ސަލްމާން މިސްކިތުގައި ކަރަންޓާއި އަޑު ނުހުންނަ ޝަކުވާތަކެއް

އަދިވެސް ރަސްމީކޮށް ހުޅުވާފައި ނުވާ މާލޭގެ ސަލްމާން މިސްކިތުގެ ވަރަށް ގިނަ ވަގުތުތަކުގައި ފަހަކަށް އައިސް ކަރަންޓު ނޯންނަ މައްސަލަތަކާއި ތާޅަފިލިތަކުގެ އަޑު މަޑު ކުރުމާއި އަޑު ކަނޑާފައި ހުންނަ މައްސަލަތައް މީހުން ފާހަގަ ކުރާން ފަށައިފި އެވެ.

މި މަހުގެ 21 ވަނަ ދުވަހު ސަލްމާން މިސްކިތަށް އެތަކެއްހާސް ބަޔަކު ހުކުރު ނަމާދަށް ދިޔައިރު ވެސް އެ މިސްކިތުގައި އެއާކޯންތައް ހުރީ ނިވާލާފަ އެވެ. އަދި ބައެއް ތާޅަފިލިތަކުން އަޑު ކަނޑާލާފައި ވެއެވެ. އެ ދުވަހު އެތައް ހާސް ބަޔަކު ސަލްމާން މިސްކިތުގައި އޭސީ ނުޖައްސާ ގަދަ ހޫނުގައި ހުކުރު ކުރަން ޖެހުނެވެ.

އޭގެ ފަހުން އިއްޔެގެ މަޣުރިބު ނަމާދު ގަޑީގައި ވެސް މިސްކިތް އޮތީ އަނދިރީގަ އެވެ. އެ މިސްކިތަށް ދާ ބައެއް މީހުން އެކަން ފާހަަކޮށް ޓްވިޓާ އާއި ފޭސްބުކް ފަދަ ޕްލެޓްފޯމްތަކުގައި ބުނެފައި ވަނީ ގަސްދުގައި ކަރަންޓު ދުއްވާލައި އަޑު ކަނޑާލާ ކަމަށް ފާހަގަ ކުރެވޭ ކަމަށެވެ. އަދި ފަހަކަށް އައިސް އެކަން ވަރަށް ކައިރި ކައިރީގައި ހިނގާ ކަމަށެވެ.

އަދި ބައެއް އެހެން މީހުން ބުނީ އެވަރުގެ ފުރިހަމަ ނިޒާމްތަކެއް މިސްކިތުގައި ރަނގަޅަށް ފުރިހަމަ ވެފައިވާ މިސްކަތަކުން ކޮންމެ ނަމާދު ވަގުތަކަށް އަޑާއި ކަރަންޓު ކެނޑިފައި އޮންނަން ޖެހޭ ސަބަބެއް ނުވިސްނޭ ކަމަށާއި އެއީ ގަސްދުގައި ކުރާ ކަމެއް ކަމަށް މިހާރު ބޮޑަށް ބެލެވޭ ކަމަށެވެ.

މީގެ ކުރިން އެ މިސްކިތް ނަމާދަށް ބޭނުން ކުރަން ފެށި ދުވަސްވަރު ވެސް އެފަދަ މައްސަލަތަކެއް ނުކުތެވެ. އެ ފަހަރު ވެސް އާންމުން ވަނީ އިސްލާމިކް މިނިސްޓްރީއަށް ވަރަށް ބޮޑަށް ފާޑުކިޔައި ސަލްމާން މިސްކިތް ބެލެހެއްޓުމުގައި އިސްލާމިކް މިނިސްޓްރީގެ އިންތިޒާމުތައް ދޯދިޔާކަން ފާހަގަ ކޮށްފަ އެވެ. އެފަހަރު ބުނެފައި ވަނީ އެހެން ދިމާވީ ކޮމްޕިއުޓާ ސިސްޓަމް ބޭނުން ކޮށްގެން ކަރަންޓު ޖައްސަންޖެހޭ މުވައްޒަފަށް ނުދެވިގެން ކަމަށެވެ. ސަލްމާން މިސްކިތުގައި ކަރަންޓު ފޯރުކޮށްދެނީ ކޮމްޕިއުޓާ ސިސްޓަމެއް ބޭނުން ކޮށްގެންނެވެ.

ކަރަންޓް ނެތި ވަރަށް ގިނައިން ދިއުމާއި އޭސީތައް ނުޖައްސާ "ހޫނު އަވަނަކަށް" ސަލްމާން މިސްކތް ހަދާފައި އޮނަން މައްސަލަތައް ދިމާވާއިރު އެ މިސްކތުގެ ދޮރުތަކުގެ ޑޯ ކްލޯޒަރުތައް އެޖެސްޓް ނުކޮށް ހުރުމުން އަބަދު ޖެހޭ އަޑު ވެސް ގަދަވެފައި ހުރެ އެވެ.

ސަލްމާން މިސްކިތުގައި ނަމާދު ކުރަން ހާއްސަ ކޮށްފައި ވަނީ ފުރަތަމަ ބުރި އާއި ދެ ވަނަ ބުރި އެވެ. އެ ދެ ބުރީގައި އެއް ފަހަރާ 4،000 މީހުންނަށް ނަމާދު ކުރެވޭނެ އެވެ. އަދި މިސްކިތުގެ ބޭރުގައި ވަށައިގެން އޮތް ސަރަހައްދުގައި 6،000 މީހުންނަށް ނަމާދު ކުރެވޭނެ އެވެ. މިއީ ރާއްޖޭގައި މިހާތަނަށް މިސްކިތެއްގައި އަންނަ އެންމެ މަތީ ނަމްބަރެވެ. މުޅި މިސްކިތުގެ އެންމެ ތިރީގައި ވަނީ ފާހާނާތަކާއި ވުލޫކުރަން އިސްކުރު ބަރިތަކެވެ. އެ ދެ ބައި ހުރީ ދެ ޖިންސުގެ މީހުންނަށް ވަކިން ބޭނުންކުރެވޭ ގޮތަށެވެ. އޭސީކޮށްފައިވާ މިސްކިތުގައި ތިން ލިފްޓާއި ހަތަރު ސިޑި ހިމެނެ އެވެ.

ތިން ވަނަ ބުރީގެ އެއް ބަޔާއި ހަތަރު ވަނަ ބުރި އެއްކޮށްލައިގެން ހަދާފައިވާ އޮޑިޓޯރިއަމް ވެސް ވަރަށް ރީއްޗެވެ. އޮޑިޓޯރިއަމްގައި 350 ގޮނޑި ޖަހާފައިވެ އެވެ. އެހެން ކަމުން މިއީ ހިތްގައިމު ލޮބީއަކާއެކު ރާއްޖޭގެ އެންމެ ބޮޑު އެއް އޮޑިޓޯރިއަމަށް ވާނެ އެވެ. ފަސް ވަނަ ބުރީގައި ހަދާފައި ވަނީ އެކި އިވެންޓްތައް ބޭއްވޭ ކަހަލަ މަލްޓި ޕާޕަސް ހޯލެކެވެ.

ދިވެހި ރުކަށް ވުރެ ވެސް ނަލަޔަށް ކަދުރު ރުއް ވަށައިވަށައިގެން ހައްދާފައިވާ، ފަސް މުންނާރާއި ތަފާތު ބިޔަ ގުއްބެއް ހިމެނޭ ގޮތަށް ހަދާފައިވާ މިސްކިތުގެ ބޮޑެތި ބިއްލޫރި ދޮރުތަކުން ސާފުކޮށް ރީތިކޮށް ބޭރުގެ ހިތްގައިމު ވިއު ފެންނާން އޮވެ އެވެ. މި ހިތްގައިމު މިސްކިތް ވެސް ހަދާފައި ވަނީ ވަށައި ބުރަކަށް ކަހަލަ ސިފައެއް ގެނުވައި ޑައިމީޓަރަކަށް މަންޒަރު ފެންނާނެ ހެނެވެ.

މިސްކިތުގައި ހަރުކޮށްފައިވާ ކީރިތި ގުރުއާންގެ މޫރިތި އާޔަތްތައް، ކަނޑާ ނަގާފައި ވަނީ، އާންމުކޮށް ރާއްޖޭގެ މިސްކިތްތަކުގައި ހުންނަ ގޮތަށް ލަކުޑީގެ ބަދަލުގައި މުޅީން މާބުލްގަ އެވެ. މިސްކިތުގެ ތެރެއަށް މަޑުމަޑު ރަން އައްޔެއް ފޭދި ފަތުރާލާފައި އޮންނަ އިރު ބޭރުން އިރުމަތީ ފަރާތުގެ ހިތްގައިމު މަންޒަރު އެ އަލީގެ ތެރެއަށް ވަދެ ހިމުންވެފައި އޮވެ އެވެ. އާދަޔާ ހިލާފު ރީތި ކަމަކާއެކު މިސްކިތެއްގެ ފުރިހަމަ ހިމޭން ކަމެއް ގެނުވައި ދެ އެވެ. މުޅި މިސްކިތަށް ހާއްސަ ބައިތަކުގައި ދޫލަ އަޅައި، އަޖައިބު ރީތިހާ ބޮކިތައް ހަރުކޮށްފައި ވާއިރު އެކި ދިމާއިން ދޮރުތަކުގެ ދެމެދުގައި ހިމެނޭ ފާރުތައް ނަލަހައްދާފައި ވަނީ އިސްލާމީ ޝަހުސިއްޔަތު ވިދައިގަންނާނެ ރަން ކުލައެއް ޖެހޭ ހާއްސަ މާބުލް އަކުންނެވެ.

މިއީ 24.95 މިލިއަން ޑޮލަރު (ގާތްގަނޑަކަށް 370 މިލިއަން ރުފިޔާ) ހޭދަކޮށް ތުރުކީގެ ޓާމެކްސް ކުންފުންޏާ ހަވާލުކޮށްގެން ސައުދީ ރަސްގެފާނު އަޅައިދިން މިސްކިތެކެވެ.