މި މައްސަލަ ހައިކޯޓުގައި އިސްތިއުނާފް ކުރިއިރު، އެމީހުން ބަންދު ކޮށްދިނުމުގެ އަމުރެއް ހޯދުމަށް ދައުލަތުން ވަނީ އެދިފަ އެވެ. ނަމަވެސް ހައިކޯޓުން މިދިޔަ މަހުގެ 10 ވަނަ ދުވަހު ވަނީ އެފަދަ އަމުރެއް ނެރެދެވެން ނެތް ކަމަށް ނިންމާފަ އެވެ.
މީގެ އަށް އަހަރު ކުރިން ލިޓަސް ސާވިސް ސެންޓަރު ތެރޭގައި އަނިޔާވެރިކޮށް ރ. މީދޫ، ފެންފިޔާޒުގޭ، މުހައްމަދު އަނަސް މަރާލުމުގެ ތުހުމަތު އޮތް މީހުން ބަންދު ނުކުރަން ހައިކޯޓުން ކުރި ހުކުމް، ސުޕްރީމް ކޯޓުގައި އިސްތިއުނާފް ކޮށްފި އެވެ.
ނަސް މަރާލި މައްސަލައިގައި ކްރިމިނަލް ކޯޓުގައި ހަތް މީހެއްގެ މައްޗަށް ދައުވާ އުފުލި އެވެ. އެއީ ދަފްތަރު ނަމްބަރު 1746، ސިމާހު މޫސާ އާއި ސ. ފޭދޫ، ވެސްޓަންވިލާ، ހަސަން މަހްފޫޒް އާއި ތ. ކިނބިދޫ، ގުލްފާމުގެ، މުހައްމަދު ޝާޒް އާއި ލ. ގަން ތުނޑީ، ނަންނާރިގެ، ޖުނައިހު އަބްދުﷲ އާއި ޅ. ކުރެންދޫ އަސުރުމާގެ، އަހުމަދު ޒަޔާނުގެ އިތުރުން ގ. ލޮނުމިދިލިގެ، އަފްރާހު އަބްދުއްރައްޒާގު އަދި މ. ދިމިޝްގު، އުސްމާން ޝަރީފް އެވެ.
މި އެންމެންގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ހުކުމް ކޮށްފައި ވަނީ ފެބްރުއަރީ 25، 2024 ގަ އެވެ. ކޯޓުން އެ ހުކުމް ކުރީ ކުށް ސާބިތު ކުރެވޭ މިންވަރަށް ހެކި ނެތް ކަމަށް ބުނެ އެވެ.
މި މައްސަލަ ހައިކޯޓުގައި އިސްތިއުނާފް ކުރިއިރު، އެމީހުން ބަންދު ކޮށްދިނުމުގެ އަމުރެއް ހޯދުމަށް ދައުލަތުން ވަނީ އެދިފަ އެވެ. ނަމަވެސް ހައިކޯޓުން މިދިޔަ މަހުގެ 10 ވަނަ ދުވަހު ވަނީ އެފަދަ އަމުރެއް ނެރެދެވެން ނެތް ކަމަށް ނިންމާފަ އެވެ.
އެހެންވެ، ދައުލަތުން ވަނީ މިދިޔަ ހޮނިހިރު ދުވަހު އެ މީހުން ބަންދު ނުކުރުމަށް ހައިކޯޓުން ނެރުނު އަމުރު ސުޕްރީމް ކޯޓުގައި އިސްތިއުނާފް ކޮށްފަ އެވެ. އެ ކޯޓުން ވަނީ އެ މައްސަލަ ބަލައިވެސްގަނެވަ އެވެ.
ހައިކޯޓުން އެ މީހުން ބަންދު ނުކުރަން ނިންމި ސަބަބެއްގެ ގޮތުގައި ފާހަގަކޮށްފައި ވަނީ، ތުހުމަތުވާ މީހުން ބަންދު ކުރަން ޖެހޭ އެއްވެސް ސަބަބެއް ދައުލަތަށް ދެއްކިފައި ނުވާތީ އެވެ. އެގޮތުން، މިފަދަ އަމުރެއް ނެރެވޭނީ އިސްތިއުނާފްގެ މައްސަލަ ކާމިޔާބުވުމުގެ ފުރުސަތު ބޮޑު ހާލަތްތަކުގަ އާއި މުޖުތަމައުގެ ބޮޑު މަސްލަހަތެއް ގެއްލިދާނެ ކަމަށް ބެލެވޭ ހާލަތެއް އަދި ތުހުމަތު ކުރެވޭ ފަރާތްތައް ފިލައިގެން ގޮސްދާނެ ކަމުގެ އިހުތިމާލު އޮތް މައްސަލަތަކުގައިކަން ހައިކޯޓުން ވަނީ ފާހަގަކޮށްފަ އެވެ.