ކްރޫޒް ލައިނާތަކުން އާއްމުންނަށް ޑޮލަރު ލިބޭނެ ގޮތް ހެދިދާނެ

ކްރޫޒް ލައިނާތަކަށް ދުރާލާ ފެސްޓިވަލް އިއުލާނު ކުރަން ޖެހެ އެވެ. ދިވެހިން އުފެއްދުތަކާއި ދިވެހި ހުނަރުވެރިންނަށް އާމްދަނީ ލިބޭނެ މަގެއް ފަހިކޮށްދޭން ޖެެހެ އެވެ. މިފަދަ އުޅަނދުތަކަކީ އެކަމަށް އޮތް ބޮޑު ފުރުސަތެކެކެވެ.

ކްރޫޒްލައިނާއަކުން މާލެއަށް ޓޫރިސްޓުން ފައިބަނީ : މިއީ އާއްމުންނަށް ޑޮލަރު ލިބޭނެ ބޮޑު ވަސީލަތެއް -- ދަމިރާ

މީގެ ހައެއްގެ މަސް ކުރީގައި އަހަރެން ހުރީ އިންޑިއާގެ ކޮޗިންގަ އެވެ. ކޮޗިންގެ އެންމެ ސަގާފީ އަދި ތާރީހީ ރަށް ކަމަށްވާ މަޝްހޫރު ފޯޓްކޮޗީ ބަލައިލަން އެއް ދުވަހު ހިނގަމުން ދަނިކޮށް ބޮޑު ކްރޫޒް ޝިޕެއް އެ ބަނދަރަށް "ނަގިލި" ލައިފި އެވެ. މާގިނައިރެއް ނުވެ އެ ބޯޓުން ގިނަ އަދަދެއްގެ ޓޫރިސްޓުން ރަށު ތެރެއަށް ފައިބާން ފެށުމާއެކު ފޯޓްކޮޗީގެ މުޅި މާހައުލު ބަދަލުކޮށްލި އެވެ. ނަށާ ގްރޫޕް ތަކެއް އައިސް އިންޑިއާގެ ސަގާފީ ނެށުންތައް ހުށަހަޅަން ފެށި އެވެ. އަދި އެ ގައުމުގެ ހަނދާނީ ހަދިޔާ މޭޒުތައް ގެނެސް މަގުގެ އެއް ފަރާތުގައި އަތުރާލި އެވެ. އަދި ކުދި ބޮޑު އެންމެން އިންޑިއާގެ އެކިއެކި ލުއިކާނާގެ މޭޒުތަކާއެކު މި އުޅަނދުން ފައިބާ މީހުންނަށް ތަކެތި ވިއްކަން ޖަމާވި އެވެ. މި ސަރަހައްދުގައި ފައިސާ މާރުކުރާ މޭޒުތައް ވެސް އަތުރާލި އެވެ. އެ ކްރޫޒްޝިޕުން ފޭބި ގިނަ ޓޫރިސްޓުން މީގެ ކޮންމެ ވެސް މޭޒަކުން އެއްޗެއް ގަނެ އެވެ. މިދިޔަ އަހަރަށް ބަލާއިރު އިންޑިއާގެ ކޮޗިން ބަނދަރަށް އެކަނި 40 އަށްވުރެ ގިނަ ކްރޫޒްޝިޕް ބަނދަރުކޮށް މީގެން 52،000 އަށްވުރެ ގިނަ ޓޫރިސްޓުން ފޭބި އެވެ. އަދި މި އުޅަނދު ފަަހަރުން އައި ޓޫރިސްޓުން މި ސިޓީގައި ކުރި ވިޔަފާރީގެ އަގު އެތައް މިލިއަން ޑޮލަރަށްވުރެ މަތި ކަމަށް އެ ގައުމުގެ ޓޫރިޒަމް ތަފާސް ހިސާބުތައް ދައްކަ އެވެ. 

މިއީ އިންޑިއާގައި މިކަން ކުރާ ގޮތެވެ. އެ ގައުމުގައި މިކަން އިންތިޒާމުކޮށްފައިވަނީ ކްރޫޒް ލައިނާ އިން ފައިބާ މީހުންނާއި އާއްމުންނާ އިންޓްރެކްޓްވާ ގޮތަށެވެ. ބޭނުމަކީ އާއްމުންނަށް މަންފާ ލިބޭނެ ވިޔަފާރިއެއްގެ ގޮތުގައި މިކަން ބޭއްވުމެވެ. މި ފުރުސަތު ރާއްޖެ އަށް ވެސް އެބައޮތެވެ. ރާއްޖެ އަށް ކްރޫޒްލައިނާ އާއި ސުޕަޔޮޓް ގެންނަ ޖަމިއްޔާ މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް (މާޔާ) ގެ ތަފާސް ހިސާބުތައް ދައްކާ ގޮތުގައި މިދިޔަ އަހަރު އެކަނި 15 ވަރަކަށް ކްރޫޒްޝިޕް ރާއްޖެ އަށް ބަނދަރު ކުރި އެވެ.

ސުވާލަކީ މި އުޅަނދު ފަހަރުން ދިވެހިންނަށް ވީ ކޮން ފައިދާއެއް ހެއްޔެވެ ؟ މި އުޅަނދުތަކުން ހާހުން މީހުން ފައިބާއިރު މީގެން އެންމެ ޑޮލަރެއްވެސް އާއްމު މީހާގެ ޖީބަށް ވަންނާނެ ގޮތެއް ހަދަން ނޫޅެނީ ކީއް ވެގެން ހެއްޔެވެ؟ އެކަމަށް އިސް ނަގާނެ ބަޔަކު ނުވަނީ ހެއްޔެވެ؟ 

މި ސުވާލު މާޔާގެ އިސް ވެރިއަކާ ކޮށްލުމުން ދެއްވި ޖަވާބަކީ އެކަމަށް އިސްނަގާނެ ވުޒާރާއެއް ސަރުކާރުގައި ނެތީ އެވެ. 

"މި ފުރުސަތު ބޮޑުކޮށް އެބައޮތް. ބޭނުންވަކީ އިސް ނަގާނެ ފަރާތެއް. މިއީ ބޮޑުކޮށް ހުޅުވިފަ އޮތް ފުރުސަތެއް،" މާޔާގެ އިސްވެރިޔާ ނަން ނުޖެހުމަށް އެދި ވިދާޅުވި އެވެ.

ކްރޫޒްލައިނާއަކުން މާލެއަށް ފައިބާފައިބާ ޓޫރިސްޓުތަކެއް -- ދަމިރާ

ކްރޫޒްލައިނާ އިން ފައިބާ މީހުންނަށް ހިދުމަތެއް ރާއްޖެ އަކުން ނުދެވެ އެވެ. އެ ވާހަކަ ބާއްވާށެވެ. އަދި މި ބޯޓުތައް އަންނައިރު މިހުންނަށް އެކްސްކާޝަން ލަންކާ އާއި އިންޑިއާ އިން މީހުން އަންނަ ވާހަކަ ވެސް ބާއްވާށެވެ. މި ކަމަކީ ހުއްޓުވަން ޖެހޭ ކަންކަމެވެ. މިއާއެކު މިހާރު އެންމެ އިސްކަމެއް ދީގެން ކުރަން ޖެހޭ ކަމަކީ މި އުޅަނދުފަހަރުން ފައިބާ ޓޫރިސްޓުންގެ އަތުން ދިވެހިންގެ ޖީބަށް އިތުރު ޑޮލަރެއް ލިބޭނެ އިންތިޒާމެއް ހަމަޖައްސައި ދިނުމެވެ. މި ކަމަކީ ވަރަށް ކުޑަ އަދި ވަރަށް ފަސޭހަ ކަމެކެވެ. މިކަން ކުރަން ނޭނގޭނަމަ ކުރާނެ ގޮތް މި ކިޔައި ދެނީ އެވެ.

ދުރާލާ ކްރޫޒްލައިން ފެސްޓިވަލް އިއުލާނު ކުރަންވާނެ

ފުރަތަމަ ކުރަންވި ކަމަކީ އަހަރު ފެށޭތަނުން މި އަހަރަކީ ކްރޫޒްލައިނާއަށް ހާއްސަ ކަންތައް ތަކެއް އޮތް ފެސްޓިވަލް އަހަރެއްގެ ގޮތުގައި އިޝްތިހާރު ކުރުމެވެ. މިކަން އެމްއެމްޕީއާރުސީ މާކެޓިން ބޯޑީއަކާ ގުޅިގެން އިޝްތިހާރު ކުރުމެވެ. މި އުޅަނދުތައް ހަމައެކަނި މާލެއަށް ގެނައުއުމުގެ ބަދަލުގައި މުޅިރާއްޖޭގެ އެކި ހިސާބުތަކަށް އުޅަނދުތައް ދާނެ ގޮތަކަށް އިންތިޒާމު ކުރެވިދާނެ އެވެ.

އިވެންޓް ކަލަންޑަރެއް ހަދައި ބޯޓު ފަހަރުން ފައިދާ މީހުންނަށް ހާއްސަ ހިދުމަތެއް ތަކެއް ދެވޭނެ އިންތިޒާމު ހަމަޖެއްސުމެވެ. މިހާރު ކްރޫޒްލައިނާތަކުން ފައިބާ މީހުން ފާހާނާ ކޮށްލެވޭނެ ވަސީލަތްވެސް މާލެއަކު ނެތެވެ، މިއީ ވަރަށް ފަސޭހަ ކަމެވެ. ބޯޓު އަންނަ ދުވަސް ވަރާ ދިމާކޮށް ޕޯޓަބަލް ފާހާނާ ބަރިއެއް ބެހެއްޓީމަ ނިމުނީ އެވެ. މި ކަމަކީ ރާއްޖޭގައި އަލަށް ކުރި ކަމެއް ނޫނެވެ. މިހާތަނަށް ރާއްޖޭގައި ބޭއްވި ވޯޓްލުންތަކާއި ފެއާތަކުގައި ވެސް ޕޯޓަބަލް ފާހާނާ ބަރި ބަހައްޓައިގެން ހިދުމަތް ދިފައިވެ އެވެ. މި ފާހާނާ ބަރިތައް މާލޭގެ ހުސް ބިންތަކުގައި ބެހެއްޓިދާނެ އެވެ.

މި ހަރަކާތް ގްރޭޓާމާލެ އޭރިއާއަށް ބަހާ ލެވިދާނެ

ކްރޫޒްލައިނާއަކުން މާލެއަށް ފައިބާފައިބާ ޓޫރިސްޓުތަކެއް -- ދަމިރާ

މި ފެސްޓިވަލްގެ ބޮޑުބައި އޮންނާނީ ޖުމްހޫރީ މައިދާނުގަ އެވެ. މިއުޒިމް ސަރަހައްދު ހިމެނޭހެން އިންތިޒާމުކޮށްފައިވާ ހާއްސަ ހަރަކާތް ތަކެއް ހިންގާނީ އެވެ. އަދި މުޅިމާލެ ތެރެއަށް ހަރަކާތްތައް ބަހައި ލެވިދާނެ އެވެ. އާޓިފިޝަން ބީޗް ސަރަހައްދާއި ސެންޓްރަލް ޕާކް އަދި ރަސްފަންނުގައި ވެސް މި ހަރަކާތްތައް ބޭއްވިދާނެ އެވެ. މި ސަރަހައްދުތަކުގައި ޓޫރިސްޓުންނަށް މަރުހަބާ ކިޔަން ސަގާފީ ހަރަކާތް ތަކެއް ވެސް ހިންގޭނެ އެވެ. ދިވެހި އާޓިސްޓުންނާއި ހުނަރުވެރިންގެ ހުނަރުތައް ފެންނަ މޭޒުތައް ވެސް ހުންނާނެ އެވެ. ދިވެހި ލުއިކާނާ ވިއްކާ ތަންތަނާއި ހަނދާނީ ހަދިޔާގެ މޭޒުތައް ވެސް ހުންނާނެ އެވެ. މި ޒަމާނުގެ ހުނަރުތަކާއި ކުރީގެ ހުނަރުތައް ދައްކުގައިދޭ ތަންތަން ވެސް ހުންނަންވާނެ އެވެ. އަދި މި ކްރޫޒްލައިނާއިން ފައިބާ ޓޫރިސްޓުންނަށް ހުޅުމާލެ ދައްކާލުމުގެ ހަރަކާތެއް ވެސް އިންތިޒާމު ކުރެވިދާނެ އެވެ. ސަބަބަކީ ހުޅުމާލެއަކީ ރާއްޖޭގެ އެންމެ ބޮޑު "މޭންމޭޑް އައިލެންޑް" އަށް ވެފައި މިތަނަކީ މިހާރު ދިވެހި ތާރީހުގެ ވަރުގަަދ ވާހަކައެއްގެ ގޮތުގައި އޮތް ތަނަކަށްވުމެވެ. މި ކަމަށް ޓެކްސީތަކާއި މިކަމަށް ހާއްސަކޮށްފައިވާ އުޅަނދު ތަކެއް ވެސް ބޭނުން ކުރެވިދާނެ އެވެ.

މިފަދަ ހަރަކާތަކީ ބިޒްނަސް ސެންޓާ ކޯޕަރޭޝަން (ބީސީސީ) އާއި އަމިއްލަ ޖަމިއްޔާ ޖަމާއަތްތައް ވެސް ބައިވެރިވުން ބޮޑު ހަރަކާތްތަކެކެވެ. އަދި އޮތެންޓިކް މޯލްޑިވްސް ފަދަ ދިވެހި އުފެއްދުންތައް ވިއްކާ ބްރޭންޑްތަކުން މުހިންމު ރޯލެއް އަދާކުރެވިދާނެ އެވެ. މީގެ އިތުރުން މިކަމުގައި ސިޓީ ކައުންސިލާއި ސިޓީތަކާއި ކައުންސިލްތަކުގެ މިނިސްޓްރީން ވެސް މުހިންމު ދައުރެއް ކުޅެވިދާނެ އެވެ. މިގޮތަށް މިކަން އިންތިޒާމު ކުރެއްވިއްޖެނަމަ އަމިއްލަ ގިނަ ބަޔަކަށް ކްރޫޒްލައިނާ ތަކުން މަންފާ ލިބެން ފަށާނެ އެވެ. އަދި މާލެއަކީ ކްރޫޒްލައިންތަކަށް "އެޓްރެކްޓް" މަންޒިލެއްގެ ގޮތުގައި އެމީހުން ދެކެން ފަށާނެ އެވެ. އަދި މިފަދަ އުޅަނދުތައް އަންނަ އަދަދު ވެސް އިތުރުވެ ރާއްޖެ އަށް ކުރާ ދަތުތައް ޓޫރިސްޓުންގެ ޝައުގުވެރިކަން ވެސް އިތުރުވާނެ އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.