށް ރަނގަޅު ގޮތަކީ އެމްޑީޕީ އާއި ދަ ޑިމޮކްރެޓިކްސް ގުޅުން ކަމަށް އެމްޑީޕީ އާއި ދަ ޑިމޮކްރެޓިސްގެ ފައުންޑަރު ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ. 

ރައީސް ނަޝީދު އެކްސްގައި މިއަދު ވިދާޅުވި ގޮތުގައި ފެންނަ ގޮތުގައި މި ވަގުތު ރާއްޖެއަށާއި އެމްޑީޕީއަށް އަދި ޑިމޮކްރެޓްސް އަށް ވެސް އެންމެ ރަނގަޅު ގޮތަކީ އެމްޑީޕީ އާއި ޑިމޮކްރެޓްސް ގުޅުން ކަމަށް ވިދާޅުވެފައިވެ އެވެ. 

ރައީސް ނަޝީދު މިހެން ވިދާޅުވިއިރު އަންނަ ރިޔާސީ އިންތިހާބުގެ އެމްޑީޕީގެ ޓިކެޓަށް ރައީސް އިބްރާހިމް މުހައްމަދު ސޯލިހު ކުރިމަތި ލައްވަފާނެ ކަމުގެ އަޑުތަކެއް ވަނީ ފެތުރިފަ އެވެ. އަދި މިހާރުވެސް ޑިމޮކްރެޓްސްގެ ބައެއް އިސްވެރިން ވަނީ އެ ޕާޓީން ވަކިވެ އެމްޑީޕީއާ ގުޅިފަ އެވެ. 

އެމްޑީޕީގެ ބާނީ ރައީސް ނަޝީދާއި ރައީސް ސޯލިހުގެ ގުޅުން ގޯސްވީ ނިމިދިޔަ ވެރިކަމުގަ އެވެ. މި ގުޅުން ގޯސްވި ވަގުތާ ދިމާކޮށް ރައީސް ނަޝީދުއަށް ބޮމުގެ ހަމަލާއެއް ދީފައިވެ އެވެ. އަދި އެ ހަމާލާ ދެވުނީ ރައީސް ސޯލިހުގެ ސަރުކާރުން ފަރުވާކުޑަ ކުރުމުން ކަމަށް ރައީސް ނަޝީދުގެ ގާތް ބޭފުޅުންވެސް ތުހުމަތު ކުރި އެވެ. ރައީސް އިބްރާހިމް މުހައްމަދު ސޯލިހާއި ނަޝީދާ ދޭތެރޭގައި ޖެހުނު މައްސަލަތައް ހައްލު ނުކުރެވިގެން އެމްޑީޕީން ވަކިވެވަޑައިގެން ނަޝީދު އިސްވެ ހުންނަވައި ޑިމޮކްރެޓްސްގެ ނަމުގައި 2023 ޖޫން މަހު ޕާޓީއެއް އުފެއްދި އެވެ.