ގިނަ ވަސީލަތްތަކަކާއެކު އަންނަ މަހު އާ ތެލެސީމިއާ ސެންޓަރު ހުޅުވަނީ
"މިހާރު އަޅުގަނޑު ވާނީ ދަންނަވާފަ ޑީއެންއޭ ޓެސްޓް ކުރާ މެޝިންތަކާ، މިކަހަލަ ބައިވަރު ސާމްޕަލްތައް ބަހައްޓާނެ ތަނުގެ ޖާގަ ވެސް ބޮޑުވާނެ، އެތަނަށް އިތުރު ފްރިޖްތައް ހޯދުމާ މިކަހަލަ ހުރިހާ ކަމެއް ވެސް އެބަ ހިނގާ،" ރައީސް ވިދާޅުވި އެވެ.
ރަގަޅު ގިނަ ވަސީލަތްތަކަކާއެކު އަންނަ މަހުގެ އަށްވަނަ ދުވަހު ތެލެސީމިއާ ސެންޓަރުގެ އާ އިމާރާތް ހުޅުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިހާރު ދަމަނަވެށީގައި ހިންގާ ތެލެސީމިއާ ސެންޓަރުގެ ފެންވަރު ދަށްކަމުން، އެތަނުން ފަރުވާ ހޯދަމުންދާ ފަރާތްތައް މުޒާހަރާ ކުރުމުން ރައީސް ވަނީ މިދިޔަ މަހު އެތަނުގެ ހާލަތު ބައްލަވާލަން ވަޑައިގެންފަ އެވެ. ހާލަތު ބެއްލެވުމަށްފަހު އެތަން، ހުޅުމާލޭގައި ހުންނަ އޮރެންޖު ހިޔާއަށް ބަދަލުކުރުމަށް ވަނީ ނިންމާފަ އެވެ.
ސިންފައިންނާ ހަވާލުކޮށްގެން ކުރިއަށް ގެންދާ އެ މަސައްކަތް މިމަހުގެ ނިޔަލަށް ނިންމާލެވޭނެ ކަމަށް ރައީސް މިއަދު ވަނީ ވިދާޅުވެފަ އެވެ.
"ރައްޔިތުންގެ އަޑު" ޕޮޑްކާސްޓްގައި އެމަނިކުފާނު މިއަދު ވިދާޅުވީ އަންނަ މަހުގެ އަށްވަނަ ދުވަހަކީ ދުނިޔޭގެ ތެލެސީމިއާ ދުވަސްކަމުން، އެ ދުވަހު އާ ސެންޓަރު ހުޅުވުމަށް މަސައްކަތް ކުރައްވަމުން ގެންދަވާ ކަމަށެވެ. އެތަން ހުޅުވާއިރު، މިހާރަށްވުރެ ވަސީލަތާ ހިދުމަތްތައް ވެސް ރަގަޅުވާނެކަން ވެސް ފާހަގަކުރެއްވި އެވެ.
"މިހާރު އަޅުގަނޑު ވާނީ ދަންނަވާފަ ޑީއެންއޭ ޓެސްޓް ކުރާ މެޝިންތަކާ، މިކަހަލަ ބައިވަރު ސާމްޕަލްތައް ބަހައްޓާނެ ތަނުގެ ޖާގަ ވެސް ބޮޑުވާނެ، އެތަނަށް އިތުރު ފްރިޖްތައް ހޯދުމާ މިކަހަލަ ހުރިހާ ކަމެއް ވެސް އެބަ ހިނގާ،" ރައީސް ވިދާޅުވި އެވެ.
ތެލެސީމިއާ ސެންޓަރުގައި އެތައް ޒަމާނެއްވާންދެން ނެތް ސީނިއާ ފިޒިޝަން ވެސް މިހާރު ފުލްޓައިމްކޮށް އެތަނުގައި މަސައްކަތް ކުރަމުންދާކަން ފާހަގަކުރައްވައި ރައީސް ވިދާޅުވީ ފަސް ނަރުހުން ހޯދަން ވެސް މިހާރު އިއުލާނުކޮށްފައިވާ ކަމަށެވެ.
ރައީސް ވިދާޅުވީ ތެލެސީމިއާ ސެންޓަރުގެ ފެންވަރު ރަގަޅު ކުރުމަކީ ގައުމީ މަސައްކަތެއް ކަމަށެވެ. ސިފައިންނާ މި މަސައްކަތް ހަވާލުކުރެއްވީވެސް އެސަބަބާހުރެ ކަމަށާއި، މިއީ ވަރަށް އަވަސް ހައްލެއް ބޭނުންވެފައިވާ މައްސަލައެއް ކަމަށެވެ.
މި މަސައްކަތް ކުރިއަށް ގެންދަނީ އެމްއެންޑީއެފްގެ ސާވިސް ކޯގެ ބެލުމުގެ ދަށުންނެވެ. އެގޮތުން، އެމްއެންޑީއެފް ސާވިސް ކޯގެ މިލިޓަރީ އިންޖިނިއަރުންނާއި އޯވަރޯލްކޮށް މަސައްކަތް ހަވާލުކޮށްގެން ކުރިއަށްގެންދާ މި މަސައްކަތުގައި، އެ އިމާރާތުގެ ކަރަންޓާއި އޭސީގެ މަސައްކަތް، އެމްއެންޑީއެފް އިލެކްޓްރިކަލް އެންޑް މެކޭނިކަލް އިންޖިނިއަރުން ދަނީ ކުރަމުންނެވެ.
އަދި އައިޓީސީއާ ގުޅުންހުރި ހުރިހާ މަސައްކަތެއް ކުރަމުން ދަނީ އެމްއެންޑީއެފް ސިގްނަލްސްގެ ޓެކްނިކަލް ސިފައިންނެވެ. އެ އިމާރާތުގައި އަމަލީ މަސައްކަތް ފެށުމުގެ ކުރިން، އެމްއެންޑީއެފް އިލެކްޓްރިކަލް އެންޑް މެކޭނިކަލް އިންޖިނިއަރުންގެ ޑިޒައިނިން ޓީމުން އަލުން އެތަން ޑިޒައިންކޮށް، ކުޑަކުދިން ގަޔާވާ ކަހަލަ ބައެއް ބަދަލުތައް ގެނެސްފައިވާ ކަމަށް ސިފައިންގެ އިން ބުންޏެވެ.
ކޮމެންޓް
Republic of Maldives